ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកនាំកិច្ចប្រជុំ និងតម្រង់ទិសស្តីពី «ការពង្រឹងការគ្រប់គ្រងសហគមន៍នេសាទ» នៅក្នុងខេត្តកែប
ចេញផ្សាយ ៣ តុលា ២០២៥ 649
នៅថ្ងៃទី៣ ខែតុលា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំ និងតម្រង់ទិស ស្តីពី «ការពង្រឹងការគ្រប់គ្រងសហគមន៍នេសាទ» នៅក្នុងខេត្តកែប និងមានការចូលរួមពី ឯកឧត្តមអនុរដ្ឋលេខាធិការ ទឹម បូរក្ស លោក ហួរ មិថុនា អភិបាលរងខេត្តកែប លោកបណ្ឌិត លាង សុផា ប្រធាននាយកដ្ឋានអភិវឌ្ឍន៍សហគមន៍នេសាទ លោក ថឹង បូរិន ប្រធានមន្ទីរកសិកម្ម ខេត្តកែប ខណ្ឌរដ្ឋបាលជលផលកែប ប្រធាន និងតំណាងអង្គការ WEA FACT DWDCC AEA និងគណៈកម្មការសហគមន៍នេសាទទាំង៥នៅខេត្តកែប ដែលកិច្ចប្រជុំបានធ្វើឡើងនៅសណ្ឋាគារសង្គហមិត្ត ខេត្តកែប។
នាឱកាសនោះ ឯកឧត្តមរដ្ឋលេខាធិការ ហាស់ សារ៉េត បានសម្តែងនូវការកោតសរសើរពីសមិទ្ធផល លទ្ធផលសកម្មភាពការងារដែលសម្រេចបាន ដោយសហគមន៍នេសាទ ក្នុងការចូលរួមគ្រប់គ្រងធនធានធម្មជាតិ ការការពារ ការអភិវឌ្ឍ ការការពារព្រៃកោងកាង និងការដាំកោងកាងឡើងវិញ និងអភិរក្សការធនធានជលផលដែលងាយរងគ្រោះថ្នាក់ ដូចជា ជ្រូកទឹកនៅក្នុងខេត្តកែប។ សហគមន៍នេសាទទាំង៥មាន៖ សហគមន៍នេសាទអង្កោល ភូមិថ្មី អូរក្រសារ កែប និងកំពង់ត្រឡាច។
ទន្ទឹមនឹងនោះដែរ ឯកឧត្តមរដ្ឋលេខាធិការ បានផ្តល់នូវអនុសាសន៍ និងតម្រង់ទិសលើការងារដើម្បីពង្រឹងការគ្រប់គ្រងសហគមន៍នេសាទរួមមាន៖ ការពង្រឹងសមត្ថភាពគណៈកម្មការសហគមន៍ ក្នុងការចូលរួមគ្រប់គ្រងធនធានជលផល ពង្រឹងការចុះល្បាតជាប្រចាំ ដើម្បីការពារបទល្មើសនេសាទកុំឱ្យកើតមាននៅក្នុងមូលដ្ឋាន ការអភិរក្សផ្កាថ្ម និងស្មៅសមុទ្រ ដែលជាកន្លែងរស់នៅដ៏សំខាន់របស់ត្រី និងវារីសត្វដែលរស់នៅក្នុងទឹក។ ផ្តល់សេវាទេសចរណ៍នៅតាមសហគមន៍ក្នុងខេត្តកែប ដែលមានសក្តានុពលភាព និងការរីកចម្រើន។ ឯកឧត្តមក៏បានស្នើសុំបណ្តាអង្គការក្នុងមូលដ្ឋានបន្តកិច្ចសហការជួយគាំទ្រទាំងបច្ចេកទេស និងថវិកាដល់ដំណើរការសហគមន៍នេសាទនៅក្នុងខេត្តកែបផងដែរ៕
