ព័ត៌មានផ្សេងៗទៀត
លោកជំទាវអនុរដ្ឋលេខាធិការ យ៉ើ អាស៊ីគីន អញ្ជើញចូលរួមកិច្ចប្រជុំគណៈកម្មការតម្រង់ទិសគម្រោងភាពជាដៃគូ សហភាពអឺរ៉ុប និងអាល្លឺម៉ង់ ដើម្បីបើកច្រកទៅកាន់ទីផ្សារសកល និងជំនាញពាណិជ្ជកម្ម លើកទី២ (3rd EU-German GATE PSC)
ចេញផ្សាយ ១១ កុម្ភៈ ២០២៦ 2332
នាព្រឹកថ្ងៃទី១១ ខែកុម្ភៈ ឆ្នាំ២០២៦ លោកជំទាវ យ៉ើ អាស៊ីគីន អនុរដ្ឋលេខា ធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមកិច្ចប្រជុំ គណៈកម្មការ តម្រង់ទិសលើកទី៣ នៃគម្រោងភាពជាដៃគូសហភាពអឺរ៉ុប និងអាល្លឺម៉ង់ ដើម្បីបើក ច្រកទៅកាន់ទីផ្សារសកល និងជំនាញពាណិជ្ជកម្ម (3rd EU-German GATE)។
កិច្ចប្រជុំធ្វើឡើងនៅទីស្តីការក្រសួងពាណិជ្ជកម្ម ដឹកនាំរួមគ្នាដោយ លោកជំទាវ តឹករ៉េត កំរង រដ្ឋលេខាធិការ ក្រសួងពាណិជ្ជកម្ម និងលោក Koen Everaert អនុប្រធានកិច្ច សហប្រតិបត្តិការនៃគណៈប្រតិភូសហភាពអឺរ៉ុបប្រចាំកម្ពុជា។
ក្នុងឱកាសនោះ លោកជំទាវ យ៉ើ អាស៊ីគីន បានជម្រាបជូនអង្គប្រជុំអំពីវឌ្ឍនភាព សំខាន់ៗក្នុងវិស័យកសិកម្ម ក្រោមក្របខណ្ឌកិច្ចសហប្រតិបត្តិការជាមួយគម្រោង GATE ដែលផ្ដោតលើការពង្រឹងខ្សែច្រវាក់តម្លៃកសិកម្មកម្ពុជាឱ្យកាន់តែរឹងមាំ មាន សុវត្ថិភាព និងលទ្ធភាពប្រកួតប្រជែងខ្ពស់លើទីផ្សារសកល។ លោកជំទាវបាន សង្កត់ ធ្ងន់លើសមិទ្ធផល នៃការអភិវឌ្ឍប្រព័ន្ធភូតគាមអនាម័យអេឡិចត្រូនិក (ePhyto) ដែលកំពុងអនុវត្តការតភ្ជាប់ជាមួយប្រព័ន្ធបញ្ជរតែមួយជាតិ (CNSW) តាមរយៈ យន្តការ Single Sign-On ដែលជាជំហានយុទ្ធសាស្ត្រក្នុងការគ្រប់គ្រងពាណិជ្ជកម្ម តាមបែបឌីជីថល។
បន្ថែមលើនេះ ដើម្បីបង្កើនតម្លាភាព និងសុចរិតភាពនៃឯកសារ ក្រសួងកសិកម្ម រុក្ខាប្រមាញ់ និងនេសាទកំពុងសិក្សាលើការប្រើប្រាស់ផ្លេតហ្វម verify.gov.kh របស់ ក្រសួងប្រៃសណីយ៍ និងទូរគមនាគមន៍ ដើម្បីដាក់បញ្ចូលលេខកូដ QR ស្តង់ដារជាតិលើវិញ្ញាបនបត្រ ePhyto។ យន្តការនេះនឹងអនុញ្ញាតឱ្យអាជ្ញាធរមានសមត្ថកិច្ច នៅតាមព្រំដែន អាចផ្ទៀងផ្ទាត់ភាពត្រឹមត្រូវនៃវិញ្ញាបនបត្របានភ្លាមៗ និងដោយផ្ទាល់ តាមរយៈប្រភពផ្លូវការរបស់រាជរដ្ឋាភិបាល។
ជាកិច្ចបញ្ចប់ លោកជំទាវបានបញ្ជាក់ជាថ្មី ក្នុងការបន្តពង្រឹងកិច្ចសហប្រតិបត្តិការ ជាមួយដៃគូអភិវឌ្ឍន៍ទាំងអស់ ដើម្បីធានាឱ្យបាននូវជោគជ័យ និងនិរន្តរភាព នៃការកែទម្រង់ពាណិជ្ជកម្មកសិកម្ម សំដៅបម្រើផលប្រយោជន៍ជូនដល់កសិករ និងធុរកិច្ចជននាំចេញរបស់កម្ពុជាប្រកបដោយប្រសិទ្ធភាពខ្ពស់៕
