ឯកឧត្តមអនុរដ្ឋលេខាធិការ ប៉ែន ផល្លីកា បានអញ្ជើញចុះពិនិត្យសកម្មភាពបទល្មើសនេសាទ និងត្រួតពិនិត្យកន្លែងអភិរក្សជលផលនៅខេត្តកំពង់ឆ្នាំង

ចេញ​ផ្សាយ​ ២៩ មេសា ២០២៦ 3529

នៅថ្ងៃទី២៩ ខែមេសា ឆ្នាំ២០២៦ ឯកឧត្ដម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្ត្រី ឌិត ទីណា  បានអញ្ជើញចុះពិនិត្យសកម្មភាពបទល្មើសនេសាទ និងត្រួតពិនិត្យកន្លែងអភិរក្សជលផលនៅតាមបណ្តាទីតាំងបឹងមួយចំនួននៅក្នុងភូមិសាស្ត្រ ឃុំកំពង់ព្រះគគីរ ស្រុកបរិបូណ៌ ខេត្តកំពង់ឆ្នាំង។ 
ប្រតិបត្តិការនេះអមដំណើរដោយលោក ភួង ទីណា ប្រធាននាយកដ្ឋានអធិការកិច្ចនៃអគ្គនាយកដ្ឋានជលផល លោក តាត សីហាក់ នាយខណ្ឌរដ្ឋបាលជលផលកំពង់ឆ្នាំង សហការជាមួយអធិការដ្ឋានរដ្ឋបាលជលផលខាងត្បូងបឹងទន្លេសាប បានចុះពិនិត្យសកម្មភាពបទល្មើសនេសាទ និងត្រួតពិនិត្យកន្លែងអភិរក្សជលផល។
ក្នុងដំណើរនេះ ឯកឧត្តមអនុរដ្ឋលេខាធិការ បានពិនិត្យជាក់ស្តែងឃើញថា នៅតាមដងទន្លេពុំសង្កេតឃើញមានសកម្មភាពនេសាទដោយឧបករណ៍ល្មើសច្បាប់កើតឡើងនៅក្នុងរង្វង់ភូមិសាស្ត្រដែលបានធ្វើការត្រួតពិនិត្យនោះទេ ចំណែក នៅទីតាំងកន្លែងអភិរក្សជលផលអតីតឡូតិ៍លេខ៦ ក្នុងខេត្តកំពង់ឆ្នាំងពុំបានពិនិត្យឃើញថាមានករណីលបលួចយកឧបករណ៍នេសាទចូលធ្វើនេសាទនៅក្នុងកន្លែងអភិរក្សជលផលឡើយ។ ករណីពិនិត្យបឹងរណ្តំដែលកន្លងមកធ្លាប់លេចឮព័ត៌មានតាមបណ្តាញសង្គមកើតមានបទល្មើសលួចហ៊ុមសម្រាស់ក្រុមការងារពិនិត្យជាក់ស្តែងឃើញថា ពុំមានការដាក់សម្រាស់ក្នុងបឹងនោះទេ (មានតែដុំកំប្លោកមួយចំនួនដែលដុះរាយប៉ាយនៅក្នុងបឹងនោះស្រាប់ហើយពុំមានមែកសម្រាស់បង្កប់នៅខាងក្រោមដុំកំប្លោកនោះទេ) ។
ឯកឧត្តមអនុរដ្ឋលេខាធិការ បានគូសបញ្ជាក់ថា កន្លងមកថ្មីៗនេះ សមត្ថកិច្ចជលផលក៏បានចាត់វិធានការត្រួតពិនិត្យបឹងរណ្តំនេះម្តងរួចមកហើយផងដែរ។ ក្នុងនោះឯកឧត្តមក៏បានជួបណែនាំដល់អ្នកនេសាទមួយចំនួននៅតាមមាត់បឹងឱ្យចូលរួមធ្វើនេសាទដោយឧបករណ៍ស្របច្បាប់ក្នុងករណីពិនិត្យឃើញមានជនល្មើសធ្វើនេសាទខុសច្បាប់សូមរាយការណ៍ទៅសមត្ថកិច្ចជលផលដែលនៅជិតជាបន្ទាន់ដើម្បីមានវិធានការឆ្លើយតប។
ទន្ទឹមនឹងនេះ ឯកឧត្តមក៏បានថ្លែងអរគុណចំពោះបងប្អូនប្រជានេសាទ ចំពោះការគោរពច្បាប់បានល្អ និងឱ្យពួកគាត់ជួយផ្សព្វផ្សាយបន្តដល់អ្នកនេសាទផ្សេងទៀត ដើម្បីជួយទប់ស្កាត់បទល្មើស និងចូលរួមអភិរក្ស ដើម្បីអភិវឌ្ឍន៍ធនធានជលផលក្នុងបឹងទន្លេសាបឱ្យមានចីរភាព។ មុននឹងបញ្ចប់បេសកកម្ម ឯកឧត្តមក៏បានថ្លែងអំណរគុណ និងសូមសរសើរដល់ក្រុមការងារដែលជានិច្ចកាលតែងតែខិតខំប្រឹងប្រែងទប់ស្កាត់បទល្មើសជលផលបានយ៉ាងសកម្មដូចភ្លៀងរលឹម៕