ឯកឧត្តមរដ្ឋលេខាធិការ តូច ប៊ុនហួរ អញ្ជើញចុះជួបសំណេះសំណាលជាមួយសហគមន៍កសិកម្មជាំសង្កែរុងរឿង និងទស្សនកិច្ចរោងចក្រផ្លែឈើបឹងកេត​ ស្ថិតក្នុងឃុំជាំសង្កែ ខេត្តកំពង់ស្ពឺ

ចេញ​ផ្សាយ​ ១៩ កុម្ភៈ ២០២៦ 43

នៅថ្ងៃទី១៩ ខែកុម្ភៈ ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមដំណើរដោយឯកឧត្តម សុខ វិសាល អនុរដ្ឋលេខាធិការ ព្រមទាំងមន្ត្រីបច្ចេកទេសនៃអគ្គនាយកដ្ឋានក្សេត្រសាស្ត្រ រួមទាំងថ្នាក់ដឹកនាំ និងមន្ត្រីនៃមន្ទីរកសិកម្មខេត្តកំពង់ស្ពឺ និងប្រធានគម្រោង GIZ ប្រចាំខេត្តកំពង់ស្ពឺ បានអញ្ជើញចុះជួបសំណេះសំណាលជាមួយសហគមន៍កសិកម្មជាំសង្កែរុងរឿង (ដំណាំស្វាយកែវរមៀត និងបន្លែផ្ទះសំណាញ់) ព្រមទាំងបានអញ្ជើញទស្សនកិច្ចរោងចក្រដំណាប់ផ្លែឈើបឹងកេតផ្លេនធីង & អ៊ិនដាសស្រ្ទៀល ឯ.ក ស្ថិតក្នុងឃុំជាំសង្កែ ស្រុកភ្នំស្រួច ខេត្តកំពង់ស្ពឺ។
ឯកឧត្តមរដ្ឋលេខាធិការបានឱ្យដឹងថា ដំណើរទស្សនកិច្ចនេះ ផ្តោតសំខាន់លើការផ្សារភ្ជាប់ទំនាក់ទំនងរវាងអ្នកផលិត (សហគមន៍កសិកម្ម) និងអ្នកបញ្ជាទិញ (រោងចក្រកែច្នៃ) ដើម្បីធានាឱ្យបាននូវស្ថិរភាពនៃការផ្គត់ផ្គង់ប្រកបដោយនិរន្តរភាព តាមរយៈការបន្ស៊ីគ្នានៃផែនការអាជីវកម្មរវាងភាគីទាំងពីរ។ 
ឯកឧត្តមរដ្ឋលេខាធិការ បានគូសបញ្ជាក់ថា សហគមន៍កសិកម្មជាំសង្កែរុងរឿង គឺជាសហគមន៍គំរូមួយដែលទទួលបានការគាំទ្រយ៉ាងសកម្មពីសំណាក់គម្រោង ASPIRE-AT និងអង្គការ GIZ ក្នុងការអភិវឌ្ឍសមត្ថភាពផលិតកម្ម និងការរៀបចំផែនការអាជីវកម្មឱ្យឆ្លើយតបទៅនឹងតម្រូវការទីផ្សារបច្ចុប្បន្ន៕