ព័ត៌មានផ្សេងៗទៀត
យើងត្រូវជំរុញដំណាំកៅស៊ូ និងម្រេចជាលក្ខណគ្រួសារឲ្យបានល្អប្រសើរ
ចេញផ្សាយ ២២ មករា ២០១៨ 4237
យើងត្រូវជំរុញដំណាំកៅស៊ូ និងម្រេចជាលក្ខណគ្រួសារឲ្យបានល្អប្រសើរ នេះជាប្រសាសន៍ណែនាំរបស់ឯកឧត្តមរដ្ឋមន្ត្រី ក្នុងឱកាសចុះទៅពិនិត្យដំណាំកៅស៊ូ និងម្រេចគ្រួសាររបស់លោក អ៊ាន ស៊ីថា នៅភូមិជើងឃ្លូ ឃុំ២ធ្នូ ស្រុកស្នួល កាលពីថ្ងៃទី០៨ ខែវិច្ឆិកា ឆ្នាំ ២០១២ រួមដំណើរជាមួយឯកឧត្តមអនុរដ្ឋលេខាធិការ ទីប្រឹក្សាក្រសួង និងមន្ដ្រី ថ្នាក់ដឹកនាំនាយកដ្ឋានជំនាញមួយចំនួនទៀត។
យោងលើរបាយការណ៍លោកប្រធានមន្ទីរកសិកម្មខេត្តបញ្ជាក់ថា ៣ ឆ្នាំចុងក្រោយនេះ ផ្ទៃដីដំណាំកៅស៊ូជាលក្ខណៈគ្រួសារមានការកើនឡើង បច្ចុប្បន្នមានផ្ទៃដីសរុបចំនួន ១៨២២០ ហត បានដាំលើផ្ទៃដីស្របច្បាប់និងមានការទទួលស្ទាល់ពីអាជ្ញាធរដែនដី។ ចំពោះដំណាំម្រេចជាលក្ខណៈគ្រួសារគិតចាប់ពីឆ្នាំ ២០០៩ ដល់ ២០១២ ដាំបានចំនួន ២៥២ ហត។ មានមតិណែនាំដល់ប្រជាកសិករនៅទីនោះ ឯកឧត្តមសុំឲ្យបង ប្អូនយកចិត្តទុកដាក់លើការងារបច្ចេកទេសបន្ថែមទៀត ថ្វីត្បិតយើងមានបទពិសោធន៍យ៉ាងច្រើនជាមួយការងារអនុវត្ត ប៉ុន្តែបើយើងចេះទាំងទ្រឹស្តី រួមទាំងបទពិសោធន៍ក្នុងការអនុវត្តច្រើនឆ្នាំនោះផលិតកម្មនឹងមានការរីកចម្រើនទាំងបរិមាណ និងគុណភាព ដែលកត្តាទាំងពីរនេះទីផ្សារទាំងក្នុងនិងក្រៅស្រុកកំពុងតែត្រូវការជាចាំបាច់។
ការជ្រើសរើសពូជគឺជាជម្រើសទី ១ ដែលត្រូវយកចិត្តទុកដាក់ពីព្រោះពូជជាកត្តាទី ១ ក្នុងការកំណត់ទិន្នផល ពូជនេះទៀតសោធន៍ ត្រូវសិក្សាស្រាវជ្រាវបន្ថែមទៀតពិសេសពូជដែលធននឹងអាកាសធាតុនៅស្រុកយើង សមស្របនឹងភូមិសាស្ត្រ ធន់នឹងជំងឺ ថែមទាំងផ្តល់ផលិតផលខ្ពស់។ ការងារនេះអគ្គនាយកដ្ឋានកៅស៊ូ អគ្គនាយកដ្ឋានកសិកម្មត្រូវដើរមុខនាំមុន ស្វះស្វែងរកជំនួយបច្ចេកទេ និងថវិកាពីដៃគូអភិវឌ្ឍន៍ធ្វើយ៉ាងណាជំរុះវិស័យនេះឲ្យមានការរីកចម្រើនសមស្របទៅតាម តម្រូវការទីផ្សារដែលចេះតែកើនឡើងជាលំដាប់។
កៅស៊ូ និងម្រេចជាដំណាំឧស្សាហកម្មដែលជួយឲ្យក្រួសារកសិករ រកចំណូលបានយ៉ាងល្អប្រសើរជារៀងរាល់ឆ្នាំ បើដូច្នេះអគ្គនាយកដ្ឋានកៅស៊ូ និងអគ្គនាយកដ្ឋានកសិកម្ម សហការជាមួយមន្ទីរត្រូវរៀបចំចងក្រងជាសហគមន៍ផលិត និងកែច្នៃដើម្បីងាយធ្វើការគ្រប់គ្រង និងផ្សព្វផ្សាយបច្ចេកទេស ក៏ដូចជាផ្តល់ឱកាសឲ្យសមាជិកខ្ចីប្រាក់ពីធនាគារយកមកពង្រីកផលិតកម្មបានទៀតផង។ មន្ទីរត្រូវរៀបចំទស្សនកិច្ច សិក្សារវាងខេត្តនិងខេត្ត សហគមន៍និងសហគមន៍ ដើម្បីផ្លាស់ប្តូរបទពិសោធន៍។ អគ្គនាយកដ្ឋានកៅស៊ូ ក៏ដូចជាអគ្គនាយកដ្ឋានកសិកម្មគួររៀបចំកម្មវិធីប្រកួតប្រជែង ដើម្បីជ្រើសរើសរកជនគំរូទាក់ទងនឹងវិស័យកៅស៊ូ និងម្រេចគ្រួសារ។
