Other News
ថ្នាក់ដឹកនាំជាន់ខ្ពស់ក្រសួងកសិកម្ម ចុះផ្សព្វផ្សាយច្បាប់ស្តីពីជលផល និងការប្រើប្រាស់ឧបករណ៍នេសាទស្របច្បាប់ ជូនប្រជាពលរដ្ឋ នៅស្រុកកំពង់លែង ខេត្តកំពង់ឆ្នាំង
ចេញផ្សាយ ៧ សីហា ២០២៦ 137
នៅថ្ងៃទី៦ ខែសីហា ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារបច្ចេកទេស ចុះផ្សព្វផ្សាយច្បាប់ស្តីពីជលផល និងការប្រើប្រាស់ឧបករណ៍នេសាទស្របតាមច្បាប់ ជូនដល់អាជ្ញាធរមូលដ្ឋាន និងប្រជានេសាទ ស្ថិតក្នុងស្រុកកំពង់លែង ខេត្តកំពង់ឆ្នាំង។
កម្មវិធីនេះមានការអញ្ជើញចូលរួមពី ឯកឧត្តមអនុរដ្ឋលេខាធិការ ទឹម បូរក្ស ឯកឧត្តម ប៉ែន ផល្លីកា ឯកឧត្តម ម៉ឹង វុធី អភិបាលរងខេត្តកំពង់ឆ្នាំង លោក ងិន ហ៊ុន ប្រធានមន្ទីរកសិកម្មខេត្ត ព្រមទាំងថ្នាក់ដឹកនាំអគ្គនាយកដ្ឋានរដ្ឋបាលជលផល អាជ្ញាធរមូលដ្ឋាន ប្រជានេសាទ និងសមាជិកសហគមន៍នេសាទ សរុបចំនួន២២៤នាក់ មកពីឃុំប្រឡាយមាស និងឃុំផ្លូវទូក។
ការរៀបចំយុទ្ធនាការផ្សព្វផ្សាយនេះ ធ្វើឡើងក្នុងគោលបំណងលើកកម្ពស់ការយល់ដឹងជាសាធារណៈអំពីច្បាប់ស្តីពីជលផល ដើម្បីពង្រឹងប្រសិទ្ធភាព និងនិរន្តរភាពនៃការគ្រប់គ្រង ការអភិរក្សធនធានជលផល។ សកម្មភាពនេះជាផ្នែកមួយយ៉ាងសំខាន់ក្នុងការធានាសន្តិសុខស្បៀង លើកកម្ពស់សេដ្ឋកិច្ចជាតិ ព្រមទាំងការពារសិទ្ធិ និងផលប្រយោជន៍ស្របច្បាប់របស់ប្រជានេសាទ សហគមន៍នេសាទ និងអាជីវករប្រកបមុខរបរពាក់ព័ន្ធនឹងផល និងផលិតផលជលផល។
នាឱកាសនោះ ឯកឧត្តមរដ្ឋលេខាធិការ ហាស់ សារ៉េត បានគូសបញ្ជាក់ពីសារៈសំខាន់នៃច្បាប់ស្តីពីជលផល ដែលជាឧបករណ៍គតិយុត្តដ៏សំខាន់ក្នុងការគ្រប់គ្រង និងប្រមូលផលជលផលប្រកបដោយការទទួលខុសត្រូវ។ ជាមួយគ្នានេះ ឯកឧត្តមបានអំពាវនាវដល់ប្រជានេសាទ និងសហគមន៍ទាំងមូល ត្រូវគោរពតាមបទប្បញ្ញត្តិច្បាប់ជាធរមាន ដោយត្រូវប្រើប្រាស់តែឧបករណ៍នេសាទដែលច្បាប់អនុញ្ញាត និងបញ្ឈប់ជាបន្ទាន់នូវការប្រើប្រាស់ឧបករណ៍នេសាទខុសច្បាប់គ្រប់ប្រភេទ ដែលបង្កការបំផ្លិចបំផ្លាញធ្ងន់ធ្ងរដល់ធនធានជលផល និងប្រព័ន្ធអេកូឡូស៊ីទឹក។
ទន្ទឹមនឹងនេះ ឯកឧត្តមក៏បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះអាជ្ញាធរដែនដី សមត្ថកិច្ចពាក់ព័ន្ធ និងប្រជាសហគមន៍ ដែលបានចូលរួមយ៉ាងសកម្មនាពេលកន្លងមក ក្នុងការថែរក្សា និងស្តារធនធានមច្ឆជាតិ ឱ្យកាន់តែសំបូរបែបឡើងវិញ ដើម្បីជាប្រយោជន៍ដល់ការទ្រទ្រង់ជីវភាពរស់នៅ និងសេដ្ឋកិច្ចគ្រួសាររបស់ប្រជាពលរដ្ឋក្នុងមូលដ្ឋាន។
ជាចុងក្រោយ ឯកឧត្តមរដ្ឋលេខាធិការ បានផ្តល់អនុសាសន៍ណែនាំដល់សហគមន៍នេសាទ និងអាជ្ញាធរពាក់ព័ន្ធគ្រប់លំដាប់ថ្នាក់ ត្រូវបន្តពង្រឹងកិច្ចសហការឱ្យបានជិតស្និទ្ធជាមួយមន្ត្រីជំនាញជលផល ដើម្បីទប់ស្កាត់ និងបង្ក្រាបបទល្មើសជលផលឱ្យមានប្រសិទ្ធភាពខ្ពស់ ជាពិសេសត្រូវរួមគ្នា អនុវត្តតាមបទបញ្ជា និងសេចក្តីជូនដំណឹងស្តីពី រដូវបិទនិងបើកនេសាទ ឱ្យបានម៉ឺងម៉ាត់បំផុត ដើម្បីធានាបាននូវការគ្រប់គ្រងធនធានជលផលប្រកបដោយចីរភាពសម្រាប់មនុស្សជំនាន់ក្រោយ៕
