ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំកិច្ចប្រជុំ ដើម្បីពិនិត្យ ពិភាក្សា និងបូកសរុបរបាយការណ៍វាយតម្លៃការខូចខាតលើវិស័យកសិកម្ម និងផលប៉ះពាល់សន្តិសុខស្បៀង

ចេញ​ផ្សាយ​ ២ មករា ២០២៦ 1414

នៅថ្ងៃទី២ ខែមករា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំដើម្បីពិនិត្យ ពិភាក្សា និងបូកសរុបរបាយការណ៍វាយតម្លៃការខូចខាតលើវិស័យកសិកម្ម និងផលប៉ះពាល់សន្តិសុខស្បៀង នៅទីស្តីការក្រសួងកសិកម្ម រុក្ខាប្រមាញ់ និងនេសាទ។ 
កិច្ចប្រជុំនេះ មានការអញ្ជើញចូលរួមពី ឯកឧត្តម ឃី វិបុលបុត្រា អនុរដ្ឋលេខាធិការ ឯកឧត្តម ស្រ៊ុន សុខុម ទីប្រឹក្សាក្រសួង ឯកឧត្តម សរ ចិត្រា អគ្គលេខាធិការ តំណាងអគ្គនាយកដ្ឋានកសិកម្ម អគ្គនាយកដ្ឋានសុខភាពសត្វ និងផលិតកម្មសត្វ រដ្ឋបាលជលផល លោក ហុក គឹមធួន ប្រធាននាយកដ្ឋានផែនការ និងស្ថិតិ និងសហការី ព្រមទាំងក្រុមការងារលេខាធិការដ្ឋានគ្រប់គ្រងគ្រោះមហន្តរាយប្រចាំក្រសួង។ 
ឯកឧត្តមរដ្ឋលេខាធិការ បានគូសបញ្ជាក់ថា ជម្លោះព្រំដែនរវាងកម្ពុជាថៃលើកទី២ បណ្តាលឱ្យអនុវិស័យជាអាទិ៍  បន្លែ ឈើហូបផ្លែ សត្វ ស្រូវ ពោត ដំឡូងមី និងត្រីនៅក្នុងស្រុកមួយចំនួនក្នុងខេត្តចំនួន៨ រងផលប៉ះពាល់និងខូចខាត រួមមាន ខេត្តបន្ទាយមានជ័យ បាត់ដំបង កោះកុង ព្រះវិហារ ពោធិ៍សាត់ ប៉ៃលិន ឧត្តរមានជ័យ និងខេត្តសៀមរាប។ តាមការវាយតម្លៃបឋមរបស់មន្ទីរកសិកម្ម រុក្ខាប្រមាញ់ និងនេសាទខេត្តទាំង៨ បង្ហាញថាផលប៉ះពាល់នេះមិនបានបង្កបញ្ហាដល់សន្តិសុខស្បៀងក្នុងតំបន់ទាំងនោះក្នុងរយៈពេលខ្លី និងមធ្យមឡើយ។
ជាមួយគ្នានេះ តាមរយៈកិច្ចអន្តរាគមន៍បន្ទាន់ក្រសួងកសិកម្ម រុក្ខាប្រមាញ់ និងនេសាទ ត្រៀមសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ លេខាធិការដ្ឋានប្រព័ន្ធស្បៀងបម្រុងកម្ពុជា និងអាជ្ញាធរមូលដ្ឋាន ព្រមទាំងដៃគូរអភិវឌ្ឍន៍ និងវិស័យឯកជន ដើម្បីស្តារ និងលើកកម្ពស់វិស័យកសិកម្មក្នុងតំបន់រងគ្រោះឡើងវិញ៕