ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញដឹកនាំក្រុមការងារជំនាញ ចុះពិនិត្យស្ថានភាពបទល្មើសនេសាទចំនួនពីរស្រុក ក្នុងខេត្តសៀមរាប

ចេញ​ផ្សាយ​ ៥ ធ្នូ ២០២៥ 1521

នៅថ្ងៃទី៥ ខែធ្នូ ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញដឹកនាំក្រុមការងារជំនាញ រួមមានលោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោក ជុំ ចាន់ថេង អភិបាលរងស្រុកសូទ្រនិគម លោក ធិននី សុទ្ធី នាយខណ្ឌរដ្ឋបាលជលផលសៀមរាប រដ្ឋបាលជលផលចុងឃ្នៀស សង្កាត់រដ្ឋបាលជលផលប្រាសាទបាគង និងមន្ត្រីខណ្ឌ ការិយាល័យវិវាទកម្មនៃរដ្ឋបាលជលផល កងកម្លាំងរាជអាវុធហត្ថខេត្តសៀមរាប កងកម្លាំងបញ្ជារការដ្ឋានសឹករងខេត្តសៀមរាប ដឹកនាំដោយលោក វរសេនីយ៍ត្រី ពុំ ពឿយ បានចុះត្រួតពិនិត្យ ទប់ស្កាត់ និងបង្រ្កាបបទល្មើសនេសាទខុសច្បាប់ ក្នុងតំបន់គ្រប់គ្រងជលផល ចាប់ពីចំណុច ឃុំកំពង់ភ្លុក ស្រុកប្រាសាទបាគង រហូតដល់ចំណុចកន្ទូ ឃុំដានរុន ស្រុកសូទ្រនិគម។
ក្នុងដំណើរនេះ ក្រុមការងារជំនាញចំនួន២៣នាក់ និងប្រើប្រាស់កាណូតស្មាច់ចំនួន៣គ្រឿង ដើម្បីរុះរើ និងបំផ្លាញចោលឧបករណ៍ល្មើសច្បាប់នៅនឹងកន្លែង ឧបករណ៍លបរ៉ាវរបាំងសាច់អួនដែលមានក្រឡាតូចជាង ៣សង់ទីម៉ែត្រប្រវែង ២០០ម៉ែត្រ  បង្គោលចម្រឹងចំនួន ៨០ដើម។
ជាមួយគ្នានេះ ឯកឧត្តមអនុរដ្ឋលេខាធិការ ក៏បានផ្ដល់អនុសាសន៍ជូនក្រុមការងារ បន្តប្រឹង ប្រែង បង្រ្កាបបទល្មើសនេសាទឆក់ចល័ត និងការពារកន្លែង អភិរក្សជលផល ចែកវេនចេញល្បាតទាំងយប់-ថ្ងៃ។ ទន្ទឹមនោះដែរ ឯកឧត្តមបាន កោត សរសើរ និងថ្លែងអំណរគុណយ៉ាងជ្រាលជ្រៅ ដល់ក្រុមការងារចម្រុះ ដែលឈរជើងនៅតាមភូមិសាស្រ្តរបស់ខ្លួន សហការជាមួយក្រុមការងារ កងយោធពលខេមរភូមិន្ទ ទទួលបន្ទុកការងារទប់ស្កាត់ និងបង្ក្រាបបទល្មើសធនធានធម្មជាតិក្នុងបឹងទន្លេសាប ក្នុងខេត្តសៀមរាប និងស្នើឱ្យសហការគ្នាកាន់តែជិតស្និទ្ធបន្ថែមទៀតក្នុងការអនុវត្តន៍ភារកិច្ច ជួយអភិរក្ស ដើម្បីអភិវឌ្ឍធនធានជលផលនៅបឹងទន្លេសាប ដើម្បីជាប្រយោជន៍រួមទាំងអស់គ្នា៕