ព័ត៌មានផ្សេងៗទៀត
ឯកឧត្ដមបណ្ឌិត រដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារជំនាញប្រជុំពិភាក្សាអំពី«ប្រភេទនិងបរិមាណតម្រូវការបន្លែ និងលទ្ធភាពផ្គត់ផ្គង់បន្លែក្នុងស្រុក»
ចេញផ្សាយ ២៧ វិច្ឆិកា ២០២៥ 1222
នៅថ្ងៃទី២៦ ខែវិច្ឆិកា ឆ្នាំ២០២៥ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំពិភាក្សា «អំពីប្រភេទនិងបរិមាណតម្រូវការបន្លែ និងលទ្ធភាពផ្គត់ផ្គង់បន្លែក្នុងស្រុក ទល់នឹងបរិមាណបន្លែនាំចូល» ។
កិច្ចប្រជុំធ្វើឡើងនៅអគ្គនាយកដ្ឋានកសិកម្ម មានការចូលរួមពីឯកឧត្ដមអនុរដ្ឋលេខាធិការទទួលបន្ទុកដំណាំសាវប្បកម្មទាំង២រូប លោកអគ្គនាយករង ទទួលបន្ទុក លោក លោកស្រី ថ្នាក់ដឹកនាំ និងតំណាងមកពីនាយកដ្ឋានពាក់ព័ន្ធក្រោមឱវាទអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ។
គោលបំណងនៃកិច្ចពិភាក្សាដើម្បីរៀបចំផែនការគ្រប់គ្រងច្បាស់លាស់ គាំទ្រផលិតកម្មបន្លែក្នុងស្រុកឱ្យបានពេញមួយឆ្នាំ និងបង្ហាញពីការប្តេជ្ញាចិត្តក្នុងការធានាឱ្យបន្លៃមានគុណភាព និងសុវត្ថិភាព កាត់បន្ថយការពឹងផ្អែកលើបន្លែនាំចូលតាមរយៈការលើកកម្ពស់ផលិតកម្មក្នុងស្រុក។
ឯកឧត្តមបណ្ឌិត ហ៊ាន វណ្ណហន បានដាក់ចេញនូវវិធានការសំខាន់ៗមួយចំនួន មាន៖ ពង្រឹងការស្តារ និងអភិវឌ្ឍន៍ស្ថានីយ៍ស្រាវជ្រាវពូជបន្លែ អភិវឌ្ឍន៍ហេដ្ឋារចនាសម្ព័ន្ធស្រោចស្រព និងបណ្តុះបណ្តាលបច្ចេកទេសដល់កសិករ ជំរុញការបង្កើតសហគមន៍កសិកម្មទំនើប និងសហវិនិយោគ។ កំណត់តំបន់ដាំដុះបន្លែសមស្របតាមតំបន់ក្សេត្របរិស្ថាន ផលិតបន្លែតាមស្តង់ដារសុវត្ថិភាព (CAM-GAP, PGS) និងចងកិច្ចសន្យាផ្គត់ផ្គង់ និងផ្តល់ព័ត៌មានទីផ្សារទៀងទាត់។
ជាចុងបញ្ចប់ ឯកឧត្តមបណ្ឌិតបញ្ជាក់ទៀតថា ជាមួយគ្នានេះដែរការពង្រឹងសមត្ថភាពមន្ត្រីកសិកម្មឃុំ លើផ្នែកដំណាំសាកវប្បកម្ម គឺមានសារៈសំខាន់ ដើម្បីឱ្យមន្រ្តីកសិកម្មឃុំក្លាយជាសេនាធិការដ៏សំខាន់នៅមូលដ្ឋានជួយពលរដ្ឋលើការងារនេះ៕
