ឯកឧត្តមអនុរដ្ឋលេខាធិការ គី ច័ន្ទរំដួល អញ្ជើញជាអធិបតីភាពក្នុងពីធីបិទវេទិកាផ្លាស់ប្តូរបទពិសោធន៍និងចំណេះដឹងលើការប្រើប្រាស់ធាតុចូលកសិកម្មលើដំណាំដំឡូងមី រវាងកសិធុរកិច្ចនិងអ្នកពាក់ព័ន្ធ ដើម្បីនិរន្តរភាពបរិស្ថាន នៅខេត្តត្បូងឃ្មុំ

ចេញ​ផ្សាយ​ ១៤ តុលា ២០២៥ 213

នៅថ្ងៃទី១៣ ខែតុលា ឆ្នាំ២០២៥ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបិទវេទិកាផ្លាស់ប្តូរបទពិសោធន៍ និងចំណេះដឹងលើការប្រើប្រាស់ធាតុចូលកសិកម្មលើដំណាំដំឡូងមី រវាងកសិធុរកិច្ច និងអ្នកពាក់ព័ន្ធ ដើម្បីនិរន្តរភាពបរិស្ថាន នៅសណ្ឋាគារភីអេនធី ផាលេស ត្បូងឃ្មុំ ដែលគាំទ្រដោយគម្រោងខ្សែច្រវាក់ផលិតកម្មដោយភាតរបរិស្ថាននៃក្រសួងកសិកម្ម រុក្ខាប្រមាញ់ និងនេសាទ ដែលមានការចូលរួមពីក្រុមហ៊ុន ហ្គ្រីន ហ្វីត ក្រុមហ៊ុន អាហ្គ្រូ ឃីង និងសហគមន៍កសិកម្មដែលមានដាំដុះដំឡូងមី។
នាឱកាសនេះ ឯកឧត្តមអនុរដ្ឋលេខាធិការ បានពន្យល់បន្ថែមពីគោលនយោបាយអាទិភាពទី៥និងទី៦ របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា ដែលបានដាក់ចេញលើវិស័យកសិកម្មគឺ ការរក្សាលំនឹងថ្លៃកសិផល ការពង្រាយមន្ត្រីកសិកម្មឃុំ និងការអភិវឌ្ឍន៍សហគមន៍កសិកម្មទំនើប។ ជាមួយគ្នានេះដែរឯកឧត្តម ក៏បានណែនាំក្រុមហ៊ុន Agro king Trading , ក្រុមហ៊ុន GreenFeed និងសហគមន៍ដំឡូងមី មានកិច្ចសហការគ្នាប្រកបដោយតម្លាភាព ស្មោះត្រង់ទុកចិត្តគ្នាដើម្បីរក្សាបាននូវទំនុកចិត្តយូរអង្វែង៕