ព័ត៌មានផ្សេងៗទៀត
ឯកឧត្តម គង់ ច័ន្ទវាសនា អញ្ជើញចូលរួមកិច្ចប្រជុំក្រុមការងាររៀបចំទិន្នន័យកសាងផែនការប្រើប្រាស់ដីថ្នាក់ឃុំ-សង្កាត់ជុំវិញបឹងទន្លេសាប ក្នុងភូមិសាស្ត្រខេត្តកំពង់ធំ
ចេញផ្សាយ ១៣ មីនា ២០២៦ 2700
នាព្រឹកថ្ងៃទី១៣ ខែមីនា ឆ្នាំ២០២៦ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារអគ្គនាយកដ្ឋានជលផល និងមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ចូលរួមកិច្ចប្រជុំពិភាក្សាអំពីការរៀបចំទិន្នន័យកសាងផែនការប្រើប្រាស់ដីថ្នាក់ឃុំ-សង្កាត់ជុំវិញបឹងទន្លេសាប ក្នុងភូមិសាស្ត្រខេត្តកំពង់ធំ ក្រោមអធិបតីភាព ឯកឧត្តម តឹករ៉េត សំរេច រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅសាលាខេត្តកំពង់ធំ ដោយមានការចូលរួមពីថ្នាក់ដឹកនាំក្រសួង-ស្ថាប័ននានា រដ្ឋបាលខេត្ត មន្ទីរ-អង្គភាពពាក់ព័ន្ធ ព្រមទាំងរដ្ឋបាលស្រុក-ឃុំក្នុងខេត្តកំពង់ធំ។
ឯកឧត្តម តឹករ៉េត សំរេច ប្រធានអង្គប្រជុំ បានបញ្ជាក់ថា គោលបំណងនៃកិច្ចប្រជុំនេះ គឺដើម្បីប្រមូលទិន្នន័យ និងឈានទៅកំណត់លក្ខណ្ឌនៃការប្រើប្រាស់ដីនៅតាមឃុំ-សង្កាត់ជុំវិញបឹងទន្លេសាប ដោយផ្អែកលើសក្កានុពលដែលមាន សម្រាប់ការរៀបចំផែនការអភិវឌ្ឍមូលដ្ឋាន ការលើកកម្ពស់ជីវភាពប្រជាពលរដ្ឋ និងការកាត់បន្ថយសម្ពាធមកលេីបឹងទន្លេសាប។
ឯកឧត្តម គង់ ច័ន្ទវាសនា តំណាងក្រសួងកសិកម្ម រុក្ខាប្រមាញ់ និងនេសាទ បានថ្លែងនូវការគាំទ្រចំពោះកិច្ចការដ៏សំខាន់នេះ និងបានលើកឡើងពីកិច្ចខិតខំប្រឹងប្រែងរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការជំរុញការអភិវឌ្ឍវិស័យកសិកម្មដើម្បីធានាសន្តិសុខស្បៀង លើកកម្ពស់ជីវភាពប្រជាកសិករ និងចូលរួមទ្រទ្រង់កំណើនសេដ្ឋកិច្ច ជាពិសេស ការអនុវត្តកម្មវិធីគោលនយោបាយអាទិភាពទី៥ និងទី៦ រួមមាន យន្តការរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប ដើម្បីជួយគាំទ្រដល់បងប្អូនប្រជាកសិករ។
ទន្ទឹមនឹងការគិតគូរអំពីវិស័យកសិកម្ម ឯកឧត្តមក៏បានស្នើឱ្យអង្គប្រជុំយកចិត្តទុកដាក់ដល់ការជំរុញវិស័យផ្សេងៗទៀតផងដែរ ដូចជាកសិ-ឧស្សាហកម្ម, ឧស្សាហកម្ម, ទេសចរណ៍ជាដើម។ ល។ ដែលនឹងបង្កើតទីផ្សារបន្ថែមសម្រាប់កសិកផលក្នុងស្រុក, បង្កើតការងារ, បង្កើនតម្លៃបន្ថែម និងបង្កើនប្រាក់ចំណូលប្រជាពលរដ្ឋមូលដ្ឋាន សំដៅបង្កើនល្បឿននៃការឈានទៅសម្រេចបាននូវចក្ខុវិស័យប្រែក្លាយកម្ពុជាជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងប្រទេសចំណូលខ្ពស់ នៅឆ្នាំ២០៥០៕
