ព័ត៌មានផ្សេងៗទៀត
និស្សិតកសិកម្មប្រកួតវោហារកោសល្យលើប្រធានបទពាក់ព័ន្ធនឹងការប្រយុទ្ធនឹងជំងឺអេដស៍
ចេញផ្សាយ ១៤ សីហា ២០២៦ 3010
នាព្រឹកថ្ងៃសុក្រទី១៤ ខែសីហា ឆ្នាំ២០២៦ ក្រុមនិស្សិតនៃគ្រឹះស្ថានឧត្តមសិក្សាកសិកម្មទាំង៣ រួមមាន សាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្ម កំពង់ចាម បានចូលរួមប្រកួតប្រជែងវោហារកោសល្យលេីប្រធានបទពាក់ព័ន្ធនឹងការប្រយុទ្ធនឹងជំងែអេដស៍ នៅសាកលវិទ្យាល័យភូមិន្ទកសិកម្មចម្ការដូង ក្រោមអធិបតីភាព ឯកឧត្តមរដ្ឋលេខាធិការ គង់ ច័ន្ទវាសនា និងឯកឧត្តមអគ្គលេខាធិការ ឈឹម ឃិនដារ៉េត និងមានការចូលរួមពីថ្នាក់ដឹកនាំក្រសួង អគ្គលេខាធិការដ្ឋាននៃអាជ្ញាធរជាតិ និងគ្រឹះស្ថានឧត្តមសិក្សាកសិកម្មទាំងបី ព្រមទាំងនិស្សិតច្រេីនកុះករសរុបជាង ៧០០នាក់។
កម្មវិធីនេះ ត្រូវបានរៀបចំឡេីងដោយគណៈកម្មាធិការប្រយុទ្ធនឹងជំងឺអេដស៍ប្រចាំក្រសួងកសិកម្ម រុក្ខាប្រមាញ់ និងនេសាទ ក្រោមកិច្ចសហការជាមួយអគ្គលេខាធិការដ្ឋាននៃអាជ្ញាធរជាតិប្រយុទ្ធនឹងជំងឺអេដស៍ ក្នុងគោលបំណងប្រេីប្រាស់សម្លេង និងការចូលរួមរបស់ក្រុមនិស្សិត ក្នុងការអប់រំ ផ្សព្វផ្សាយ បង្ការ និងទប់ស្កាត់ការឆ្លងមេរោគអេដស៍ក្នុងចំណោមយុវជន ក៏ដូចជា ផ្តល់ឱកាសដល់និស្សិតក្នុងការបង្ហាញសមត្ថភាព និងវោហារសាស្ត្រ តាមរយៈការស្រាវជ្រាវ ការធ្វេីការជាក្រុម និងការឡេីងធ្វេីបទបង្ហាញលេីប្រធានបទពាក់ព័ន្ធនឹងជំងឺអេសដ៍។
សូមជម្រាបជូនថា ក្រោមការដឹកនាំ និងការតម្រង់ទិសរបស់ឯកឧត្តមរដ្ឋមន្ត្រី ឌិត ទីណា គណ:កម្មាធិការប្រយុទ្ធនឹងជំងឺអេដស៍របស់ក្រសួង បានអនុវត្តសកម្មភាពជាបន្តបន្ទាប់ ដេីម្បីផ្សព្វផ្សាយដល់មន្ត្រីរាជការ និងនិស្សិតកសិកម្ម ព្រមទាំងប្រជាពលរដ្ឋមូលដ្ឋាន និងប្រជាសហគមន៍ផងដែរ ឱ្យមានការយល់ដឹងត្រឹមត្រូវ និងសុីជម្រៅអំពីហានិភ័យនៃជំងឺអេដស៍ សំដៅចូលរួមជាមួយអាជ្ញាធរជាតិប្រយុទ្ធនឹងជំងឺអេដស៍ ក្នុងការអប់រំ ផ្សព្វផ្សាយ បង្ការ និងទប់ស្កាត់ការឆ្លងមេរោគអេដស៍ និងប្រយុទ្ធប្រឆាំងនឹងការរេីសអេីងចំពោះអ្នកផ្ទុកមេរោគអេដស៍ សំដៅជំរុញអនុវត្តគោលនយោបាយជាតិបញ្ចប់ជំងឺអេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ របស់រាជរដ្ឋាភិបាលឱ្យកាន់តែមានប្រសិទ្ធភាព និងសម្រេចបានជោគជ័យតាមផែនការគ្រោងទុក។
ក្នុងនាមអាជ្ញាធរជាតិប្រយុទ្ធនឹងជំងឺអេដស៍ ឯកឧត្តមអគ្គលេខាធិការ ឈឹម ឃិនដារ៉េត បានវាយតម្លៃខ្ពស់ចំពោះកិច្ចខិតខំប្រឹងប្រែង និងកិច្ចសហការល្អរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការចូលរួមប្រយុទ្ធនឹងជំងឺអេដស៍ និងកោតសរសេីរចំពោះភាពក្លាហាន សមត្ថភាព និងទេពកោសល្យរបស់ក្រុមយុវនិស្សិតកសិកម្មនៃគ្រឹះស្ថានទាំងបី ដែលបានចូលរួមកម្មវិធីប្រកួតវោហារកោសល្យនេះ។
ក្នុងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋលេខាធិការ គង់ ច័ន្ទវាសនា បានថ្លែងនូវការកោតសរសេីរ និងវាយតម្លៃខ្ពស់ចំពោះគណ:គ្រប់គ្រង និងក្រុមនិស្សិតនៃគ្រឹះស្ថានឧត្តមសិក្សាទាំងបី ដែលបានចូលរួមរៀបចំ និងប្រកួតប្រជែងសមត្ថភាពវោហារសាស្ត្រលេីប្រធានបទអំពីជំងឺអេដស៍។ ឯកឧត្តមបានផ្តាំផ្ញេី និងលេីកទឹកចិត្តដល់និស្សិតទាំងអស់ឱ្យផ្ចង់អារម្មណ៍លេីការសិក្សា និងការពារខ្លួនពីការឆ្លងមេរោគអេដស៍ តាមរយ:ការគោរពឱ្យបានខ្ជាប់ខ្ជួននូវប្រពៃណីទំនៀមទម្លាប់ដ៏ល្អផូរផង់របស់សង្គមខ្មែរ ក៏ដូចជា ការគោរពច្បាប់ចរាចរណ៍ និងការនៅឆ្ងាយពីគ្រឿងញៀន ដេីម្បីបន្តកសាងខ្លួនជា កូនល្អ និស្សិតល្អ ពលរដ្ឋល្អ និងទំពាំងស្នងឫស្សីល្អ សម្រាប់សង្គមជាតិ។
ក្រោយការវាយតម្លៃ គណ:អធិបតីបានផ្តល់រង្វាន់លេីកទឹកចិត្តដល់ក្រុមនិស្សិតនៃគ្រឹះស្ថានឧត្តមសិក្សាកសិកម្មទាំងបី ដោយក្នុងនោះ ក្រុមជ័យលាភីលេខ១ មកពីវិទ្យាស្ថានជាតិកសិកម្ម កំពង់ចាម ទទួលបានថវិកាចំនួន ២លានរៀល និង២ក្រុមទៀត ទទួលបានថវិកាចំនួន ១លានរៀលៗ ហេីយដោយឡែក ក្រុមនិស្សិតមកពីវិទ្យាស្ថានកសិកម្មព្រែកលៀប ដែលសម្តែងល្ខោននិយាយលេីប្រធានបទ ពន្លឺនៃក្តីសង្ឃឹម ទទួលបានថវិកាលេីកទឹកចិត្តចំនួន ៥០មុឺនរៀលផងដែរ៕
