ព័ត៌មានផ្សេងៗទៀត
ឯកឧត្តមបណ្ឌិត យ៉ង់ សាំងកុមារ ដឹកនាំកិច្ចប្រជុំពិនិត្យផែនការសកម្មភាពនិងវឌ្ឍនភាពនៃការអនុវត្តការងារ របស់នាយកដ្ឋានផ្សព្វផ្សាយ
ចេញផ្សាយ ១០ វិច្ឆិកា ២០២៦ 307
នាថ្ងៃអង្គារ ទី១០ ខែវិច្ឆិកា ឆ្នាំ២០២៦ នៅទីស្តីការក្រសួងកសិកម្ម ឯកឧត្តម បណ្ឌិត យ៉ង់ សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំពិនិត្យវឌ្ឍនភាពការងាររបស់នាយកដ្ឋានផ្សព្វផ្សាយ ពង្រឹងលើកិច្ចតម្រង់ទិស ការអនុវត្តការងាររបស់មន្ត្រីកសិកម្មឃុំ ដោយមានការចូលរួមពីទីប្រឹក្សាក្រសួង ថ្នាក់ដឹកនាំនាយកដ្ឋាន និងមន្ត្រីជំនាញពាក់ព័ន្ធជាច្រើនរូប។
កិច្ចប្រជុំនេះមានគោលបំណងពិនិត្យ និងវាយតម្លៃលទ្ធផលការងាររបស់មន្ត្រីកសិកម្មឃុំដែលសម្រេចបានក្នុងខែកន្លងមក ព្រមទាំងពិនិត្យឡើងវិញនូវផែនការសកម្មភាព និងវឌ្ឍនភាពនៃការអនុវត្តការងាររបស់អង្គភាពផងដែរ។ ជាមួយគ្នានេះ អង្គប្រជុំបានពិភាក្សាផ្តោតទៅលើការតម្រង់ទិសដល់មន្រ្តីកសិកម្ម ឃុំ-សង្កាត់ បញ្ហាប្រឈម និងការលំបាកនានា ដើម្បីកំណត់យន្តការដោះស្រាយឱ្យបានសមស្រប សំដៅពង្រឹងការគ្រប់គ្រង និងបង្កើនប្រសិទ្ធភាពនៃការបំពេញការងារ។
ក្នុងឱកាសនោះ ឯកឧត្តមរដ្ឋលេខាធិការ បានណែនាំឱ្យថ្នាក់ដឹកនាំ និងមន្ត្រីជំនាញបន្តពង្រឹងកិច្ចសហការ សាមគ្គីភាព និងការទទួលខុសត្រូវក្នុងការបំពេញតួនាទីភារកិច្ចរៀងៗខ្លួន ព្រមទាំងខិតខំអនុវត្តផែនការសកម្មភាពឆ្នាំ២០២៦ ឱ្យសម្រេចបានតាមគោលដៅ និងត្រៀមរៀបចំទិសដៅការងារឆ្នាំ២០២៧ ឱ្យកាន់តែមានភាពច្បាស់លាស់ និងប្រសិទ្ធភាព ស្របតាមទិសដៅអភិវឌ្ឍវិស័យកសិកម្មរបស់ក្រសួង៕
