ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន ចុះជួបសំណេះសំណាល ពិនិត្យសក្តានុពលដើម្បីផ្តល់ជំនួយគាំទ្រ ដល់សហគមន៍កសិកម្មទំនើប ក្រោមក្របខ័ណ្ឌកិច្ចអន្តរាគមន៍អន្តរវិស័យកសិកម្ម-ទឹក-ជនបទ នៅខេត្តសៀមរាប និងខេត្ដបន្ទាយមានជ័យ
ចេញផ្សាយ ២២ តុលា ២០២៥ 1305
នៅថ្ងៃទី២២ ខែតុលា ឆ្នាំ២០២៥ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម និងឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ ដែលជាសហប្រធាននៃក្រុមការងារត្រី-វិស័យ បានអញ្ជើញដឹកនាំសមាជិក និងក្រុមលេខាធិការដ្ឋានក្រសួងទាំង ៣ ជួបប្រជុំជាមួយប្រធាន អនុប្រធាន និងសមាជិកសមាជិកានៃសហគមន៍កសិកម្មទំនើបចំនួន ២ នៅខេត្តសៀមរាប និងបន្ទាយមានជ័យ។
ជំនួបនេះ ធ្វើឡើងដើម្បីពិនិត្យ និងវាយតម្លៃលើលក្ខណ:សម្បត្តិរបស់សហគមន៍កសិកម្មទាំង២ សម្រាប់ការត្រៀមដាក់បញ្ចូលក្នុងក្របខណ្ឌសហគមន៍កសិកម្មទំនើបត្រី-វិស័យ នៅឆ្នាំ២០២៦ ខាងមុខ។ ការបញ្ចូលក្នុងក្របខ័ណ្ឌថ្មីនេះ សហគមន៍នឹងទទួលបានការគាំទ្របន្ថែមពីក្រសួងទាំង ៣ លើការជំរុញកំណើនផលិតភាពដំណាំកសិកម្ម ការប្រើប្រាស់ធនធានទឹកពហុបំណងប្រកបដោយប្រសិទ្ធភាព និងការគាំទ្រលើហេដ្ឋារចនាសម្ព័ន្ធបំពេញបន្ថែមផ្សេងៗ។
សូមជម្រាបជូនថា សហគមន៍កសិកម្មទំនើបទាំងពីរ គឺទី១ មានឈ្មោះថា សហគមន៍កសិកម្មទំនើបស្វាយចន្ទីភ្នំគូលែន ស្ថិតនៅភូមិអន្លុងធំ ឃុំខ្នងភ្នំ ស្រុកគូលែន ខេត្តសៀមរាប។ សហគមន៍នេះ ត្រូវបានបង្កើតឡើងថ្ងៃទី១៧ ខែកក្កដា ឆ្នាំ២០២៥ មានសមាជិកសរុបចំនួន ១១២ នាក់ (ស្រី ៣១នាក់) និងធ្វើផលិតកម្មដំណាំស្វាយចន្ទី លើផ្ទៃដី ៣៣១ ហិកតា។ សហគមន៍ទី២ មានឈ្មោះថា សហគមន៍កសិកម្មទំនើបដំណាំស្រូវព្រះនេត្រព្រះមានជ័យ ស្ថិតនៅភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។ សហគមន៍នេះដែរ ត្រូវបានបង្កើតឡើងថ្ងៃទី១៨ ខែកក្កដា ឆ្នាំ២០២៥ មានសមាជិកសរុបចំនួន ២៦៤ នាក់ (ស្រី ៧នាក់) និងធ្វើផលិតកម្មដំណាំស្រូវសែនក្រអូប និងស្រូវស្រងែស្រាល លើផ្ទៃដី ២ ៦០៧,៥ ហិកតា ហើយមានស្នាក់ការចំនួន២ទីតាំង។ ទីតាំងទី១ ស្ថិតនៅភ្នំលៀប ឃុំភ្នំលៀប ស្រុកព្រះនេត្រព្រះ ឯទីតាំងទី២ ស្ថិតនៅ ភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ៕
