ឯកឧត្តម មាស ពិសិដ្ឋ ដឹកនាំសិក្ខាសាលាបណ្តុះបណ្តាលស្តីពីព័ត៌មានសម្រាប់ការគ្រប់គ្រងគម្រោង និងការថែរក្សាធនធានធម្មជាតិ បរិស្ថាន សង្គម និងអាកាសធាតុ

ចេញ​ផ្សាយ​ ៨ ឧសភា ២០២៦ 4824

នៅថ្ងៃទី៧ និងទី៨ ខែឧសភា ឆ្នាំ ២០២៦ ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំមន្ត្រី និងទីប្រឹក្សាជំនាញចំនួន៨៩នាក់ (ក្នុងនោះ មានស្ត្រី ១៥ នាក់) ដំណើរការសិក្ខាសាលាបណ្តុះបណ្តាលខាងលើ នៅទីរួមខេត្តកំពត ដើម្បីពិនិត្យវឌ្ឍនភាពនៃការគ្រប់គ្រង និងអនុវត្ត «កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT)» និងគម្រោង « ការបង្កើនភាពធន់នឹងអាកាសធាតុ ក្នុងខ្សែច្រវាក់តម្លៃកសិកម្មនៅកម្ពុជា (CREA Project) » ហើយពិគ្រោះ និងរៀនសូត្រអំពីដំណោះស្រាយ កិច្ចការ និងវិធីសាស្ត្រដែលត្រូវអនុវត្តបន្ត សំដៅធ្វើឱ្យសម្រេចនូវលទ្ធផលដែលកម្មវិធី និងគម្រោងបានគ្រោង ពោលគឺរួមចំណែកអភិវឌ្ឍវិស័យកសិកម្មជាតិ ជាពិសេសគឺផ្តល់ផលប្រយោជន៍ឱ្យបានច្រើនបំផុត ជូនកសិករ សហគមន៍កសិកម្ម និងក្រុមហ៊ុនកសិកម្មគោលដៅ ។
ព្រឹត្តិការណ៍នេះបានផ្តោតជាសំខាន់លើការស្រង់ កត់ត្រា វិភាគ និងបកស្រាយទិន្នន័យ និងព័ត៌មាន ពាក់ព័ន្ធនឹងការគ្រប់គ្រង និងអនុវត្តសកម្មភាពនៅកសិដ្ឋាន សហគមន៍កសិកម្ម និងក្រុមហ៊ុនកសិកម្មគោលដៅ ព្រមទាំងការបញ្ជ្រាបការយកចិត្តទុកដាក់ និងវិធីថែរក្សា ឬ អភិរក្សធនធានធម្មជាតិ បរិស្ថាន សង្គម និងអាកាសធាតុ ឱ្យស្របនឹងគោលនយោបាយរបស់ជាតិ យុទ្ធសាស្ត្ររបស់ក្រសួងកសិកម្ម រុក្ខាប្រមាញ់ និងនេសាទ ព្រមទាំងគោលការណ៍របស់ស្ថាប័នអន្តរជាតិ ដែលគាំទ្រហិរញ្ញប្បទាន និងបច្ចេកទេស គឺមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) សហភាពអឺរ៉ុប (EU) ធនាគារវិនិយោគអឺរ៉ុប (EIB) មូលនិធិបរិស្ថានសាកល (GEF) និងអង្គការកិច្ចសហប្រតិបត្តិការត្បូង-ត្បូង និងត្រីកោណ (SSTC)៕