ព័ត៌មានផ្សេងៗទៀត
ក្រសួងកសិកម្ម រុក្ខាប្រមាញ់ និងនេសាទណែនាំឱ្យអង្គភាពជំនាញ និងមន្ទីររាជធានី-ខេត្តបង្កេីនសកម្មភាពអធិការកិច្ចជី និងថ្នាំកសិកម្ម
ចេញផ្សាយ ៣០ មិថុនា ២០២៦ 4667
នៅថ្ងៃទី២៩-៣០ ខែមិថុនា ឆ្នាំ២០២៦ ក្រសួងកសិកម្ម រុក្ខាប្រមាញ់ និងនេសាទ បានរៀបចំសិក្ខាសាលាពង្រឹងសមត្ថភាពមន្ត្រីអធិការកិច្ចលើការគ្រប់គ្រងជី និងថ្នាំកសិកម្ម នៅទីស្តីការក្រសួង ដែលពិធីបេីកស្ថិតក្រោមអធិបតីភាព ឯកឧត្តម ងិន ឆាយ អគ្គនាយកនៃអគ្គនាយកដ្ឋានក្សេត្រសាស្ត្រ និងពិធីបិទក្រោមអធិបតីភាពឯកឧត្តម គង់ ច័ន្ទវាសនា រដ្ឋលេខាធិការទទួលបន្ទុកធាតុចូលកសិកម្ម ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធចំនួន១០០នាក់។
សិក្ខាសាលារយ:ពេល២ថ្ងៃនេះមានគោលបំណងបង្កេីនចំណេះដឹង និងពង្រឹងសមត្ថភាពរបស់មន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទទាំង២៥រាជធានី-ខេត្តលេីការងារគ្រប់គ្រងជី និងថ្នាំកសិកម្ម, ពិភាក្សាអំពីបញ្ហាប្រឈមដេីម្បីរកដំណោះស្រាយ, និងកំណត់ផែនការសកម្មភាពដែលត្រូវអនុវត្តបន្ត ដេីម្បីបង្កេីនប្រសិទ្ធភាពការងារ ដោយផ្តោតលេីការពង្រឹងការងារអធិការកិច្ចជី និងថ្នាំកសិកម្ម។
ឯកឧត្តមរដ្ឋលេខាធិការ គង់ ច័ន្ទវាសនា បានកោតសរសើរចំពោះថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានក្សេត្រសាស្ត្រ មន្ទីរកសិកម្ម និងការិយាល័យនីតិកម្មកសិកម្មរាជធានី-ខេត្ត ដែលបំពេញការងារប្រកបដោយការទទួលខុសត្រូវខ្ពស់ និងសម្រេចបានលទ្ធផលល្អប្រសើរលើការគ្រប់គ្រងជី និងថ្នាំកសិកម្ម ក្នុងរយ:ពេល៣ឆ្នាំកន្លងមកនេះ ក្រោយក្រសួងបានកែសម្រួលភារកិច្ចអង្គភាពទទួលបន្ទុកគ្រប់គ្រងជី និងថ្នាំកសិកម្ម។ សកម្មភាពទាំងនេះរួមមាន ការធ្វើបច្ចុប្បន្នភាពឯកសារបណ្តុះបណ្តាលសម្រាប់អាជីវករដេប៉ូជី និងថ្នាំកសិកម្ម, ការកែសម្រួល និងបន្ថែមខ្លឹមសារចាំបាច់ទៅក្នុងលិខិតបទដ្ឋានគតិយុត្តិពាក់ព័ន្ធឱ្យស្របទៅនឹងស្ថានការបច្ចុប្បន្ន, ការពង្រឹងការងារអធិការកិច្ចនៅតាមរាជធានី-ខេត្ត ដេីម្បីទប់ស្កាត់ការនាំចូល និងការដាក់លក់ផលិតផលខុសច្បាប់ គ្មានបញ្ជិកា, ការចុះយកសំណាកជី និងថ្នាំកសិកម្មដេីម្បីត្រួតពិនិត្យគុណភាព, ការទប់ស្កាត់ការផ្សព្វផ្សាយលក់ផលិតផលខុសច្បាប់ គ្មានបញ្ជិកាតាមបណ្តាញសង្គម, និងការផ្តល់ការគាំទ្រចាំបាច់ដល់ការផលិតជីក្នុងស្រុក ដែលទាំងអស់នេះពិតជាឆ្លេីយតបទៅនឹងកំណែទម្រង់ដែលបានដាក់ចេញ ក្រោមការដឹកនាំដ៏មុតស្រួច និងឈ្លាសវៃរបស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ឯកឧត្តមក៏បានថ្លែងអំណរគុណដល់ថ្នាក់ដឹកនាំ និងមន្ត្រីនៃនាយកដ្ឋាននីតិកម្មកសិកម្មផងដែរ ដែលបានដឹកនាំកសាងច្បាប់ និងលិខិតបទដ្ឋានគតិយុត្តិជាច្រេីនពីមុនមក ដែលជាមូលដ្ឋានគ្រឹះសម្រាប់ការអនុវត្តការងារគ្រប់គ្រងជី និងថ្នាំកសិកម្ម រហូតមកដល់បច្ចុប្បន្ន។
ឯកឧត្តមបានសង្កត់ធ្ងន់ថា ជោគជ័យនៃអនុវិស័យដំណាំដែលសម្រេចបានផលិតកម្មរាប់លានតោនក្នុងមួយឆ្នាំៗ ជាមួយនឹងការធានាបានសន្តិសុខស្បៀង និងការនាំចេញកសិផលរាប់លានតោនទៅបរទេស ក៏មានការរួមចំណែកយ៉ាងសំខាន់នៃការគ្រប់គ្រងជី និងថ្នាំកសិកម្មដែរ តាមរយៈការធានាបាននូវការផ្គត់ផ្គង់ជី និងថ្នាំកសិកម្ម ឱ្យបានគ្រប់គ្រាន់ ទាន់ពេលវេលា ក្នុងតម្លៃប្រកួតប្រជែង និងប្រកបដោយគុណភាព ដល់គ្រប់ទិសទីនៅទូទាំងប្រទេស ដែលជួយបង្កើនផលិតភាព និងប្រសិទ្ធភាពនៃការដាំដុះ។
ជាទីបញ្ចប់ ឯកឧត្តមរដ្ឋលេខាធិការបានណែនាំឱ្យអង្គភាពជំនាញ និងមន្ទីរកសិកម្មទូទាំងប្រទេស បន្តពង្រឹងការគ្រប់គ្រងជី និងថ្នាំកសិកម្មឱ្យកាន់តែមានប្រសិទ្ធភាព តាមរយ:ការលេីកកម្ពស់សេវាសាធារណៈគាំទ្រដល់ក្រុមហ៊ុន, ការគាំទ្រដល់ក្រុមហ៊ុន និងសិប្បកម្មផលិតជីក្នុងស្រុក, ការបង្កេីនសកម្មភាពអធិការកិច្ចទប់ស្កាត់ការនាំចូល និងចរាចរណ៍ផលិតផលខុសច្បាប់ គ្មានបញ្ជិកា, ការចុះយកសំណាកផលិតផលមកត្រួតពិនិត្យគុណភាព និងការអប់រំណែនាំ និងអនុវត្តច្បាប់លេីផេកដែលផ្សាយលក់ផលិតផលខុសច្បាប់ គ្មានបញ្ជិកាលេីបណ្តាញសង្គម ដេីម្បីជាប្រយោជន៍ដល់បងប្អូនប្រជាកសិករ និងវិស័យកសិកម្មកម្ពុជា៕
