ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំកម្លាំងជំនាញ ចុះបង្ក្រាបបទល្មើសជលផល និងផ្សព្វផ្សាយច្បាប់ស្ដីពីជលផលថ្មី នៅស្រុកពាមរក៍ ខេត្តព្រៃវែង

ចេញ​ផ្សាយ​ ២០ វិច្ឆិកា ២០២៥ 1379

នៅថ្ងៃទី១៩ ខែវិច្ឆិកា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំពីឯកឧត្តមរដ្ឋលេខាធិការ ហាស់ សារ៉េត បានអញ្ជើញដឹកនាំកម្លាំងនាយរងខណ្ឌ លោក ហិន សុខ និងមន្ត្រីក្រោមឱវាទខណ្ឌរដ្ឋបាលជលផលព្រៃវែង ចុះស្រាវជ្រាវ ត្រួតពិនិត្យទប់ស្កាត់ និងបង្រ្កាបបទល្មើសជលផល  និងផ្សព្វផ្សាយច្បាប់ស្ដីពីជលផលថ្មី នៅចំណុចព្រែកថ្មី ភូមិព្រែករាំង ឃុំបន្លិចប្រាសាទ ស្រុកពាមរក៍ ខេត្តព្រៃវែង។
ក្នុងដំណើរនេះ ក្រុមការងារជំនាញបានរុះរើរបាំងព្រួលរួមផ្សំ ដើម្បីធ្វើនេសាទដាយត្រីខុសទីតាំង ដែលបានកំណត់ ព្រមទាំងឧបករណ៍របាំងព្រួលឬស្សី បានរុះរើបំផ្លាញចោលនៅនឹងកន្លែង រួមមាន របាំងព្រួលឬស្សីប្រវែង២៤ម៉ែត្រ បង្គោលចម្រឹងចំនួន៤៥ដើម និងខ្សែដែក៨មីលីម៉ែត្រ១១០ម៉ែត្រ។
ជាមួយគ្នានេះ ឯកឧត្តមអនុរដ្ឋលេខាធិការ និងមន្ត្រីជំនាញក៏បានឱ្យប្រជាពលរដ្ឋ និងអ្នកនេសាទ រុះរើធ្នស់ និងស្បៃមង "កាត់ទទឹងដៃព្រែក ឬប្រឡាយ" ជាបន្ទាន់ព្រោះវាជាឧបករណ៍ខុសច្បាប់ ម្យ៉ាងទៀត ដើម្បីសម្រួលលំហូរទឹកនិងចរន្តត្រីក្នុងដៃព្រែក ឬប្រឡាយ។ ទន្ទឹមនឹងនេះ ក្រុមការងារជំនាញ បានផ្សព្វផ្សាយច្បាប់ស្ដីពីជលផលថ្មីដល់ប្រជានេសាទនៅភូមិព្រែករាំង ឃុំបន្លិចប្រាសាទ ស្រុកពាមរក៍ផងដែរ៕