ឯកឧត្តមរដ្ឋលេខាធិការ ឱម គឹមស៊ា អញ្ជើញដឹកនាំប្រជុំពិភាក្សាអំពីវឌ្ឍនភាពការងារប្រចាំត្រីមាសទី១ ឆ្នាំ២០២៦

ចេញ​ផ្សាយ​ ១១ មីនា ២០២៦ 1631

នៅថ្ងៃទី១១ ខែមីនា ឆ្នាំ២០២៦ ឯកឧត្ដម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការតម្រង់ទិសសម្រាប់កម្មវិធីឡជីវឧស្ម័នជាតិ បានអញ្ជើញដឹកនាំកិច្ចប្រជុំពិភាក្សាអំពីវឌ្ឍនភាពការងារប្រចាំត្រីមាសទី១ ឆ្នាំ២០២៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
កិច្ចប្រជុំនេះមានការអញ្ជើញចូលរួមពីឯកឧត្តម កៅ ផល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្ដម ឃី វិបុលបុត្រា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្ដម គឹម សាវឿន ទីប្រឹក្សាក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធីឡជីវឧស្ម័នជាតិ លោក ស៊ាង សុខលីម អគ្គនាយករង នៃអគ្គនាយកដ្ឋានសុខភាពសត្វ និងផលិតកម្មសត្វ។
ឯកឧត្តមរដ្ឋលេខាធិការ បានគូសបញ្ជាក់ថា ក្រុមការងារបានពិភាក្សា និងវាយតម្លៃលើលទ្ធផលការងារដែលសម្រេចបានក្នុងរយៈពេល ៣ខែដើមឆ្នាំ (ត្រីមាសទី១) ឆ្នាំ២០២៦ របស់កម្មវិធីឡជីវឧស្ម័នជាតិ ព្រមទាំងបានពិភាក្សាលើបញ្ហាប្រឈម និងដាក់ចេញនូវផែនការសកម្មភាពសម្រាប់ត្រីមាសបន្តបន្ទាប់ ដើម្បីជំរុញការប្រើប្រាស់ថាមពលកកើតឡើងវិញក្នុងវិស័យកសិកម្ម។
តាមរយៈកិច្ចប្រជុំនេះ គណៈកម្មាធិការតម្រង់ទិសនឹងទទួលបាននូវធាតុចូលសំខាន់ៗ ដើម្បីកែលម្អប្រសិទ្ធភាពការងារបច្ចេកទេស និងការពង្រីកវិសាលភាពនៃកម្មវិធីឡជីវឧស្ម័នឱ្យកាន់តែមានភាពប្រសើរឡើង ឆ្លើយតបទៅនឹងគោលនយោបាយអភិវឌ្ឍន៍វិស័យកសិកម្ម និងបរិស្ថាន៕