ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំក្រុមការងារចម្រុះចុះពិនិត្យ បង្ក្រាបទល្មើសជលផល និងប្រជុំផ្សព្វផ្សាយ ពីសារៈសំខាន់ព្រៃលិចទឹក នៅស្រុកតំបែរ ខេត្តត្បូងឃ្មុំ
ចេញផ្សាយ ៥ មីនា ២០២៦ 1714
នៅថ្ងៃទី៥ ខែមីនា ឆ្នាំ២០២៦ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនំាំពីឯកឧត្តមរដ្ឋលេខាធិការ ហាស់ សារ៉េត បានដឹកនាំមន្ត្រីជំនាញមន្ទីរកសិកម្មខេត្តត្បូងឃ្មុំ សហការជាមួយរដ្ឋបាលស្រុកតំបែរ អាជ្ញាធរមូលដ្ឋាន និងគណៈកម្មការសហគមន៍នេសាទបឹងយាយស បានចុះល្បាត ទប់ស្កាត់ និងបង្ក្រាបទល្មើសជលផលនានា និងប្រជុំផ្សព្វផ្សាយពីសារៈសំខាន់ព្រៃលិចទឹក នៅឃុំសេដា ស្រុកតំបែរ ខេត្តត្បូងឃ្មុំ ដែលមានអ្នកចូលរួមសរុប៧៥នាក់ ក្នុងនោះស្រីចំនួន៣២នាក់។
នាដំណើរប្រតិបត្តិការចុះពិនិត្យនោះ ក្រុមការងារជំនាញ ពុំបានជួបប្រទះបទល្មើសនេសាទណាមួយគួរឱ្យសម្គាល់ឡើយ។ ក្រុមការងារបានប្រជុំផ្សព្វផ្សាយ ពីសារៈសំខាន់ព្រៃលិចទឹក ពិភាក្សាពីបញ្ហាប្រឈម ដំណោះស្រាយ និងសំណូមពរ ផ្សព្វផ្សាយពីវិធានការការពារភ្លើងឆេះព្រៃ និងបានលើកទិសដៅតម្រង់ទិសសម្រាប់មន្ត្រីជំនាញ អាជ្ញាធរមូលដ្ឋាន និងគណៈកម្មការសហគមន៍នេសាទអនុវត្តឆ្នាំ២០២៦។
នាឱកាសនោះដែរ ឯកឧត្តម ទឹម បូរក្ស បានអំពាវនាវដល់ប្រជាពលរដ្ឋ ឱ្យចូលរួមថែរក្សាការពារភ្លើងឆេះព្រៃ និងព្រៃលិចទឹកដើម្បីជាជម្រកជីវចម្រុះ ធនធានជលផល បរិស្ថាន របបអាហារ និងចំណូលរបស់ប្រជាពលរដ្ឋ និងហាមពង្រីកកន្ទុយដីស្រែ ចូលទៅក្នុងតំបន់ដីព្រៃលិចទឹក។ ជនប្រព្រឹត្តបទល្មើសព្រៃលិចទឹក នឹងត្រូវបញ្ជូនសំណុំរឿងទៅតុលាការ។ ចំណែកជនបង្កធ្វើឱ្យប៉ះពាល់ ខូចខាតព្រៃលិចទឹក នឹងត្រូវទទួលខុសត្រូវចំពោះមុខច្បាប់។
សូមជម្រាបជូនថា ជំនួបនោះក៏មានការប្រគល់ និងទទួលដោយស្ម័គ្រចិត្ត នូវឧបករណ៍បំផ្លាញចរន្តអគ្គិសនី ឬឧបករណ៍ឆក់ត្រី ពីប្រជាពលរដ្ឋដែលបានយល់ដឹង និងប្រគល់ចំនួន២គ្រឿងតាមរយៈរដ្ឋបាលឃុំសេដា ដើម្បីជូនសមត្ថកិច្ចជំនាញកសាងនីតិវិធីបំផ្លាញចោល។ ឯកឧត្តមគណៈធិបតីបានប្រគល់ប័ណ្ណសរសើរជូនអាជ្ញាធរមូលដ្ឋាន និងគណៈកម្មការសហគមន៍នេសាទបឹងយាយស ដែលមានភាពសកម្ម ចូលរួមក្នុងការទប់ស្កាត់បង្ក្រាបបទល្មើសជលផលនានា និងថែរក្សាការពារព្រៃលិចទឹកនៅក្នុងឆ្នាំ២០២៥ បានយ៉ាងល្អប្រសើរ៕
