ឯកឧត្តមបណ្ឌិត ហ៊ាន វណ្ណហន អញ្ជើញដឹកនាំទស្សនកិច្ចសិក្សាលើផលិតកម្មដំណាំបន្លែវៃឆ្លាតធន់នឹងអាកាសធាតុ (Climate-Smart Agriculture)

ចេញ​ផ្សាយ​ ៩ កុម្ភៈ ២០២៦ 2634

នៅថ្ងៃទី៨ ខែកុម្ភ: ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងកែលម្អសន្តិសុខទឹកកម្ពុជា (CaWSIP) បានដឹកនាំក្រុមការងារថ្នាក់ជាតិ ថ្នាក់ខេត្ត តំណាងសហគមន៍កសិកម្ម និងកសិករគំរូតាមបណ្តាខេត្ដគោលដៅគម្រោង មាន ខេត្ដក្រចេះ មណ្ឌលគិរី កំពង់ធំ និងខេត្ដព្រះវិហារ ចុះទស្សនកិច្ចសិក្សាផលិតកម្មដំណាំបន្លែវៃឆ្លាតធន់នឹងអាកាសធាតុនៅសហគមន៍អភិវឌ្ឍន៍កសិកម្មទឹកហូតមានជ័យក្តីសង្ឃឹម ស្ថិតនៅស្រុកទឹកហូត ខេត្ដកំពង់ឆ្នាំង និងសហគមន៍កសិកម្មទំនើបតាសីសាមគ្គី ស្ថិតនៅស្រុកថ្មគោល ខេត្តបាត់ដំបង។
ដំណើរទស្សនកិច្ចនេះ មានគោលបំណងស្វែងយល់ពី ១-បច្ចេកទេសដាំដុះដំណាំបន្លែក្នុងផ្ទះសំណាញ់ ដោយផ្តោតលើទម្រង់ផ្ទះសំណាញ់មានដូចជា ទំហំ ប្រភេទដំបូលដែលការពាររស្មីយូវី ការគ្រប់គ្រង់សំណើម សីតុណ្ហភាព និងសត្វល្អិតចង្រៃ ២-ប្រព័ន្ធស្រោចស្រពដោយប្រើប្រាស់ថាមពលពន្លឺព្រះអាទិត្យ(ប្រព័ន្ធសូឡា)និងសម្ភារៈសម្រាប់ស្តុកទឹក ៣-ប្រព័ន្ធស្រោចស្រពដោយតំណក់ទឹក ៤-ការប្រើប្រាស់និងគ្រប់គ្រងទឹកសម្រាប់ក្រុមដំណាំបន្លែ ៥-ការប្រើប្រាស់ធាតុចូលកសិកម្ម (Agricultural Inputs) ៦-ការគ្រប់គ្រងក្រុមផលិតផ្សារភ្ជាប់នឹងទីផ្សារ និង៧-ការបញ្ចូលបច្ចេកទេសក្នុងបរិបទនៃការប្រែប្រួលអាកាសធាតុ។
ក្នុងដំណើរទស្សនកិច្ចខាងលើ ឯកឧត្ដមបណ្ឌិត បានគូសបញ្ជាក់ថា ការចុះទស្សនកិច្ចនឹងផ្ដល់ឱកាសដល់អ្នកចូលរួម អាចកំណត់បានសកម្មភាពជាយុទ្ធសាស្ត្រនិងកត្តាចូលរួមនានាសម្រាប់ជំរុញឱ្យទទួលជោគជ័យ ដែលអាចឆ្លើយតបនឹងចំណុចខ្វះខាតក៏ដូចជាបញ្ហាប្រឈមដែលកំពុងជួបប្រទះក្នុងផលិតកម្មដំណាំបន្លែ ជាពិសេស បច្ចេកទេសដ៏សមស្របនៃការដាំដុះដំណាំបន្លែក្នុងផ្ទះសំណាញ់និងទីវាល ដែលប្រើប្រាស់ប្រព័ន្ធស្រោចស្រពសន្សំសំចៃទឹកស្របនឹងបរិបទនៃការប្រែប្រួលអាកាសធាតុផងដែរ។ បន្ថែមពីនេះទៀត អ្នកចូលរួមក៏បានទទួលនូវបទពិសោធន៍ដ៏ល្អក្នុងការជ្រើសរើសពូជ ការគ្រប់គ្រងជីជាតិដី ការរៀបចំប្រតិទិនដាំដុះដោយផ្សារភ្ជាប់នឹងតម្រូវការ និងការគ្រប់គ្រងសមាសភាពចង្រៃនានា។
ក្នុងដំណើរទស្សនកិច្ចនេះ បទពិសោធន៍ល្អៗដែលបានទទួលបានមានដូចជា កត្តាសំខាន់ដែលត្រូវយកចិត្តទុកដាក់ក្នុងផលិតកម្មដំណាំបន្លែមាន ការប្រើប្រាស់ជីកំប៉ុស្តដើម្បីកែប្រែដី ការស្រោចស្រពដ៏មានប្រសិទ្ធភាព និងការគ្រប់គ្រងសមាសភាពចង្រៃ។ ទន្ទឹមគ្នានេះ ចំណុចគន្លឹះក្នុងការគ្រប់គ្រងសាមជិកក្នុងសហគមន៍កសិកម្ម ការអនុវត្តបច្ចេកទេសឱ្យបានច្បាស់លាស់ តាមដានឱ្យបានល្អិតល្អន់ដើម្បីកំណត់បញ្ហានិងកំណត់វិធីសាស្ត្រដោះស្រាយឱ្យទាន់ពេលវេលាសំដៅបង្កើតជាគំរូដល់សមាជិកអនុវត្តតាមនិងធ្វើការផ្សព្វផ្សាយផលិតផលបន្លែសុវត្ថិភាពដល់ប្រជាជននៅមូលដ្ឋានឱ្យបានទូលំទូលាយផងដែរ៕