ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម បានអញ្ជើញចូលរួមបើកកម្មវិធី អបអរសាទរសមិទ្ធផលនៃភាពជាដៃគូរវាង មជ្ឈមណ្ឌលឧត្តមភាពប្រពលវប្បកម្មកសិកម្មនិរន្តរភាព និងអាហារូបត្ថម្ភ (ស៊ីសេន)

ចេញ​ផ្សាយ​ ១៧ មិថុនា ២០២៤ 2278

នៅថ្ងៃទី១៧ ខែមិថុនា ឆ្នាំ២០២៨ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រី ឌិត ទីណា បានអញ្ជើញចូលរួមបើកកម្មវិធី អបអរសាទរសមិទ្ធផលនៃភាពជាដៃគូរវាង មជ្ឈមណ្ឌលឧត្តមភាពប្រពលវប្បកម្មកសិកម្មនិរន្តរភាព និងអាហារូបត្ថម្ភ (ស៊ីសេន) នៃសាកលវិទ្យាល័យភូមិន្ទកសិកម្ម និងដៃគូអនុវត្តសកម្មភាព។

នៅក្នុងអង្គពិធីឯកឧត្តម ចាន់ សុវុឌ្ឍ មានប្រសាសន៍ថា មជ្ឈមណ្ឌលឧត្តមភាព ស៊ីសេន ជាផ្នែកមួយនៃកិច្ចសហប្រតិបត្តិការដោយផ្ទាល់របស់ទីភ្នាក់ងារជំនួយសហរដ្ឋអាមេរិក USAID ជាមួយសាកលវិទ្យាល័យភូមិន្ទកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ហើយកិច្ចសហប្រតិបត្តិការនេះ ក៏បានពង្រីកដល់អង្គភាពផ្សេងទៀត។ មជ្ឈមណ្ឌលបាននឹងកំពុងចូលរួមជួយគាំទ្រយ៉ាងសកម្មដល់សកម្មភាពផ្សព្វផ្សាយកសិកម្ម របស់សាកលវិទ្យាល័យភូមិន្ទកសិកម្ម តាមរយៈការផ្សារភ្ជាប់ពីនវានុវត្តន៍កសិកម្មចេញពីការស្រាវជ្រាវ ជាមួយនឹងតម្រូវការគាំទ្របច្ចេកទេសរបស់កសិករ និងយន្តការជំរុញការចូលរួមរបស់និស្សិត ដើម្បីទទួលបានបទពិសោធន៍ជាក់ស្តែងក្នុងអំឡុងពេលសិក្សា។

ឯកឧត្តមរដ្ឋលេខាធិការបញ្ជាក់ថា តាមរយៈការប្រឹក្សាពីសាកលវិទ្យាល័យភូមិន្ទកសិកម្ម មជ្ឈមណ្ឌលឧត្តមភាពស៊ីសេន ក៏បានកៀរគរការគាំទ្រពីដៃគូអភិវឌ្ឍន៍ដទៃទៀត ដើម្បីចូលរួមជាមួយយន្តការមានស្រាប់របស់សាកលវិទ្យាល័យ ដែលគាំទ្រដោយ USAID និងបានសម្រេចនូវសមិទ្ធផលជាច្រើន ក្នុងការចូលរួមក្នុងដំណើរការអភិវឌ្ឍន៍វិស័យកសិកម្មនៅប្រទេសកម្ពុជាផងដែរ។

បន្ថែមពីនេះ ឯកឧត្តមក៏បានផ្តល់ជាអនុសាសន៍ណែនាំមួយចំនួនដល់សាកលវិទ្យាល័យភូមិន្ទកសិកម្មដូចជា សាកលវិទ្យាល័យភូមិន្ទកសិកម្ម តាមរយៈមជ្ឈមណ្ឌលឧត្តមភាពស៊ីសេន គួរតែពង្រីកកិច្ចសហប្រតិបត្តិការបន្ថែមទៀតជាមួយអង្គភាពក្រោមឱវាទក្រសួងកសិកម្ម និងស្ថាប័នពាក់ព័ន្ធ ដើម្បីសិក្សាពីការបង្កើតគំរូផ្សព្វផ្សាយកសិកម្មតាមបរិបទខុសៗគ្នា គួរតែសិក្សាពីលទ្ធភាពបង្កើតយន្តការសម្របសម្រួលក្នុងការប្រមូល និងរក្សាទុកព័ត៌មាន និងទិន្នន័យពាក់ព័ន្ធនឹងបញ្ហាបច្ចេកទេសនានា ដោយសហការជាមួយមន្រ្តីកសិកម្មឃុំ ដើម្បីប្រើប្រាស់ជាធាតុចូល សម្រាប់ការរៀបចំប្រធានបទស្រាវជ្រាវអនុវត្ត និងផលិតចេញជាដំណោះស្រាយដែលនឹងត្រូវយកទៅប្រើប្រាស់។

ជាមួយគ្នានោះត្រូវបន្តកៀរគរការគាំទ្របន្ថែម ដើម្បីបង្កើតកម្មវិធីជួយដល់ការពង្រឹងសមត្ថភាពមន្រ្តីផ្សព្វផ្សាយកសិកម្មឃុំ ដែលជាភ្នាក់ងារផ្សព្វផ្សាយកសិកម្មដ៏សំខាន់នៅតាមមូលដ្ឋាន និងជួយផលិតធនធានមនុស្សលើជំនាញផ្សព្វផ្សាយកសិកម្ម ហើយគួរតែបង្កើតយន្តការ និងស្វែងរកការគាំទ្រហិរញ្ញវត្ថុក្នុងការដាក់ពង្រាយនិស្សិតដែលកំពុងសិក្សានៅតាមមូលដ្ឋានជាមួយមន្រ្តីកសិកម្ម ដើម្បីទទួលបានបទពិសោធន៍បំពេញការងារជាក់ស្តែងដែលនឹងជួយដល់ការកសាងទំនុកចិត្ត ការបញ្ចប់ការសិក្សាប្រកបដោយគុណភាពខ្ពស់ជាដើម៕