ឯកឧត្តមបណ្ឌិត ហ៊ាន វណ្ណហន អញ្ជើញដឹកនាំក្រុមការងារជំនាញជួបសំណះសំណាល និងសួរសុខទុក្ខបងប្អូនកងទ័ពនៅស្រុកជាំក្សាន្ដ ខេត្ដព្រះវិហារ

ចេញ​ផ្សាយ​ ១១ កុម្ភៈ ២០២៦ 2427

នៅថ្ងៃទី១០ ខែកុម្ភ: ឆ្នាំ២០២៦ បន្ទាប់ពីបញ្ចប់ដំណើរទស្សនកិច្ចសិក្សាផលិតកម្មដំណាំបន្លែវៃឆ្លាតធន់នឹងអាកាសធាតុរបស់គម្រោងកែលម្អសន្តិសុខទឹកកម្ពុជា (CaWSIP) ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP បានដឹកនាំក្រុមការងារ អមដោយលោកប្រធានមន្ទីរ និងមន្រ្ដីជំនាញនៃមន្ទីរកសិកម្មខេត្ដព្រះវិហារ ជួបសំណះសំណាល និងសួរសុខទុក្ខបងប្អូនវីរកងទ័ព ស្រុកជាំក្សាន្ត ខេត្ដព្រះវិហារ។ 
ក្នុងឱកាសដ៏មានន័យនេះ ឯកឧត្ដមបណ្ឌិត បានគោរពកោតសរសើរដល់វីរយុទ្ធជនរបស់យើង ដែលបានលះបង់សាច់ស្រស់ ឈាមស្រស់ លះបង់ជីវិត ដើម្បីការពារបូរណភាពទឹកដី មាតុភូមិនៃយើង ហើយក្នុងនាមអ្នកនៅសមភូមិក្រោយក៏សូមចែករំលែក រែកពុននូវទុក្ខលំបាក និងផលលំបាកទាំងនេះទាំងអស់គ្នា រួមគ្នាប្រឹងប្រែង តស៊ូ លះបង់ បន្តពង្រឹងនិងលើកកម្ពស់សមត្ថភាព ដើម្បីប្រែក្លាយការលំបាកនេះ ឱ្យក្លាយទៅជាចលនាជាតិ ចលនារួបរួមជាតិ ឯកភាពជាតិ ដើម្បីជាម្ចាស់ការពារជាតិ និងកសាងជាតិខ្មែរយើងឱ្យខ្លាំងពូកែ រឹងមាំ និងមានស្ថិរភាព ព្រមទាំងជំរុញដល់ការអភិវឌ្ឍប្រទេសឱ្យរីកចម្រើនជឿនលឿនជានិរន្តរ៍។ 
ទន្ទឹមនឹងនោះដែរ ឯកឧត្ដមបណ្ឌិត ក៏បានឧបត្ថម្ភជាសម្ភារៈ បរិក្ខារសម្រាប់ប្រើប្រាស់ និងជំរុញផលិតកម្មស្បៀងផ្គត់ផ្គង់កងទ័ព (ម៉ាស៊ីនបូមទឹក ទុយោនិងបរិក្ខាសម្រាប់រៀបចំប្រព័ន្ធស្រោចស្រព ពូជបន្លែសំខាន់ៗ កូនត្រី កូនកង្កែបពូជ មាន់ពូជ ចំណីសត្វ ថ្នាំសង្កូវសំខាន់ៗ ) នៅក្នុង មូលដ្ឋានកងទ័ព ដើម្បីជាការចូលរួមលើកទឹកចិត្ត និងបង្ហាញការគាំទ្រចំពោះការលះបង់ និងការខិតខំបំពេញភារកិច្ចដ៏ថ្លៃថ្នូររបស់កងទ័ព ក្នុងការការពារសន្តិសុខ សុវត្ថិភាព និងសុខសន្តិភាពជូនជាតិ និងប្រជាពលរដ្ឋ។ បន្ថែមពីនេះទៀត នេះមិនត្រឹមតែជាការឧបត្ថម្ភជាសម្ភារៈប៉ុណ្ណោះទេ ប៉ុន្តែថែមទាំងជាការបង្ហាញពីសាមគ្គីភាព ក្តីអរគុណ និងការយកចិត្តទុកដាក់ចំពោះកងទ័ព ដែលជាបង្គោលសំខាន់នៃប្រទេសជាតិ។ ក្នុងនោះផងដែរ ឯកឧត្ដមបណ្ឌិត ក៏បានចាត់មន្ទីរកសិកម្មខេត្ដ និងមន្ត្រីក្រុមការងារគម្រោង CaWSIP បន្តពិនិត្យលទ្ធភាពជួយបន្ត គាំទ្របំពេញបន្ថែម ដោយផ្តល់ហេដ្ឋារចនាសម្ព័នគាំទ្រមាន ផ្ទះសំណាញ់ ស្រះទឹក ប្រព័ន្ធស្រោចស្រព និងធាតុចូល ដើម្បីលើកកម្ពស់សមត្ថភាពជំនាញបច្ចេកទេសលើការងារផលិតកម្មបន្លែ ការចិញ្ចឹមសត្វ ដើម្បីផ្គត់ផ្គង់កងទ័ពនៅក្នុងអង្គភាព៕