ឯកឧត្តមរដ្ឋមន្ត្រី ឌិត ទីណា​ ជួបសម្តែងការគួរសម និងពិភាក្សាការងារ​ជាមួយ​ឯកឧត្តម​បណ្ឌិត​ សនសៃ​ ស៊ីផាន់ដន( Sonexay Siphandone) នាយករដ្ឋមន្ត្រី នៃសាធារណរដ្ឋប្រជាធិបតេយ្យ​ប្រជាមានិតឡាវ

ចេញ​ផ្សាយ​ ២៣ មិថុនា ២០២៦ 303

នារសៀលថ្ងៃទី២៣ ខែមិថុនា ឆ្នាំ២០២៦ ក្នុងក្របខណ្ឌនៃដំណើរទស្សនកិច្ចផ្លូវការ​ នៅសាធារណរដ្ឋប្រជាធិបតេយ្យប្រជាមានិតឡាវ ឯកឧត្តម ឌិត ទីណា រដ្ឋមន្ត្រី​ក្រសួងកសិកម្ម រុក្ខាប្រមាញ់ និងនេសាទកម្ពុជា បានដឹកនាំ​គណៈ​ប្រតិភូជាន់ខ្ពស់ ចូលជួបសម្តែងការគួរសមជាមួយឯកឧត្តម​បណ្ឌិត​ សនសៃ​ ស៊ីផាន់ដន(Sonexay Siphandone) នាយករដ្ឋមន្ត្រីនៃសាធារណរដ្ឋ​ប្រជាធិបតេយ្យ​ប្រជាមានិតឡាវ។
ក្នុងជំនួបដ៏មានសារៈសំខាន់ ឯកឧត្តមរដ្ឋមន្ត្រី ឌិត ទីណា បានពាំនាំនូវការ​ផ្តាំផ្ញើសួរសុខទុក្ខដ៏កក់ក្តៅពីសម្តេចមហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជា ជូនដល់ឯកឧត្តមនាយករដ្ឋមន្ត្រីឡាវ។ ឯកឧត្តមរដ្ឋមន្ត្រី លើកឡើងអំពីលទ្ធផលនៃកិច្ចប្រជុំទ្វេភាគីរវាងក្រសួងកសិកម្មនៃប្រទេសទាំងពីរ លើចំណុចអាទិភាពសំខាន់ៗ​ ក្នុងការបង្កើនទំហំកសិ-ពាណិជ្ជកម្ម​ ការផ្គូផ្គងវិស័យឯកជន និងកិច្ចសហប្រតិបត្តិការលើការនាំចេញទៅកាន់ទីផ្សារប្រទេសចិន​ ដោយដឹកជញ្ជូនឆ្លងកាត់ប្រទេសឡាវ។
ឯកឧត្តម​បណ្ឌិត​ សនសៃ​ ស៊ីផាន់ដន( Sonexay Siphandone) បានថ្លែង​អំណរគុណ​ចំពោះ​សារសួរសុខទុក្ខ​ពី​សម្តេចមហាបវរធិបតីនាយករដ្ឋមន្ត្រីកម្ពុជា និងបានវាយតម្លៃ​ខ្ពស់ចំពោះកិច្ចសហប្រតិបត្តិការរវា​ងប្រទេសទាំងពីរ ហើយក៏បានលើកឡើងពីលទ្ធភាពក្រសួងកសិកម្មនៃប្រទេសទាំងពីរ ពង្រឹងកិច្ចសហប្រតិបត្តិការលើការអនុវត្តគម្រោងអភិរក្សរួមគ្នា​ សំដៅរក្សាបាននូវនិរន្តរភាពព្រៃឈើ​ និងសត្វព្រៃ​។
សូមជម្រាបជូនថា នេះគឺជាដំណើរទស្សនកិច្ចផ្លូវការនៅប្រទេសឡាវ របស់គណៈប្រតិភូកម្ពុជា ក្នុងគោលបំណងពង្រឹងនិងពង្រីកកិច្ចសហប្រតិបត្តិការលើវិស័យ​កសិកម្ម​រវាងប្រទេសទាំងពីរ ជំរុញការនាំចេញ​កសិផលសក្តានុពល​កម្ពុជា​ទៅកាន់ទីផ្សារ​អន្តរជាតិ​ កិច្ចសហប្រតិបត្តិការអភិរក្ស និងពិនិត្យលទ្ធភាពតភ្ជាប់ការផ្គត់ផ្គង់ធាតុចូលសម្រាប់​ផលិតកម្មជីកសិកម្មពីឡាវមកកម្ពុជា៕