ឯកឧត្តមរដ្ឋលេខាធិការ មាស ពិសិដ្ឋ អញ្ជើញដឹកនាំកិច្ចប្រជុំស្តីពីការកែលម្អកម្មវិធីធ្វើវិញ្ញាបនបត្របញ្ជាក់គុណភាពផលិតផលកសិកម្ម

ចេញ​ផ្សាយ​ ៣០ កញ្ញា ២០២៥ 1085

នៅព្រឹកថ្ងៃទី ៣០ ខែកញ្ញា ឆ្នាំ ២០២៥ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងឋានៈជាអ្នកសម្របសម្រួលគម្រោងអភិវឌ្ឍន៍របស់ក្រសួង និងជានាយកគម្រោង «ភាពជាដៃគូរវាងរដ្ឋ សហគមន៍ និងវិស័យឯកជន ដើម្បីកសិកម្មមានលក្ខណៈភាតរបរិស្ថាន និងជីវភាពប្រជាជនមានភាពធន់ នៅខាងជើងបឹងទន្លេសាប (Public-Social-Private Partnerships for Ecologically-Sound Agriculture and Resilient Livelihood in Northern Tonle Sap Basin, PEARL)» បានអញ្ជើញដឹកនាំកិច្ចប្រជុំបកស្រាយ និងពិភាក្សាអំពីបច្ចុប្បន្នភាពនៃការធ្វើវិញ្ញាបនបត្របញ្ជាក់គុណភាពផលិតផលកសិកម្ម ភាពខ្វះចន្លោះដែលត្រូវបំពេញ និងកំណត់កិច្ចការដែលត្រូវធ្វើដើម្បីកែលម្អ។ 
កិច្ចប្រជុំនេះ បានធ្វើឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពីថ្នាក់ដឹកនាំ មន្ត្រី និងបុគ្គលិក នៃក្រសួងកសិកម្ម រុក្ខាប្រមាញ់ និងនេសាទ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងពាណិជ្ជកម្ម អង្គការអន្តរជាតិ អង្គការមិនមែនរដ្ឋាភិបាល ក្រុមហ៊ុនឯកជន និងអង្គការស្បៀង និងកសិកម្មនៃសហប្រជាជាតិ (FAO) សរុបចំនួន៤០នាក់។
តាមរយៈកិច្ចប្រជុំ សមាសភាពទាំងអស់បានចូលរួមយ៉ាងសកម្ម និងយកចិត្តទុកដាក់ខ្ពស់ក្នុងការចែករំលែកព័ត៌មាន ចំណេះដឹង និងបទពិសោធន៍ពាក់ព័ន្ធដ៏មានតម្លៃជាច្រើន ហើយបានសាទរ និងបង្ហាញនូវការប្តេជ្ញាចិត្តចូលរួមកែលម្អកម្មវិធីដ៏សំខាន់នេះ នៅក្នុងបរិការណ៍ដែលផលិតផលកសិកម្មកម្ពុជា មួយភាគធំ ត្រូវបានកសិករ និងសហគមន៍កសិកម្មផលិតសម្រាប់លក់ ឬធ្វើពាណិជ្ជកម្ម ទាំងលើទីផ្សារក្នុងស្រុក និងទីផ្សារអន្តរជាតិ។
ជាចុងក្រោយ អង្គប្រជុំបានសម្រេចលទ្ធផលដែលបានគ្រោង ដោយបានយល់ដឹងកាន់តែច្បាស់អំពីសារសំខាន់នៃការកែលម្អកម្មវិធី ហើយបានរួមគ្នាផ្តល់យោបល់ដើម្បីធ្វើឱ្យកម្មវិធីរបស់ជាតិមួយនេះ កាន់តែមានគុណភាព និងប្រសិទ្ធភាពខ្ពស់ សំដៅធ្វើឱ្យកសិករ និងសហគមន៍កសិកម្ម ដែលជាអ្នកផលិត អ្នកប្រមូលទិញ និងជាអ្នកកែច្នៃ ហើយទីផ្សារជាតិ និងអន្តរជាតិទទួលស្គាល់ និងជឿជាក់ ដែលនៅទីបំផុត ផលិតផលកសិកម្មជាតិកាន់តែដណ្តើមបានភាពប្រកួតប្រជែងនៅលើទីផ្សារ ពោលគឺ អាចលក់បានច្រើន នៅក្នុងតម្លៃដែលអាចទទួលយកបាន។
ទន្ទឹមគ្នានោះដែរ អង្គប្រជុំបានយល់ស្របគ្នាលើចំណុចចាំបាច់ដែលត្រូវកែលម្អលើការបង្កើនចំណាប់អារម្មណ៍ ចំណេះដឹង និងផលិតភាពរបស់គ្រប់តួអង្គនៃខ្សែច្រវាក់តម្លៃកសិកម្ម ពោលគឺ ធ្វើឱ្យផលិតផលកសិកម្មកម្ពុជា កាន់តែមានភាពសមស្របនឹងតម្រូវការរបស់ទីផ្សារ ទាំងបរិមាណ គុណភាព សុវត្ថិភាព និងពេលវេលាផ្គត់ផ្គង់។
គួរបញ្ជាក់ថា អង្គប្រជុំមិនត្រឹមតែបានផ្តោតលើការធ្វើវិញ្ញាបនបត្របញ្ជាក់អំពីគុណភាពផលិតផលកសិកម្មកម្ពុជា ស្របតាមស្តង់ដារសុវត្ថិភាពចំណីអាហារជាតិ និងអន្តរជាតិ ប៉ុណ្ណោះទេ ប៉ុន្តែថែមទាំងអាចបញ្ជាក់ផងដែរថា ផលិតផលកសិកម្មកម្ពុជា កាន់តែមានតម្លៃបន្ថែម តាមរយៈការយកចិត្តទុកដាក់ទាំងលើទិដ្ឋភាពយេនឌ័រ បរិយាប័ន្នសង្គម បរិស្ថាន ធនធានធម្មជាតិ វប្បធម៌ ព្រមទាំងការបង្កើនភាពធន់ និងការរួមចំណែកកាត់បន្ថយបញ្ហានានាដែលបង្កឱ្យមានការប្រែប្រួលអាកាសធាតុផងដែរ៕