ព័ត៌មានផ្សេងៗទៀត
កម្ពុជាធ្វើជាម្ចាស់ផ្ទះរៀបចំសិក្ខាសាលាថ្នាក់តំបន់ ស្តីពី «ការកំណត់អត្តសញ្ញាណជីវសាស្រ្តក្នុងទឹក» eDNA ដើម្បីបង្កើនប្រសិទ្ធភាពនៃការអភិរក្សជីវចម្រុះ និងបរិស្ថានអេកូឡូស៊ីទន្លេមេគង្គ
ចេញផ្សាយ ៤ សីហា ២០២៦ 3992
នាថ្ងៃទី០៤ ខែសីហា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការ ទទួលបន្ទុកការងារអភិរក្សធនធានជលផល នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់ថ្នាក់តំបន់ ស្តីពី «ការកំណត់អត្តសញ្ញាណជីវសាស្រ្តក្នុងទឹក» (eDNA)។
ថ្លែងក្នុងពិធីបើក លោកជំទាវ អ៊ឹម រចនា បានគូសបញ្ជាក់ថា ការបង្កើនចំណេះដឹងលើ «eDNA» ជួយបង្កើនប្រសិទ្ធភាពនៃការអភិរក្សជីវចម្រុះ និងបរិស្ថានអេកូឡូស៊ីទន្លេមេគង្គ ជួយការពារពូជត្រីកម្រ និងរួមចំណែកដល់ការការពារនិងអភិរក្សសត្វផ្សោតទន្លេមេគង្គ ដែលកំពុងរស់នៅក្នុងអន្លង់ទឹកជ្រៅនៃខេត្តក្រចេះ និងស្ទឹងត្រែង នៃប្រទេសកម្ពុជា។
គួរបញ្ជាក់ជូនថា eDNA គឺជាសំណាកនៃវារីសត្វនៅក្នុងទឹក។ ការពិនិត្យ eDNA អនុញ្ញាតឱ្យអ្នកវិទ្យាសាស្ត្រដឹងថា មានត្រី ឬសត្វកម្រប្រភេទណាខ្លះកំពុងរស់នៅក្នុងតំបន់នោះ ដោយគ្រាន់តែយកសំណាកទឹកទៅវិភាគនៅក្នុងមន្ទីរពិសោធន៍។ បើតាមលោកជំទាវអនុរដ្ឋលេខាធិការ ការអនុវត្តវិធីសាស្ត្រ eDNA នេះ នឹងផ្តល់នូវមូលដ្ឋានទិន្នន័យច្បាស់លាស់ និងលឿនរហ័ស សម្រាប់ប្រទេសនៅតាមដងទន្លេមេគង្គអាចកំណត់តំបន់ការពារជលផលបានចំគោលដៅ។
សូមជម្រាបជូនថា សិក្ខាសាលាថ្នាក់តំបន់នេះ រៀបចំឡើងដោយនាយកដ្ឋានអភិរក្សជលផល នៃអគ្គនាយកដ្ឋានជលផល ក្រោមការគាំទ្រថវិកាពីគម្រោងក្នុងក្របខ័ណ្ឌកិច្ចសហប្រតិបត្តិការមេគង្គ-ឡានឆាង ដោយមានការចូលរួមពី លោកអ៊ុក វិបុល និងលោក ផៃ សុម៉ានី ប្រធាននិងអនុប្រធាននាយកដ្ឋានអភិរក្សជលផល នៃអគ្គនាយកដ្ឋានជលផល មន្ត្រីជំនាញនៃខណ្ឌជលផលខេត្តក្រចេះ និងស្ទឹងត្រែង ក្រុមអ្នកស្រាវជ្រាវជាន់ខ្ពស់មកពីប្រទេសចិន ឡាវ និងមីយ៉ាន់ម៉ា ព្រមទាំងតំណាងមកពីអង្គការ WWF សាកលវិទ្យាល័យភូមិន្ទកសិកម្ម និងសាកលវិទ្យាល័យព្រែកលៀប៕
