ព័ត៌មានផ្សេងៗទៀត
ឯកឧត្ដម ឱម គឹមស៊ា រដ្ឋលេខាធិការក្រសួងកសិកម្ម អញ្ជើញដឹកនាំក្រុមការងារជំនាញចុះពិនិត្យផ្ទាល់នៅតំបន់ដែលរងផលប៉ះពាល់ពីការបំផ្លាញរបស់ដង្កូវហ្វូង នៅឃុំជើងគ្រាវ ស្រុករលាប្អៀរ ខេត្តកំពង់ឆ្នាំង
ចេញផ្សាយ ២៧ មិថុនា ២០២៤ 1896
នៅថ្ងៃទី២៦ ខែមិថុនា ឆ្នាំ២០២៤ ឯកឧត្ដម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំមន្រ្តីនៃអគ្គនាយកដ្ឋានកសិកម្ម លោកប្រធានមន្ទីរកសិកម្មខេត្តកំពង់ឆ្នាំង លោកអភិបាលរងស្រុករលាប្អៀរ លោកមេឃុំជើងគ្រាវ មន្រ្តីកសិកម្មឃុំ និងក្រុមការងារ ចុះពិនិត្យផ្ទាល់នៅតំបន់ដែលរងផលប៉ះពាល់ ពីការបំផ្លាញរបស់ដង្កូវហ្វូងចំនួន ១១ហិកតា នៅឃុំជើងគ្រាវ ស្រុករលាប្អៀរ។ ប្រភេទដង្កូវហ្វូងដែលបានរកឃើញលើស្រែកសិករ ជាប្រភេទដង្កូវហ្វូងមានឈ្មោះវិទ្យាសាស្ត្រ Spodoptera Mauritia (បំផ្លាញដោយដុំៗ)។
នៅក្នុងខេត្តកំពង់ឆ្នាំង មានស្រុកចំនួន៥ គឺ ស្រុកបរិបូរណ៍ កំពង់ត្រឡាច រលាប្អៀរ សាមគ្គីមានជ័យ និងស្រុកទឹកផុស មានបញ្ហាដង្កូវហ្វូងបានធ្វើការបំផ្លាញដំណាំស្រូវលើផ្ទៃដីចំនួន១៧៧ហិកតា។ ប៉ុន្តែដោយមានការអន្តរាគមន៍ជាបន្តបន្ទាប់ពីសំណាក់មន្ទីរកសិកម្មខេត្ត មន្ត្រីកសិកម្មឃុំ អាជ្ញាធរមូលដ្ឋាន និងប្រជាកសិករផ្ទាល់ មកដល់ពេលនេះ ដំណាំស្រូវបានលូតលាស់ល្អប្រសើរឡើងវិញចំនួន ១៦០ហិកតា។ បច្ចុប្បនុ្ននៅសល់ ១៧ហិកតាកំពុងរងផលប៉ះពាល់ជាលក្ខណៈស្បែកខ្លា និងតិចតួចប៉ុណ្ណោះ ហើយស្ថិតនៅក្រោមការតាមដានជាប្រចាំ។
នាឱកាសនៃការចុះត្រួតពិនិត្យនោះ ក្រុមការងារបានណែនាំដល់ប្រជាកសិករឱ្យឧស្សាហ៍ចុះមកមើលស្រែ និងមានវិធានការកម្ចាត់សមាសភាពចង្រៃ តាមវិធីសាស្រ្តមេកានិក និងវិធីសាស្រ្តគីមីរួមមាន៖ ទី១ វិធានការការពារ ត្រូវធ្វើការសម្អាតស្មៅនៅតាមភ្លឺស្រែ ឬគម្ពោធព្រៃនៅជុំវិញស្រែដែលជាជម្រករបស់ដង្កូវហ្វូង ត្រូវជីកចង្អូរទំហំ២តឹកជម្រៅ៣តឹក រោយផេះក្នុងរណ្ដៅការពារកុំឲ្យដង្កូវរាលដាលទៅស្រែផ្សេងទៀត។ ទី២ វិធានការកំចាត់ លែងទាឱ្យស៊ីដង្កូវនៅក្នុងស្រែ ពន្លិចទឹកនៅក្នុងស្រែ និងវិធីសាស្ត្រគីមី សម្រាប់ការប្រើប្រាស់ថ្នាំកម្ចាត់សត្វល្អិត ដែលមានស្លាកសញ្ញាជាភាសារខ្មែរទទួលស្គាល់ដោយក្រសួងកសិកម្ម៕
