ឯកឧត្តមរដ្ឋលេខាធិការ តូច ប៊ុនហួរ និងឯកឧត្តមបណ្ឌិត យ៉ង សាំងកុមារ បានដឹកនាំកិច្ចប្រជុំពិនិត្យ ពិភាក្សាលើការងារសម្របសម្រួលរៀបចំទិន្នន័យដំណាំរយ:ពេលវែង

ចេញ​ផ្សាយ​ ២៩ មេសា ២០២៦ 284

នៅព្រឹកថ្ងៃទី២៩ ខែមេសា ឆ្នាំ២០២៦ ឯកឧត្តម តូច ប៊ុនហួរ និងឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំដើម្បីពិនិត្យ ផ្ទៀងផ្ទាត់ និងធ្វើបច្ចុប្បន្នភាពទិន្នន័យផ្ទៃដីដាំដុះដំណាំស្វាយចន្ទីឱ្យស្របតាមគោលនយោបាយរបស់រាជរដ្ឋាភិបាល ដោយប្រើប្រាស់យន្តការមន្ត្រីកសិកម្មឃុំជាអ្នកប្រមូលទិន្នន័យផ្ទាល់។
កិច្ចប្រជុំនេះ មានការអញ្ជើញចូលរួមពី ឯកឧត្តម ឡឹក សុធារ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងអគ្គនាយកដ្ឋានក្សេត្រសាស្ត្រ និងប្រធាន អនុប្រធាន ថ្នាក់ដឹកនាំ និងមន្ត្រីនៃនាយកដ្ឋានអភិវឌ្ឍន៍ដំណាំរយៈពេលវែង។
ជាកិច្ចចាប់ផ្តើម ឯកឧត្តម តូច ប៊ុនហួរ បានបញ្ជាក់អំពីគោលបំណងនៃកិច្ចប្រជុំនេះ ដើម្បីពង្រឹងការគ្រប់គ្រង កំណត់ឱ្យបានច្បាស់លាស់នូវផ្ទៃដីដាំដុះជាក់ស្តែងតាមខេត្តគោលដៅ ដើម្បីងាយស្រួលក្នុងការគ្រប់គ្រង និងទាញយកទិន្នន័យមកប្រើប្រាស់ឱ្យចំគោលដៅ  ការធ្វើបច្ចុប្បន្នភាពទិន្នន័យតាមបែបវិទ្យាសាស្ត្រ និងគាំទ្រគោលនយោបាយជាតិ បម្រើឱ្យការអនុវត្តយុទ្ធសាស្ត្ររបស់រាជរដ្ឋាភិបាល ដែលបានកំណត់យក «ស្រូវ-អង្ករ និងស្វាយចន្ទី» ជាដំណាំយុទ្ធសាស្ត្រអាទិភាព។
ក្នុងនោះដែរ ឯកឧត្តម យ៉ង សាំងកុមារ ក៏បានផ្តល់ការណែនាំចំនួន៣ចំណុច រួមមាន  ការប្រមូលទិន្នន័យផ្ទៃដី ត្រូវសហការជិតស្និទ្ធជាមួយមន្ត្រីកសិកម្មឃុំ ដើម្បីធានាឱ្យបាននូវទិន្នន័យផ្ទៃដីដាំដុះស្វាយចន្ទីដែលមានភាពច្បាស់លាស់ និងត្រឹមត្រូវ ការវិភាគថ្លៃដើមផលិតកម្ម គឺនាយកដ្ឋានត្រូវរៀបចំទម្រង់ (Template) និងកំណត់គោលបំណងនៃការវិភាគឱ្យបានច្បាស់លាស់ ព្រមទាំងផ្តល់វគ្គបណ្តុះបណ្តាលខ្លីដល់មន្ត្រីកសិកម្មឃុំ និងមន្ត្រីនាយកដ្ឋានផែនការនិងស្ថិតិ ដើម្បីសហការប្រមូលទិន្នន័យថ្លៃដើមឱ្យមានប្រសិទ្ធភាព។ ជាមួយគ្នានេះ ត្រូវតាមដាន និងធ្វើបច្ចុប្បន្នភាពតម្លៃលក់នៅមាត់ច្រក កសិដ្ឋាន (Farm Gate Price) ជាប្រចាំថ្ងៃ ត្រូវរៀបចំផែនការជំរុញផលិតកម្មឱ្យទទួលបានទិន្នផលខ្ពស់ មានគុណភាព និងស្តង់ដារ ព្រមទាំងរៀបចំបង្ហាញការដាំដុះដែលកាត់បន្ថយការប្រើប្រាស់ថ្នាំកសិកម្ម (ដើម្បីចៀសវាងសំណល់គីមី), ការបណ្តុះបណ្តាលគ្រូបង្គោលដល់មន្ត្រីកសិកម្មឃុំ និងការផ្តល់ដំណោះស្រាយបច្ចេកទេសជូនដល់សហគមន៍ឱ្យបានទាន់ពេលវេលា។
ជាចុងបញ្ចប់ ឯកឧត្តម តូច ប៊ុនហួរ បានផ្តល់ការណែនាំបន្ថែមលើការតម្រង់ទិសចំពោះមុខដំណាំអាទិភាពផ្សេងទៀត រួមមាន៖ ដូងក្រអូប ទុរេន ម្រេច និងកាហ្វេ។ ជាពិសេស ត្រូវសិក្សាពិនិត្យតំបន់ដែលមានសក្តានុពលសម្រាប់ដំណាំកាហ្វេ និងជំរុញការធ្វើពិពិធកម្មដំណាំឱ្យកាន់តែសម្បូរបែប៕