ព័ត៌មានផ្សេងៗទៀត
ឯកឧត្ដមអនុរដ្ឋលេខាធិការ ទឹម បូរក្ស ដឹកនាំក្រុមការងារចុះស្រាវជ្រាវ ត្រួតពិនិត្យ ទប់ស្កាត់និងបង្ក្រាបបទល្មើសជលផល នៅចំណុចព្រែកផ្លូវក្របី ភូមិព្រៃកន្លោង ខេត្តព្រៃវែង
ចេញផ្សាយ ៤ ធ្នូ ២០២៥ 1109
នៅថ្ងៃទី៤ ខែធ្នូ ឆ្នាំ២០២៥ ឯកឧត្ដម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំពី ឯកឧត្តមរដ្ឋលេខាធិការ ហាស់ សារ៉េត ដោយមានការចូលរួមពី លោក ងិន សុខ នាយខណ្ឌរដ្ឋបាលជលផល នៃខណ្ឌរដ្ឋបាលជលផលព្រៃវែង ដោយបានប្រើកម្លាំងសរុប ១៥នាក់ ប្រើប្រាស់កាណូតចំនួន២គ្រឿង ដើម្បីចុះស្រាវជ្រាវ ត្រួតពិនិត្យ ទប់ស្កាត់និងបង្ក្រាបបទល្មើសជលផល នៅចំណុចព្រែកផ្លូវក្របី ភូមិព្រៃកន្លោង ឃុំព្រៃកន្លោង ស្រុកពោធិ៍រៀង ខេត្តព្រៃវែង។
ក្នុងដំណើរនេះ ក្រុមការងារបាន រុះរើបំផ្លាញចោលឧបករណ៍ល្មើសច្បាប់នៅនឹងកន្លែងនេសាទ រួមមាន លូស្បៃមុងចំនួន ២៩មាត់ របាំងព្រួលស្បៃមុងប្រវែង ១៨៦០ម៉ែត្រ បង្គោលចម្រឹងឬស្សីចំនួន៤៤៥ដើម និងចាក់លែងត្រីចម្រុះទម្ងន់៤០គីឡូក្រាម ទៅក្នុងដែនធម្មជាតិវិញ។
ជាចុងបញ្ចប់ ឯកឧត្ដមអនុរដ្ឋលេខាធិការ បានគូសបញ្ជាក់ថា ក្រុមការងារនឹងបន្តត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តាលស្រុកក្នុងខេត្តព្រៃវែង និងផ្សព្វផ្សាយដល់ប្រជានេសាទឈប់នេសាទដោយប្រើប្រាស់ឧបករណ៍ល្មើសច្បាប់៕
