ឯកឧត្ដមអនុរដ្ឋលេខាធិការ ហុង ណារិត អញ្ជើញចូលរួមកិច្ចប្រជុំថ្នាក់រដ្ឋមន្ត្រីចិន-អាស៊ានលើកទី៩ ស្ដីពីកិច្ចសហប្រតិបត្តិការអនាម័យនិងភូតគាមអនាម័យ

ចេញ​ផ្សាយ​ ១៥ វិច្ឆិកា ២០២៥ 499

នៅថ្ងៃទី១២-១៣ ខែវិច្ឆិកា ឆ្នាំ២០២៥ ដោយមានការចាត់តាំងពីឯកឧត្តមរដ្ឋមន្ត្រី ឌិត ទីណា ឯកឧត្ដម ហុង ណារិត អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំសហការី ចូលរួមកិច្ចប្រជុំថ្នាក់រដ្ឋមន្ត្រីចិន-អាស៊ានលើកទី៩ ស្ដីពីកិច្ចសហប្រតិបត្តិការអនាម័យនិងភូតគាមអនាម័យ (The 9th China-ASEAN Ministerial Meeting on SPS Cooperation) និងកិច្ចប្រជុំពាក់ព័ន្ធ នៅខេត្តចុងឈិង​ (Chongqing) សាធារណរដ្ឋប្រជាមានិតចិន។ 
កិច្ចប្រជុំនេះគឺជាវេទិកាដ៏សំខាន់សម្រាប់ពង្រឹងកិច្ចសហប្រតិបត្តិការក្នុងវិស័យអនាម័យនិងភូតគាមអនាម័យ​ (SPS) និងពិនិត្យពិភាក្សាលើរបៀបវារៈ និងអនុម័តផែនការសកម្មភាពដើម្បីអនុវត្តបង្កើនកិច្ចសហការអាស៊ាន-ចិន។ កិច្ចប្រជុំនេះនឹងរួមចំណែកជំរុញដល់ការធ្វើពាណិជ្ជកម្មផលិតផលកសិកម្ម និងកសិ-ស្បៀងអាហារ ហើយនិងការផ្លាស់ប្ដូរបច្ចេកវិទ្យាកសិកម្ម រវាងអាស៊ាន ចិន និងដោយឡែករវាងកម្ពុជា-ចិន បន្ថែមទៀត នាពេលបច្ចុប្បន្ន និងអនាគត៕