ព័ត៌មានផ្សេងៗទៀត
ឯកឧត្តមរដ្ឋលេខាធិការ តូច ប៊ុនហ៊ួរ អញ្ជើញដឹកនាំក្រុមការងារចុះពិនិត្យស្ថានភាពគ្រោះជំនន់ទឹកភ្លៀង ក្នុងស្រុកចំនួន៥ ខេត្តកំពង់ធំ
ចេញផ្សាយ ១៨ មិថុនា ២០២៥ 1150
នៅថ្ងៃទី១៨ ខែមិថុនា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តម សុទ្ធ គឹមកុលមុនី អគ្គលេខាធិការរង នៃគណ:កម្មាធិការគ្រប់គ្រងគ្រោះមហន្តរាយ លោក គង់ គា ប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្ម ក្រុមការងារលេខាធិការដ្ឋានគ្រប់គ្រងគ្រោះមហន្តរាយប្រចាំក្រសួង លោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ និងមន្ត្រីជំនាញ និងអាជ្ញាធរមូលដ្ឋាន បានអញ្ជើញចុះពិនិត្យស្ថានភាពគ្រោះជំនន់ទឹកភ្លៀង ដែលទទួលរងផលប៉ះពាល់លើដំណាំស្រូវ នៅស្រុកប្រាសាទសំបូរ កំពង់ស្វាយ សណ្តាន់ ស្ទោង និងស្រុកសន្ទុក ខេត្តកំពង់ធំ។
តាមការពិនិត្យនិងវាយតម្លៃនៅខេត្តកំពង់ធំ ផ្ទៃដីដែលទទួលរងផលប៉ះពាល់ដំណាំស្រូវសរុប ២ ២១០ ហិកតា ស្មើនឹង ២ ០៨២ គ្រួសារ ក្នុងនោះមាន ទី១.ស្រុកប្រាសាទសំបូរ មាន៥ឃុំ ដែលប៉ះពាល់ដំណាំស្រូវសរុបចំនួន ៤៨៧ ហិកតា រួមមានឃុំឈូក ប៉ះពាល់ដំណាំស្រូវចំនួន ៨០ ហិកតា ឃុំគោលចំនួន ៧០ ហិកតា ឃុំសំបូរចំនួន ៦២ ហិកតា ឃុំស្រើងងចំនួន ២៣ ហិកតា និងឃុំតាំងក្រសៅចំនួន ២៥២ ហិកតា ទី២. ស្រុកកំពង់ស្វាយ មាន៧ឃុំ ដែលប៉ះពាល់ដំណាំស្រូវសរុបចំនួន ១ ១៦៦ ហិកតា រួមមានឃុំកំពង់គោចំនួន ២១៥ ហិកតា ឃុំកំពង់ស្វាយចំនួន ៣៥១ ហិកតា ឃុំសាន់គ ចំនួន១៦៦ ហិកតា ឃុំក្តីដួងចំនួន ៥៥ ហិកតា ឃុំព្រៃគុយចំនួន ១៩៦ ហិកតា ឃុំនីពេជចំនួន ៩០ ហិកតា និងឃុំត្បែងចំនួន ៨៨ ហិកតា ទី៣.ស្រុកសណ្តាន់ មាន២ឃុំ ដែលប៉ះពាល់ដំណាំស្រូវសរុបចំនួន ២២៩ ហិកតា រួមមានឃុំ មានជ័យចំនួន ២០៤ ហិកតា និងឃុំក្លែង ចំនួន ២៥ ហិកតា ទី៤.ស្រុកស្ទោង មាន៥ឃុំ ដែលប៉ះពាល់ដំណាំស្រូវសរុបចំនួន ១៤៦ ហិកតា រួមមានឃុំបន្ទាយស្ទោងចំនួន ៨ ហិកតា ឃុំម្យាក្រងចំនួន ១៣ ហិកតា ឃុំទ្រាចំនួន ៥៧ ហិកតា ឃុំរុងរឿងចំនួន ៥៨ ហិកតា និងឃុំព្រះដំរីចំនួន ១៥ ហិកតា និងទី៥.ស្រុកសន្ទុក មាន១ឃុំ គឺឃុំត្បូងក្រពើ ដែលប៉ះពាល់ដំណាំស្រូវចំនួន ១៨២ ហិកតា។
បើតាមឯកឧត្តមរដ្ឋលេខាធិការ គិតត្រឹមថ្ងៃនេះមានខេត្តចំនួន៥ ដែលកំពុងទទួលរងផលប៉ះពាល់គ្រោះជំនន់ទឹកភ្លៀង រួមមាន៖ ខេត្តតាកែវ ព្រះវិហារ កំពង់ធំ ពោធិ៍សាត់ និងខេត្តបន្ទាយមានជ័យ ដោយមានផ្ទៃដីខូចខាតលើដំណាំស្រូវសរុបចំនួន ៩២៧ ហិកតា ក្នុងខេត្តកំពង់ធំនេះចំនួន ៨១៣ ហិកតា និងខេត្តបន្ទាយមានជ័យចំនួន ១១៤ ហិកតា។
ជារួម ផលប៉ះពាល់ដោយជំនន់ទឹកភ្លៀងដើមរដូវវស្សានេះ ជាប្រភេទស្រូវស្រាលមិនប្រកាន់រដូវ ហើយស្រែភាគច្រើនធ្វើក្នុងអាងស្តុកទឹក និងបឹងធម្មជាតិ ដោយបានដាំដុះតាំងពីចុងខែមីនា និងខែមេសា។ រដូវវស្សាឆ្នាំនេះមានភ្លៀងធ្លាក់ច្រើន ជាពិសេសភ្លៀងបានចាប់តាំងពីខែមេសា ទឹកបឹងកើនឡើងលឿន បណ្តាលឲ្យលិចលង់ស្រូវដំណាក់កាលដាក់គ្រាប់ និងមួយចំនួនបានទុំ ត្រៀមនឹងប្រមូលផល ប៉ុន្តែការលិចលង់មានរយៈពេលយូរថ្ងៃពេក បណ្តាលឲ្យមានការខូចខាតច្រើន។
ក្នុងចំណោមខេត្តដែលរងផលប៉ះពាល់ មានតែខេត្តកំពង់ធំ បានរងផលប៉ះពាល់និងខូចខាតច្រើនជាងគេរហូតដល់ចំនួន ៩៥២ហិកតា។
ជាចុងបញ្ចប់ឯកឧត្តមរដ្ឋលេខាធិការ ក៏បានស្នើដល់អាជ្ញាធរគ្រប់ជាន់ថ្នាក់ និងអង្គភាពពាក់ព័ន្ធត្រូវត្រៀមបង្កាគ្រោះមហន្តរាយដើម្បីឆ្លើយតបរហ័សទៅនឹងគ្រោះមហន្តរាយបានទាន់ពេលវេលា៕
