ឯកឧត្តមបណ្ឌិតអគ្គលេខាធិការ សរ ចិត្រា អញ្ជើញជាអធិបតីបើកកិច្ចប្រជុំក្រុមប្រឹក្សាអង្ករបម្រុងសង្គ្រោះបន្ទាន់អាស៊ានបូកបី លើកទី១៤ (The 14th Meeting of APTERR Council) នៅខេត្តសៀមរាប

ចេញ​ផ្សាយ​ ៥ មីនា ២០២៦ 2001

នៅថ្ងៃទី៥ ខែមីនា ឆ្នាំ២០២៦  ឯកឧត្តមបណ្ឌិត សរ ចិត្រា អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកកិច្ចប្រជុំក្រុមប្រឹក្សាអង្ករបម្រុងសង្គ្រោះបន្ទាន់អាស៊ានបូកបី លើកទី១៤ (The 14th Meeting of APTERR Council) នៅខេត្តសៀមរាប
កិច្ចប្រជុំនេះ ប្រព្រឹត្តទៅរយៈពេលពីរថ្ងៃ គឺចាប់ពីថ្ងៃទី៥ ដល់ថ្ងៃទី៦ ខែមីនា ឆ្នាំ២០២៦ ដោយមានការអញ្ជើញចូលរួមពីសំណាក់គណៈប្រតិភូនៃបណ្តាប្រទេសសមាជិកអាស៊ានទាំង១១ប្រទេសបូកបី (ចិន ជប៉ុន និងសាធារណរដ្ឋកូរ៉េ) ព្រមទាំងមន្រ្តីនៃលេខាធិការដ្ឋាន APTERR ផងដែរ។
នាឱកាសនេះ ឯកឧត្តមបណ្ឌិតបានគូសបញ្ជាក់យ៉ាងច្បាស់អំពីតួនាទី និងសារៈសំខាន់មិនអាចខ្វះបាននៃកិច្ចសហប្រតិបត្តិការក្នុងតំបន់ ដើម្បីធានាបាននូវសន្តិសុខស្បៀង តាមរយៈយន្តការរបស់អង្គការ APTERR ជាពិសេសក្នុងការត្រៀមលក្ខណៈជាមុន និងការឆ្លើយតបយ៉ាងទាន់ពេលវេលាទៅនឹងគ្រោះអាសន្ននានា ដែលបណ្តាលមកពីគ្រោះមហន្តរាយធម្មជាតិ ឬវិបត្តិផ្សេងៗ។
ទន្ទឹមនឹងនេះ ឯកឧត្តមបណ្ឌិត ក៏បានរំលេចអំពីវឌ្ឍនភាព និងសមិទ្ធផលដ៏ល្អប្រសើរនៃការអនុវត្តកម្មវិធីរបស់ APTERR នៅក្នុងប្រទេសកម្ពុជា ជាក់ស្តែងដូចជាការសម្របសម្រួល និងការគ្រប់គ្រងប្រកបដោយប្រសិទ្ធភាពនូវការរួមចំណែកផ្តល់អង្ករក្រោមកម្មវិធីកម្រិត៣ (Tier 3) ពីបណ្តាប្រទេសជាមិត្ត ដូចជាសាធារណរដ្ឋប្រជាមានិតចិន និងប្រទេសជប៉ុន ដែលបានផ្តល់ជាសាច់ប្រាក់សម្រាប់ទិញអង្ករកម្ពុជាក្នុងបរិមាណសរុប
៦៣៥តោន សម្រាប់ត្រៀមជួយសង្គ្រោះប្រជាពលរដ្ឋដែលងាយរងគ្រោះ។ 
ជាទីបញ្ចប់ ឯកឧត្តមបណ្ឌិត បានថ្លែងអំណរគុណយ៉ាងជ្រាលជ្រៅដល់រដ្ឋសមាជិក និងលេខាធិការដ្ឋាន APTERR ដែលតែងតែផ្តល់ការគាំទ្រយ៉ាងសកម្ម ព្រមទាំងបានជូនពរឱ្យអង្គប្រជុំទាំងមូលដំណើរការទៅដោយរលូន ទទួលបានផ្លែផ្កា និងសម្រេចបាននូវកិច្ចព្រមព្រៀងសំខាន់ៗ ដើម្បីបន្តពង្រឹងយន្តការបម្រុងស្រូវសង្គ្រោះបន្ទាន់នេះ ឱ្យកាន់តែមានភាពរឹងមាំ និងមានចីរភាពតទៅមុខទៀត៕