ឯកឧត្តរដ្ឋលេខាធិការ ហ៊ាន វណ្ណហន អញ្ជើញដឹកនាំកិច្ចប្រជុំបូកសរុបការងារប្រចាំឆ្នាំ២០២៥ និងទិសដៅការងារឆ្នាំ២០២៦ ការងារកសិកម្ម រុក្ខាប្រមាញ់ និងនេសាទខេត្ដរតនគិរី

ចេញ​ផ្សាយ​ ១៥ មករា ២០២៦ 2343

នៅថ្ងៃទី២៥ ខែមេសា ឆ្នាំ២០២៥  ឯកឧត្ដម ហ៊ាន វណ្ណហន រដ្ឋលេខាធិការទទួលបន្ទុកការងារកសិកម្ម រុក្ខាប្រមាញ់ និងនេសាទ ខេត្ដរតនគិរី បានអញ្ជើញដឹកនាំកិច្ចប្រជុំបូកសរុបការងារប្រចាំឆ្នាំ២០២៥ និងទិសដៅការងារឆ្នាំ២០២៦ ការងារកសិកម្ម រុក្ខាប្រមាញ់ និងនេសាទខេត្ដរតនគិរី។
កិច្ចប្រជុំនេះ មានការអញ្ជើញចូលរួមពីឯកឧត្ដម ម៉ា វិចិត្រ  អភិបាលរងនៃគណៈអភិបាលខេត្ដរតនគិរី លោក លោកស្រី ថ្នាក់ដឹកនាំមន្ទីរ ប្រធាន អនុប្រធាន និងមន្រ្ដីនៃការិយាល័យ នាយខណ្ឌរដ្ឋបាលព្រៃឈើ-ជលផលនៃមន្ទីរកសិកម្មខេត្ដ តំណាងមន្ទីរពាក់ព័ន្ធ និងមន្រ្ដីកសិកម្មឃុំ សរុបចំនួន ១១២ រូប។
នាឱកាសនោះ លោកបណ្ឌិត សយ សូណា ប្រធានមន្ទីរកសិកម្ម រុក្ខាប្រមាញ់ និងនេសាទ បានសង្ខេបពីលទ្ធផលសម្រេចបានរយៈពេល១២ខែ ដើមឆ្នាំ២០២៥ របស់មន្ទីរកសិកម្មខេត្ដរតនគិរី ជូនអង្គប្រជុំ និងបន្តដោយកិច្ចពិភាក្សាដោយមានការចូលរួមធ្វើបទបង្ហាញ ពិគ្រោះយោបល់ និងលើកបញ្ហាប្រឈមនានា ពីលោក លោកស្រី ជាប្រធាន អនុប្រធាន ការិយាល័យ និងខណ្ឌរដ្ឋបាលរបស់មន្ទីរ មន្រ្ដីកសិកម្មឃុំ និងអង្គការដៃគូរ។ 
បន្ទាប់ពីបានពិនិត្យលើរបាយការណ៍ និងកិច្ចពិភាក្សា ឯកឧត្ដមបណ្ឌិត ក៏បានបូកសរុបរបាយការណ៍កិច្ចប្រជុំនិងផ្ដល់ជាអនុសាសន៍ណែនាំមួយចំនួន លើការជំរុញផលិតកម្មដំណាំ ការចិញ្ចឹមសត្វ វារីវប្បកម្ម និងការគ្រប់គ្រងនិងអភិរក្សធនធានធម្មជាតិកសិកម្ម។  
បន្ថែមពីនេះទៀត លោកបណ្ឌិត ក៏បានជំរុញមន្ទីរបន្ដអនុវត្ដទស្សនៈទានសម្រាប់ឆ្នាំ ២០២៦ រួមមាន: ការអភិវឌ្ឍន៍ខ្សែច្រវ៉ាក់ផលិតកម្មកសិកម្ម  ការរៀបចំខ្សែច្រវ៉ាក់ផលិតកម្មកសិកម្ម  ការបង្កើនផលិតភាពផលិតកម្មស្វាយចន្ទី (មានស្រាប់) និងជំរុញការដាំបន្លែសុវត្ថិភាព  ការជំរុញផលិតកម្មទុរេនសម្រាប់នាំចេញ (កសិកម្មល្អGAP) ព្រមទាំងជំរុញការចិញ្ចឹមគោពាណិជ្ជកម្មខ្នាតតូច៕