ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងាររាជរដ្ឋាភិបាលចុះមូលដ្ឋានស្រុកវ៉ារិន ខេត្តសៀមរាប ប្រជុំពិភាក្សាអំពីការរៀបចំវេទិកាសាធារណៈ និងការងារជំរុញអភិវឌ្ឍន៍វិស័យកសិកម្ម
ចេញផ្សាយ ២១ កុម្ភៈ ២០២៦ 1126
នៅថ្ងៃទី២០ ខែកុម្ភៈ ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋាន ស្រុកវ៉ារិន ខេត្តសៀមរាប បានដឹកនាំកិច្ចប្រជុំជាមួយក្រុមការងារស្រុកវ៉ារិន ដើម្បីប្រជុំពិភាក្សាអំពីការងាររៀបចំវេទិកាសាធារណៈ និងការងារជំរុញអភិវឌ្ឍន៍វិស័យកសិកម្ម។
កិច្ចប្រជុំនេះមានការចូលរួមពី លោកប្រធានក្រុមប្រឹក្សាស្រុក លោកអភិបាលនៃគណៈអភិបាលស្រុកវ៉ារិន ខេត្តសៀមរាប លោកប្រធានការិយាល័យកសិកម្ម ធនធានធម្មជាតិនិងបរិស្ថានស្រុក មន្ត្រីកសិកម្មឃុំ លោកស្រីមេឃុំ មេភូមិ និងប្រជាពលរដ្ឋមូលដ្ឋាន សរុបអ្នកចូលរួម៤៩នាក់។
កិច្ចពិភាក្សាបានលើកឡើងនូវចំណុចមួយចំនួនមានដូចជា៖ ទី១. ការរៀបចំវេទិកាសាធារណៈដើម្បីស្តាប់កង្វល់ និងសំណូមពររបស់ប្រជាពលរដ្ឋក្នុងឃុំវ៉ារិន ទី២. គម្រោងសម្ពោធដាក់ឱ្យប្រើប្រាស់ផ្ទាំងប៉ាណូសម្គាល់ព្រំប្រទល់ស្រុកវ៉ារិន និង ទី៣. ផែនការដាំផ្កាឈូករ័ត្ន សម្រាប់បង្កើនប្រាក់ចំណូលប្រជាពលរដ្ឋ កាត់បន្ថយចំណាកស្រុក។
នាឱកាសនោះ ឯកឧត្តមរដ្ឋលេខាធិការ ឃុន សាវឿន បានណែនាំឱ្យអាជ្ញាធរមូលដ្ឋានស្រុកវ៉ារិន បន្តបង្កើនការជំរុញ និងលើកកម្ពស់គុណភាពសេវាសាធារណៈឱ្យកាន់តែល្អ និងអភិវឌ្ឍន៍មូលដ្ឋានរបស់ខ្លួន ដើម្បីជួយសម្រួលដល់ប្រជាពលរដ្ឋក្នុងមូលដ្ឋានឱ្យទទួលបានការបម្រើសេវាឱ្យកាន់តែប្រសើរ៕
