ឯកឧត្តមអនុរដ្ឋលេខាធិការ វ៉ា ពិសី អញ្ជើញដឹកនាំក្រុមការងារចុះពិនិត្យវឌ្ឍនភាពការអនុវត្តមុខងារក្នុងវិស័យកសិកម្ម ដែលបានផ្ទេរទៅឱ្យរដ្ឋបាលថ្នាក់ក្រោមជាតិ នៅខេត្តមណ្ឌលគិរី

ចេញ​ផ្សាយ​ ៣ តុលា ២០២៥ 119

នៅថ្ងៃទី៣ ខែតុលា ឆ្នាំ២០២៥ ឯកឧត្តម វ៉ា ពិសី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារជួបប្រជុំ និងចុះពិនិត្យវឌ្ឍនភាពការអនុវត្តមុខងារក្នុងវិស័យកសិកម្ម រុក្ខាប្រមាញ់ និងនេសាទ ដែលបានផ្ទេរទៅរដ្ឋបាលថ្នាក់ក្រោមជាតិ នៅខេត្តមណ្ឌលគិរី។ 
ក្នុងដំណើរនេះ មានការចូលរួមពីលោក ង៉ាន ណានី អគ្គលេខាធិការរងក្រសួងកសិកម្ម រុក្ខាប្រមាញ់ និងនេសាទ លោក ប៉ែន វុទ្ធី ប្រធាននាយកដ្ឋាននីតិកម្មកសិកម្ម តំណាងអគ្គនាយកដ្ឋានកសិកម្ម តំណាងរដ្ឋបាលជលផល តំណាងអគ្គនាយកដ្ឋានសុខភាពសត្វ និងផលិតកម្មសត្វ លោក ហាន សុភក្តិ អនុប្រធានមន្ទីរកសិកម្មកសិកម្មខេត្តមណ្ឌលគិរី លោក លោកស្រីក្រុមការងារកំណែទម្រង់វិមជ្ឈការ-វិសហមជ្ឈការក្រសួងកសិកម្ម និងមន្ត្រីពាក់ព័ន្ធមន្ទីរ។ 
នៅកិច្ចប្រជុំដែលធ្វើឡើងនៅមន្ទីរកសិកម្ម រុក្ខាប្រមាញ់ និងនេសាទ ឯកឧត្តម វ៉ា ពិសី បានស្តាប់សេចក្តីរាយការណ៍អំពីវឌ្ឍនភាពការងារកន្លងមក ព្រមទាំងពិនិត្យបញ្ហាប្រឈម សំណូមពរ និងដំណោះស្រាយនានាដែលបានលើកឡើង។ ទ​ន្ទឹមគ្នានោះ ឯកឧត្តមអនុរដ្ឋលេខាធិការ បានណែនាំដល់ក្រុមការងារ និងមន្រ្តីជំនាញពាក់ព័ន្ធឱ្យបន្តពិនិត្យតាមដានដោយយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់ ចំពោះការអនុវត្តកំណែទម្រង់វិមជ្ឈការ និងវិសហមជ្ឈការ ក្នុងវិស័យកសិកម្ម រុក្ខាប្រមាញ់ និងនេសាទ ដែលក្រសួងបានផ្ទេរឱ្យរដ្ឋបាលថ្នាក់ខេត្ត។ 
សូមជម្រាបថា ក្រោយកិច្ចប្រជុំ ឯកឧត្ដមអនុរដ្ឋលេខាធិការ ក៏បានអញ្ជើញដឹកនាំក្រុមការងារ និងមន្រ្តីជំនាញពាក់ព័ន្ធចុះពិនិត្យនៅទីតាំងសត្តឃាតដ្ឋានក្រុងសែនមនោរម្យ នៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី៕