ឯកឧត្តមអនុរដ្ឋលេខាធិការ ប៉ែន ផល្លីកា​ អញ្ជើញដឹកនាំប្រជុំពិភាក្សាស្តីពីវិធានការទប់ស្កាត់និងបង្រ្កាបបទល្មើសជលផលបឹងទន្លេសាប

ចេញ​ផ្សាយ​ ៤ មេសា ២០២៦ 3204

នៅថ្ងៃទី៤ ខែមេសា ឆ្នាំ២០២៦ ឯកឧត្ដម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្ត្រី ឌិត ទីណា បានអញ្ជើញដឹកនាំប្រជុំពិភាក្សាស្តីពីវិធានការទប់ស្កាត់ និងបង្រ្កាបបទល្មើសជលផលបឹងទន្លេសាប។
កិច្ចប្រជុំនេះមានការចូលរួមពីលោកឧត្តមសេនីយ៍ត្រី អាន ប៊ុនទិ មេបញ្ជាការរងយោធភូមិភាគទី៤ និងជាប្រធានក្រុមការងារបង្រ្កាបបទល្មើសប្រចាំខេត្តសៀមរាប-បាត់ដំបង លោកវរសេនីយ៍ទោ ជា ថុល តំណាងយោធភូមិភាគទី៥ លោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប និងក្រុមការងារពាក់ព័ន្ធ។
ជាកិច្ចចាប់ផ្តើម ឯកឧត្តមអនុរដ្ឋលេខាធិការ មានប្រសាសន៍សំណេះសំណាល និងបានពាំនាំនូវការថ្លែងអំណរគុណនិងការផ្តាំផ្ញើរសួរសុខទុក្ខរបស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទជូនដល់កងកម្លាំងកងទ័ព ដែលបានចូលរួមយ៉ាងសកម្មក្នុងកិច្ចការពារធនធានធម្មជាតិ។
ក្នុងកិច្ចប្រជុំនេះ ក្រុមការងារបានធ្វើការពិភាក្សាលើកិច្ចការងារទប់ស្កាត់និងបង្រ្កាបបទល្មើសជលផលបឹងទន្លេសាបដោយទទួលបានលទ្ធផលដូចខាងក្រោម៖​ ១-ការធ្វើនេសាទដោយឧបករណ៍ លបរ៉ាវ ក្រុមការងារបានសម្រេចឱ្យអ្នកនេសាទរុះរើចេញពីក្នុងកក់ឱ្យអស់ក្រោយបុណ្យចូលឆ្នាំខ្មែរ​ ត្រូវមានគម្លាត ១០០ម៉ែត្រ ចន្លោះពីរបាំងមួយទៅរបាំងមួយទៀត និងមិនអនុញ្ញាតឱ្យដាក់បន្តគ្នាដាច់ខាត។​ ២-បន្តចូលរួមជាប្រចាំក្នុងកិច្ចការពារទប់ស្កាត់នឹងបង្រ្កាបបទល្មើសជលផល ជាពិសេសការនេសាទដោយឧបករណ៍ឆក់ និងការការពារកន្លែងអភិរក្សជលផល។
មុននឹងបញ្ចប់កិច្ចប្រជុំ ឯកឧត្តមអនុរដ្ឋលេខាធិការ​ បានកោតសរសេីរ និងវាយតម្លៃខ្ពស់ដល់ក្រុមការងារចម្រុះ​ ដែលជានិច្ចកាលតែងតែខិតខំប្រឹងប្រែងទប់ស្កាត់បទល្មើសជលផលបានយ៉ាងសកម្មដូចភ្លៀងរលឹម ជាពិសេសកងកម្លាំងប្រដាប់អាវុធ ដែលតែងតែចុះល្បាតជាប្រចាំទាំងយប់ទាំងថ្ងៃផងដែរ៕