ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ហុង ណារិត និងលោកជំទាវអនុរដ្ឋលេខាធិការ លី សាគីណា អញ្ជើញចុះពិនិត្យវឌ្ឍនភាពនៃការរៀបចំទីតាំងដាំបន្លែ នៅក្រុងសិរីសោភ័ណ្ឌ និងក្រុមផលិតបន្លែអូរសឿ នៅភូមិអូរសឿ ឃុំសឿ ស្រុកមង្គលបុរី ខេត្តបន្ទាយមានជ័យ
ចេញផ្សាយ ១៤ កក្កដា ២០២៥ 1576
នៅថ្ងៃទី១៣ ខែកក្កដា ឆ្នាំ២០២៥ ឯកឧត្តម ហុង ណារិត និងលោកជំទាវ លី សាគីណា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ រួមជាមួយ លោកប្រធាន អនុប្រធាន និងមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ រួមជាមួយក្រុមយុវជន សសយក និងសិស្សវិទ្យាល័យហ៊ុនសែនខ្លាកូន បានចុះពិនិត្យវឌ្ឍនភាពនៃការរៀបចំទីតាំង និងចូលរួមក្នុងសកម្មភាពដាំដុះបន្លែ នៅទីតាំងក្រោយសកលវិទ្យាល័យជាតិមានជ័យ ភូមិបាណយ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
គោលបំណងនៃបេសកកម្មនេះ ដើម្បីពិនិត្យអំពីវឌ្ឍនភាព និងសមត្ថភាពផ្គត់ផ្គង់បន្លែ ដែលជាផ្នែកមួយនៃការគាំទ្រខ្សែច្រវាក់ផ្គត់ផ្គង់ស្បៀងជូនកងទ័ព ដែលកំពុងបំពេញភារកិច្ចការពារទឹកដីនៅតាមបណ្តោយព្រំដែនកម្ពុជា-ថៃ។
នៅកម្មវិធីបន្ទាប់ ឯកឧត្តមអនុរដ្ឋលេខាធិការ និងលោកជំទាវអនុរដ្ឋលេខាធិការ ជាមួយសហការីនៃមន្ទីរកសិកម្ម រុក្ខាប្រមាញ់និងនេសាទ និងមន្ត្រីកសិកម្មឃុំបានចុះពិនិត្យនិងសំណេះសំណាល ជាមួយកសិករនៃក្រុមផលិតបន្លែ នៅភូមិអូរសឿ ឃុំសឿ ស្រុកមង្គលបុរីខេត្តបន្ទាយមានជ័យ ដើម្បីស្វែងយល់ពីចំណុចខ្លាំង បញ្ហាប្រឈម និងពិនិត្យលទ្ធភាពរកដំណោះស្រាយជូនកសិករ ដើម្បីរួមចំណែកបង្កើនប្រសិទ្ធភាពខ្សែច្រវាក់ផលិតកម្មបន្លែ ក្នុងគោលដៅបន្តធានាសន្តិសុខស្បៀង និងការផ្គត់ផ្គង់អាហារដែលមានគុណភាព៕
