ឯកឧត្តមរដ្ឋលេខាធិការ ហ៊ាន វណ្ណហន អញ្ជើញជាគណៈអធិបតីបើកសិក្ខាសាលាផ្សព្វផ្សាយការចាប់ផ្ដើមអនុវត្ដ សមាសភាគទី៣ នៃគម្រោងកែលម្អសន្តិសុខទឹកកម្ពុជា (CaWSIP_MAFF)

ចេញ​ផ្សាយ​ ២ កក្កដា ២០២៥ 3536

នៅថ្ងៃទី១ ខែកក្កដា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP_MAFF បានអញ្ជើញជាគណៈអធិបតីបើកសិក្ខាសាលាផ្សព្វផ្សាយការចាប់ផ្ដើមអនុវត្ដសមាសភាគទី៣ ស្ដីពី សេវាគាំទ្របង្កើនភាពធន់នឹងការប្រែប្រួលអាកាសធាតុ និងប្រសិទ្ធភាពនៃការប្រើប្រាស់ទឹកក្នុងវិស័យកសិកម្ម នៃគម្រោងកែលម្អសន្តិសុខទឹកកម្ពុជា (CaWSIP) នៅមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ។

សិក្ខាសាលានេះ មានការអញ្ជើញចូលរួមពីក្រុមការងារអនុវត្ដន៍គម្រោងថ្នាក់ជាតិ CaWSIP-MAFF និងថ្នាក់ខេត្ដនៃមន្ទីរកសិកម្ម រុក្ខាប្រមាញ់ និងនេសាទ ក៏ដូចជាមន្ទីរធនធានទឹក និងឧតុនិយម ខេត្ដក្រចេះ អាជ្ញាធរស្រុក ឃុំ ភូមិ មន្រ្ដីកសិកម្មឃុំ សហគមន៍ (កសិកម្ម ព្រៃឈើ ប្រើប្រាស់ទឹក) វិស័យឯកជន និងកសិករគំរូ ក្នុងតំបន់វិសាលភាពនៃការអនុវត្តន៍គម្រោង។ 

ឯកឧត្ដមរដ្ឋលេខាធិការ បានថ្លែងក្នុងពិធីបើកអង្គសិក្ខាសាលាថា សិក្ខាសាលានេះរៀបចំឡើងក្នុងគោលបំណង ណែនាំអំពីសកម្មភាព និងក្របខ័ណ្ឌនៃការអនុវត្តគម្រោងដល់អាជ្ញាធរមូលដ្ឋាន កសិករទទួលផល និងអ្នកពាក់ព័ន្ធ សំដៅ បញ្ជ្រាបការអនុវត្តបច្ចេកទេសកសិកម្មវ័យឆ្លាតបន្ស៊ាំទៅនឹងការប្រែប្រួលអាកាសធាតុ (Climate Smart Agriculture - CSA) និងបច្ចេកទេសកាត់បន្ថយថ្លៃដើមក្នុងផលិតកម្មដំណាំ។

ទន្ទឹមនឹងនេះ ឯកឧត្តមមានប្រសាសន៍បន្ថែមថា  ដោយមានកិច្ចសហប្រតិបត្ដិការល្អរវាងរាជរដ្ឋាភិបាលកម្ពុជា និងធនាគារពិភពលោក ទើបបង្កើតឱ្យមានគម្រោងនេះឡើង ដើម្បីធ្វើឱ្យការប្រើប្រាស់ទឹកប្រកបដោយប្រសិទ្ធភាព ស្របតាមពហុបំណង។ ជាមួយគ្នានេះ សិក្ខាសាលានឹងផ្សព្វផ្សាយដល់អាជ្ញាធរមូលដ្ឋាន កសិករទទួលផល និងអ្នកពាក់ព័ន្ធក្នុងមូលដ្ឋានអំពីបច្ចេកទេសខាងលើ និងកំណត់បាននូវប្រភេទមុខដំណាំមានសក្តានុពល  សម្រាប់អនុវត្តបន្ស៊ីទៅនឹងបច្ចេកទេសកសិកម្មវ័យឆ្លាត បន្ទាប់ពីការជួសជុលប្រព័ន្ធធារាសាស្រ្ដ កន្ទួត និងស្វាយជ្រុំ ស្ថិតក្នុងស្រុកចិត្របុរី ខេត្តក្រចេះ។

ជាចុងបញ្ចប់ ឯកឧត្ដមរដ្ឋលេខាធិការ បានស្នើដល់អ្នកពាក់ព័ន្ធក្នុងអង្គសិក្ខាសាលាធ្វើការពិភាក្សានិងផ្ដល់ធាតុចូលសំខាន់ៗ ក៏ដូចជាបន្ដកិច្ចសហការគ្នា ដើម្បីសម្រេចបាននូវគោលបំណងអង្គសិក្ខាសាលា និងគម្រោងទាំងមូល៕