ឯកឧត្តមរដ្ឋលេខាធិការ ប្រាក់ ដាវីដ ទទួលជួបសម្តែងការគួរសម និងពិភាក្សាការងារជាមួយគណៈប្រតិភូធុរកិច្ចខេត្តហៃណាន ប្រទេសចិន

ចេញ​ផ្សាយ​ ២៣ មេសា ២០២៥ 2484

នាព្រឹកថ្ងៃទី២៣ ខែមេសា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបជាមួយគណៈប្រតិភូធុរកិច្ចខេត្តហៃណាន ប្រទេសចិន ក្នុងជំនួបសម្តែងការគួរសម និងពិភាក្សាការងារ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នៅក្នុងកិច្ចប្រជុំនេះ ឯកឧត្តមរដ្ឋលេខាធិការ បានសម្តែងការស្វាគមន៍ និងបានលើកឡើងពីទស្សនកិច្ចរបស់ ឯកឧត្តម ស៊ី ជីងពីន ប្រធានាធិបតីនៃសាធារណរដ្ឋប្រជាមានិតចិន បានមកបំពេញទស្សនកិច្ចផ្លូវរដ្ឋនៅប្រទេសកម្ពុជា គូសបញ្ជាក់ពីភាពរឹងមាំនៃទំនាក់ទំនាក់ទំនង និងកិច្ចសហប្រតិបត្តិការរវាងប្រទេសយើងទាំងពីរ ដែលជាដៃគូយុទ្ធសាស្ត្រគ្រប់ជ្រុងជ្រោយ ជាមិត្តដែកថែប និងការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី គ្រប់រដូវកាល។
ទន្ទឹមនឹងនេះ ឯកឧត្តមរដ្ឋលេខាធិការ បានគូសបញ្ជាក់បន្ថែមអំពីការចុះកិច្ចព្រមព្រៀងលើពិធីសារនូវផលិតផល ៣ មុខបន្ថែមទៀតក្នុងនោះមាន៖សំបុកត្រចៀកកាំ ទុរេន និងសត្វក្រពើ និងផលិតផលផ្សេងទៀតកំពុងបានពិភាក្សាគ្នាបន្តក្នុងគោលដៅជំរុញកសិ-ពាណិជ្ជកម្មបន្ថែមរវាងប្រទេសទាំងពីរ។
ឯកឧត្តមរដ្ឋលេខាធិការ ក៏បានលើកទឹកចិត្តដល់គណៈប្រតិភូចិនពិនិត្យលទ្ធភាពក្នុងការស្វែងរកឱកាសវិនិយោគក្នុងប្រទេសកម្ពុជា ដល់ផ្ដោតលើការកែច្នៃ វេចខ្ចប់ ធ្វើទីផ្សារ និងនាំចេញ ហើយអង្គប្រជុំបានឯកភាពបន្តកិច្ចពិភាក្សាជាមួយគ្នាបន្ថែមទៀត លើកិច្ចសហប្រតិបត្តិការជាក់ស្តែង និងច្បាស់លាស់៕