ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញជាអធិបតីភាពក្នុងសិក្ខាសាលាស្តីអំពី «ការផ្តល់សេវាកម្មកសិកម្មរួម (One Stop Service)» ដល់មន្ត្រីកសិកម្មឃុំ ខេត្តព្រៃវែង
ចេញផ្សាយ ១២ កញ្ញា ២០២៥ 320
នៅថ្ងៃទី១០-១១ ខែកញ្ញា ឆ្នាំ២០២៥ ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញជាអធិបតីភាពក្នុងសិក្ខាសាលាស្តីអំពី «ការផ្តល់សេវាកម្មកសិកម្មរួម (One Stop Service)» ដល់មន្ត្រីកសិកម្មឃុំ ខេត្តព្រៃវែង។ សិក្ខាសាលានេះ ក៏មានការអញ្ជើញចូលរួមពី ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម និងនាយកដ្ឋានវិស្វកម្មកសិកម្ម នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ នាយកដ្ឋានសហគមន៍កសិកម្ម មន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង មន្ត្រីកសិកម្មឃុំ ទាំង៩០នាក់ ក្នុងខេត្តព្រៃវែង និងវិស័យឯកជនសរុបចំនួន ១២០នាក់ ដែលធ្វើឡើងនៅមន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង។
សិក្ខាសាលាដែលទទួលបានការគាំទ្រដោយមូលនិធិសហប្រតិបត្តិការអន្តរជាតិអាឡឺម៉ង់(GIZ )មានគោលបំណង ផ្តល់ព័ត៌មានអំពីការផ្តួចផ្តើម ដើម្បីភាពប្រសើរឡើងនូវវិស័យស្រូវអង្ករកម្ពុជា (BRIC) និងការអនុវត្តន៍ជាក់ស្តែង ផ្តល់ព័ត៌មានអំពីគំនិតផ្តួចផ្តើម ការផ្តល់សេវាកសិកម្មរួម ដោយមានកិច្ចសហការរវាង ក្រសួងកសិកម្ម និងដៃគូពាក់ព័ន្ធ សម្របសម្រួលគាំទ្រដោយអង្គការ GIZ។
នាឱកាសនោះ ឯកឧត្តមបណ្ឌិត យ៉ង សាំង កុមារ បានគូសបញ្ជាក់ថា One stop service គឺជាយន្តការសំខាន់នៃការកាត់បន្ថយថ្លៃដើមផលិត ឆ្ពោះទៅបង្កើនប្រាក់ចំណូលរបស់កសិករ លើផលិតកម្មដំណាំស្រូវ។ ការកាត់បន្ថយថ្លៃដើមស្រូវឱ្យថយពីជាង ៦០០រៀលមួយគីឡូក្រាម មកក្រោម៥០០រៀលមួយគីឡូ ដោយរក្សានិងបង្កើនទិន្នផល ក៏ដូចជាការបង្កើនគុណភាពស្រូវជាការខំប្រឹងប្រែងរួមរបស់ក្រសួងកសិកម្ម មន្ទីរកសិកម្ម មន្រ្តីកសិកម្មឃុំ កសិករ វិស័យឯកជន (Seed and Feed)និងអង្គការ GIZ ដើម្បីជួយបង្កើនប្រាក់ចំណូលដល់កសិករ និងសេដ្ឋកិច្ចនៅក្នុងខេត្តព្រៃវែង៕
