ថ្នាក់ដឹកនាំក្រសួងកសិកម្ម អញ្ជើញចូលរួមកិច្ចប្រជុំពិនិត្យវឌ្ឍនភាពគម្រោង EU-German GATE ក្នុងការជំរុញការនាំចេញកសិផលកម្ពុជា​ទៅកាន់ទីផ្សារ​អន្តរជាតិ

ចេញ​ផ្សាយ​ ២២ កញ្ញា ២០២៦ 334

នៅព្រឹកថ្ងៃទី២២ ខែកញ្ញា ឆ្នាំ២០២៦ លោកជំទាវ យ៉ើ អាស៊ីគីន អនុរដ្ឋលេខា​ធិការ ក្រសួងកសិកម្ម រុក្ខាប្រមាញ់ និងនេសាទ អមដំណើរដោយមន្ត្រីជំនាញនៃនាយកដ្ឋានសហប្រតិបត្តិការអន្តរជាតិ និងអគ្គនាយកដ្ឋាន​ក្សេត្រ​សាស្ត្រ បានអញ្ជើញចូលរួមកិច្ចប្រជុំគណៈកម្មការតម្រង់ទិសគម្រោង (PSC) លើកទី៤ ស្តីពី «ភាពជាដៃគូសហភាពអឺរ៉ុប និងអាល្លឺម៉ង់ ដើម្បីបើក​ច្រក​ទីផ្សារសកល និងជំនាញពាណិជ្ជកម្ម» (EU-German GATE Project) នៅទីស្តីការក្រសួងពាណិជ្ជកម្ម ក្រោមអធិបតីភាពដ៏ខ្ពង់ខ្ពស់របស់ លោកជំទាវ តឹក រ៉េតកំរង រដ្ឋលេខាធិការ ក្រសួងពាណិជ្ជកម្ម និងមានការចូលរួមពីតំណាង​ក្រសួង-ស្ថាប័នរដ្ឋ ព្រមទាំងវិស័យឯកជនពាក់ព័ន្ធ។
កិច្ចប្រជុំមានគោលបំណងពិនិត្យ និងវាយតម្លៃវឌ្ឍនភាពនៃការអនុវត្តគម្រោង EU-German GATE ដែលជាគម្រោងជំនួយបច្ចេកទេសគាំទ្រដោយសហភាព​អឺរ៉ុប (EU) និងរដ្ឋាភិបាលអាល្លឺម៉ង់ ក្នុងការជំរុញការបើកច្រកទីផ្សារអន្តរជាតិ ពង្រឹងសមត្ថភាពជំនាញពាណិជ្ជកម្ម និងការសម្រួលការនាំចេញកសិផល​កម្ពុជាទៅកាន់ទីផ្សារអន្តរជាតិ ឱ្យកាន់តែមានប្រសិទ្ធភាព តម្លាភាព និងចីរភាព។
នៅក្នុងកិច្ចប្រជុំ តំណាងក្រសួងកសិកម្ម បានលើកបង្ហាញពីវឌ្ឍនភាពសំខាន់ៗ នៃការអភិវឌ្ឍប្រព័ន្ធវិញ្ញាបនកម្មភូតគាមអនាម័យអេឡិចត្រូនិក (ePhyto System) រួមមាន៖ ការបញ្ចប់ការធ្វើតេស្តមុខងារ e-Payment ជាមួយធនាគារ អេស៊ីលីដា ការធ្វើតេស្តផ្លាស់ប្តូរទិន្នន័យ ePhyto ជាមួយប្រទេសថៃ តាមរយៈ ASW/CNSW ការរៀបចំតភ្ជាប់ជាមួយប្រទេសឥណ្ឌូនេស៊ី និងការបណ្តុះបណ្តាលមន្ត្រីជំនាញ និងធុរជន។ ប្រព័ន្ធនេះ​គ្រោង​នឹងដាក់ឱ្យដំណើរការជាផ្លូវការ (Go-Live) នៅចុងឆ្នាំ២០២៦ ដើម្បី​ឆ្លើយ​តបទៅនឹងការកើនឡើង នៃការនាំចេញកសិផលកម្ពុជា និងលើកកម្ពស់​តម្លា​ភាពពាណិជ្ជកម្មនៅលើឆាកអន្តរជាតិ៕