ឯកឧត្តមអនុរដ្ឋលេខាធិការ សៀក ឡេង អញ្ជើញដឹកនាំកិច្ចប្រជុំពិភាក្សា ដើម្បីតាមដានវឌ្ឍនភាពនៃការដាក់បញ្ចូលសេវាសាធារណៈរបស់អគ្គនាយកដ្ឋានសុខភាពសត្វ និងផលិតកម្មសត្វ និងអគ្គនាយកដ្ឋានកសិកម្មក្នុងប្រព័ន្ធអេឡិចត្រូនិក

ចេញ​ផ្សាយ​ ២១ វិច្ឆិកា ២០២៥ 1546

នាព្រឹកថ្ងៃទី២១ ខែវិច្ឆិកា ឆ្នាំ២០២៥ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារឌីជីថល បានអញ្ជើញដឹកនាំកិច្ចប្រជុំពិភាក្សាជាមួយក្រុមការងារជំនាញមកពីមជ្ឈមណ្ឌលបណ្តុះធុរកិច្ចថ្មីតេជោនៃក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានសុខភាពសត្វ និងផលិតកម្មសត្វ អគ្គនាយកដ្ឋានកសិកម្ម និមជ្ឈមណ្ឌលព័ត៌មាន និងឯកសារកសិកម្មក្នុងគោលបំណងពិនិត្យលើវឌ្ឍនភាពនៃការដាក់បញ្ចូលសេវាសាធារណៈរបស់អគ្គនាយកដ្ឋានសុខភាពសត្វ និងផលិតកម្មសត្វ និងអគ្គនាយកដ្ឋានកសិកម្មក្នុងប្រព័ន្ធអេឡិចត្រូនិក។
ឯកឧត្តមអនុរដ្ឋលេខាធិការបានគូសបញ្ជាក់ថា ដើម្បីសម្រួល ពន្លឿន និងប្រសិទ្ធភាពក្នុងការផ្តល់សេវាសាធារណៈរបស់ក្រសួងជូនដល់សាធារណៈជន ក្រសួងមានផែនការបញ្ចូលសេវាសាធារណៈចំនួន៤១ សេវាក្នុងប្រព័ន្ធគំរូស្តង់ដានៃសេវាអេឡិចត្រូនិកសម្រាប់ធុរកិច្ច។ ក្នុងនោះ សេវាស្នើសុំបង្កើតកសិដ្ឋានចិញ្ចឹមសត្វ ឬ បង្កាត់ពូជសត្វខ្នាតមធ្យម និងធំ របស់អគ្គនាយកដ្ឋានសុខភាពសត្វ និងផលិតកម្មសត្វ បានអភិវឌ្ឍន៍ដោយជោគជ័យ នឹងគ្រោងដាក់ឱ្យដំណើរការជាផ្លូវការនាថ្ងៃទី២៤ ខែវិច្ឆិកា ឆ្នាំ២០២៥ខាងមុខនេះ៕