ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចុះសួរសុខទុក្ខ និងជួបសំណេះសំណាលក្រុមការងារឈរជើងនៅកន្លែងអភិរក្សជ្រោយស្តី នៅខេត្ដពោធិ៍សាត់
ចេញផ្សាយ ៨ ឧសភា ២០២៥ 2764
នៅថ្ងៃពុធ ថ្ងៃទី០៧ ខែឧសភា ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អមដំណើរដោយ ឯកឧត្តម ពុំ សុថា ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល បានអញ្ជើញចុះសួរសុខទុក្ខ និងជួបសំណេះសំណាល នៅស្នាក់ការក្រុមការងារបង្រ្កាបបទល្មើសជលផលថ្នាក់ជាតិឈរជើងនៅកន្លែងអភិរក្សជ្រោយស្ដី នៅខេត្ដពោធិ៍សាត់។
ក្នុងដំណើរនេះ ក៏មានការចូលរួមពីក្រុមការងារទប់ស្កាត់ និងបង្រ្កាបបទល្មើសធនធាន ធម្មជាតិយោធភូមិភាគ៥ ប្រចាំការ ខេត្តពោធិ៍សាត់ នាយអធិការដ្ឋានរដ្ឋជលផលខាងត្បូងបឹងទន្លេសាប នាយខណ្ឌរដ្ឋបាលជលផលពោធិ៍សាត់-កំពង់ឆ្នាំង-កំពង់ធំ កងរាជអាវុធហត្ថខេត្ដពោធិ៍សាត់ និងមន្ត្រីពាក់ព័ន្ធជាច្រើនរូបទៀត។
នាឱកាសនោះ ឯកឧត្តមអនុរដ្ឋលេខាធិការបានកោតសរសើរចំពោះក្រុមការងារបង្ក្រាបបទល្មើសជលផលថ្នាក់ជាតិ-ថ្នាក់ក្រោមជាតិ ដែលបានចូលរួម ទប់ស្កាត់ និងបង្ក្រាបបានយ៉ាងល្អកន្លងមក។ ជាមួយគ្នានេះ ឯកឧត្តមបានណែនាំទៅក្រុមការងារទាំងអស់បន្តយន្តការផ្សព្វផ្សាយច្បាប់ស្ដីពី ជលផលឱ្យបានទូលំទូលាយបន្ថែមទៀត ដល់ប្រជានេសាទ និងសហគមន៍ជុំវិញបឹងទន្លេសាប ដើម្បីការពារធនធានជលផលឱ្យកាន់តែប្រសើរថែមទៀត។
ទន្ទឹមនឹងនេះ ឯកឧត្តមអនុរដ្ឋលេខាធិការ បានផ្តល់ជាអនុសាសន៍ដល់ក្រុមការងារចម្រុះ រឹតបន្តឹងការអនុវត្តន៍ច្បាប់ បង្ក្រាបបទល្មើសជលផល ឲ្យកាន់តែមានប្រសិទ្ធភាព ក្នុងនោះឯកឧត្តមបានសង្កត់ធ្ងន់ លើការប្រើប្រាស់ ឧបករណ៍ស្បៃមុង ឧបករណ៍ឆក់ និងឧបករណ៍ដទៃទៀត ដែលបំផ្លាញធនធានជលផលធ្ងន់ធ្ងរ ដើម្បីលើកកម្ពស់ជីវភាពប្រជានេសាទដែលរស់នៅជុំវិញបឹងទន្លេនេសាទឱ្យបានកាន់តែមានភាពល្អប្រសើរ។
ជាចុងបញ្ចប់ ឯកឧត្តមអនុរដ្ឋលេខាធិការ បាននាំយកអំណោយ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចែកជូន រួមមាន ថវិកា អង្ករ មី ទឹកត្រី ទឹកស៊ីអ៊ីវ ដល់សមត្ថកិច្ចចម្រុះថ្នាក់ជាតិ-ក្រោមជាតិ ព្រមទាំងបានចែកជូនប្រេងឥន្ធនៈបន្ថែម ដល់ក្រុមការងារចម្រុះដើម្បីចុះទប់ស្កាត់ និងបង្ក្រាបបទល្មើសនេសាទ ឱ្យកាន់តែមានប្រសិទ្ធភាព និងប្រសិទ្ធផលល្អថែមទៀត៕
