ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមកិច្ចប្រជុំរបស់គណៈកម្មាធិការជាតិកម្ពុជាដើម្បីមនុស្សចាស់
ចេញផ្សាយ ១២ វិច្ឆិកា ២០២៦ 210
នៅថ្ងៃទី១១ ខែវិច្ឆិកា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាសមាជិកគណៈកម្មាធិការជាតិ កម្ពុជាដើម្បីមនុស្សចាស់ បានអញ្ជើញចូលរួមកិច្ចប្រជុំរបស់គណៈកម្មាធិការជាតិកម្ពុជាដើម្បីមនុស្សចាស់ ក្រោមអធិបតីភាព ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគណៈកម្មាធិការជាតិ ដោយមានការចូលរួមពីថ្នាក់ដឹកនាំ និងតំណាង ក្រសួង ស្ថាប័នពាក់ព័ន្ធជាច្រើនរូប នៅទីស្តីការក្រសួងសង្គមកិច្ច។
កិច្ចប្រជុំនេះរៀបចំឡើង ក្នុងគោលបំណងពង្រឹងកិច្ចសហប្រតិបត្តិការ សម្រប សម្រួល និងបង្កើនប្រសិទ្ធភាពការងាររវាងក្រសួង ស្ថាប័នពាក់ព័ន្ធ ក្នុងការ អនុវត្តតួនាទី និងភារកិច្ចរបស់គណៈកម្មាធិការ ព្រមទាំងជំរុញការចូលរួមរួមគ្នា ក្នុងការលើកកម្ពស់សុខុមាលភាព សិទ្ធិ និងការរស់នៅប្រកបដោយភាពថ្លៃថ្នូរ របស់មនុស្សចាស់នៅក្នុងសង្គមកម្ពុជា។
សូមជម្រាបថា គណៈកម្មាធិការជាតិកម្ពុជាដើម្បីមនុស្សចាស់ ត្រូវបានបង្កើត ឡើងតាមរយៈសេចក្តីសម្រេចរបស់រាជរដ្ឋាភិបាលលេខ១៨២ សសរ ចុះថ្ងៃ ទី១៣ ខែកញ្ញា ឆ្នាំ២០២៤ ដោយមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាប្រធានកិត្តិយស។ គណៈកម្មាធិការនេះមានគោល បំណងលើកកម្ពស់សុខុមាលភាពមនុស្សចាស់ និងចូលរួមចំណែកក្នុងការអនុវត្ត គោលនយោបាយជាតិរបស់រាជរដ្ឋាភិបាល សំដៅកាត់បន្ថយភាពក្រីក្រ និង ធានាឱ្យមនុស្សចាស់ទទួលបានការយកចិត្តទុកដាក់ និងការគាំពារសមស្រប៕
