ឯកឧត្តមរដ្ឋលេខាធិការ ហាស់ សារ៉េត អញ្ជើញចូលរួមក្នុងពិធី យុទ្ធនាការគាំទ្រ និងទិវាសុវត្ថិភាពអ៊ីនធឺណិត ឆ្នាំ២០២៦ ក្រោមប្រធានបទ «ការប្រើប្រាស់ AI ប្រកបដោយសុវត្ថិភាព ក្រមសីលធម៌ និងការទទួលខុសត្រូវ»

ចេញ​ផ្សាយ​ ១៧ កុម្ភៈ ២០២៦ 2677

នៅថ្ងៃទី១៧ ខែកុម្ភៈ ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញចូលរួមក្នុងពិធី យុទ្ធនាការគាំទ្រ និងទិវាសុវត្ថិភាពអ៊ីនធឺណិត ឆ្នាំ២០២៦ ក្រោមប្រធានបទ “ការប្រើប្រាស់ AI ប្រកបដោយសុវត្ថិភាព ក្រមសីលធម៌ និងការទទួលខុសត្រូវ” នៅសាកលវិទ្យាល័យភូមិន្ទកសិកម្ម។ 
ពិធីនេះ ប្រព្រឹត្តទៅក្រោមអធិបតីភាព ដ៏ខ្ពង់ខ្ពស់ពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិ គ.ជ.ប.ជ  និងមានការចូលរួមពីលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ក្រសួងអប់រំ យុវជន និងកីឡា ក្រសួងព័ត៌មាន ក្រសួងប្រៃសណីយ៍ និងទូរគមនាគមន៍ ក្រុមប្រឹក្សាជាតិដើម្បីកុមារ អង្គការសកម្មភាពដើម្បីកុមារ ព្រមទាំង កុមារ យុវជនកាយរិទ្ធិ កាកបាទក្រហម ស.ស.យ.ក  សិស្ស និស្សិត គណៈគ្រប់គ្រងសាលា គ្រូបង្រៀន មន្ត្រីរាជរដ្ឋាភិបាល តំណាងអង្គការសង្គមស៊ីវិល តំណាងក្រុមហ៊ុនឧស្សាហកម្ម បច្ចេកវិទ្យាឌីជីថល និងតំណាងប្រព័ន្ធផ្សព្វផ្សាយ សរុបប្រមាណ២៥០០នាក់។
នៅចំពោះមុខអង្គពិធី ឯកឧត្តមរដ្ឋលេខាធិការ បានធ្វើសុន្ទរកថាស្វាគមន៍ថា កម្មវិធីយុទ្ធនាការគាំទ្រទិវាសុវត្ថិភាពអ៊ីនធឺណិតឆ្នាំ២០២៦ នៅកម្ពុជានាថ្ងៃនេះ មានគោលបំណងជាក់លាក់ អំពីសារៈសំខាន់នៃសុវត្ថិភាពតាមអនឡាញ និងការប្រើប្រាស់អ៊ីនធឺណិតប្រកបដោយការទទួលខុសត្រូវ ដែលត្រូវឱ្យមានការចូលរួមអប់រំ និងលើកកម្ពស់ការយល់ដឹងរបស់កុមារ យុវជន គ្រូបង្រៀន មន្ត្រីអប់រំ អាជ្ញាធរ និងអ្នកពាក់ព័ន្ធដទៃទៀត។ ក្នុងន័យនេះ ក្រសួងកសិកម្ម រុក្ខាប្រមាញ់ និងនេសាទ ក៏បានដាក់ចេញនូវ «ផែនការយុទ្ធសាស្ត្រឌីជីថលលូបនីយកម្ម ឆ្នាំ២០២៤-២០២៨» ដើម្បីចូលរួមគាំទ្រដល់ការអនុវត្តគោលនយោបាយ របស់រាជរដ្ឋាភិបាល ការធ្វើបរិវត្តកម្មឌីជីថល ដែលអាចជួយពន្លឿនប្រតិបត្តិការក្នុងវិស័យកសិកម្ម បង្កើនប្រសិទ្ធភាពសេដ្ឋកិច្ច និងធ្វើឱ្យការផ្តល់សេវាសាធារណៈកាន់តែប្រសើរឡើង តាមរយៈការបង្កើនការប្រើប្រាស់បច្ចេកវិទ្យាឌីជីថល។
ក្នុងស្មារតីនេះ ឯកឧត្តមរដ្ឋលេខាធិការ បានគូសបញ្ជាក់ថា ដើម្បីចូលរួមយុទ្ធនាការគាំទ្រទិវាសុវត្ថិភាពអ៊ីនធឺណិត តាមរយៈការប្រើប្រាស់ AI ប្រកបដោយសុវត្ថិភាព ក្រមសីលធម៌ និងការទទួលខុសត្រូវ ក្រសួងកសិកម្ម រុក្ខាប្រមាញ់ និងនេសាទ នឹងបន្តសហការជាមួយស្ថាប័នពាក់ព័ន្ធ ដើម្បីលើកកម្ពស់ការសិក្សាស្រាវជ្រាវ និងនវានុវត្តន៍ឌីជីថលក្នុងវិស័យកសិកម្ម បណ្តុះបណ្តាលគ្រូបង្រៀន និងនិស្សិតអំពីសុវត្ថិភាពអ៊ីនធឺណិត និងក្រមសីលធម៌ឌីជីថល ប្រកបដោយទំនួលខុសត្រូវ។
ជាចុងបញ្ចប់ ឯកឧត្តមរដ្ឋលេខាធិការតំណាងដ៏ខ្ពង់ខ្ពស់ពីឯកឧត្តមរដ្ឋមន្ត្រី ឌិត ទីណា ក៏បានទទួលលិខិតសរសើរពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិ គ.ជ.ប.ជ ផងដែរ៕