ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម ដឹកនាំក្រុមការងារជួបសំណេះសំណាលជាមួយប្រជាកសិករ និងសហគមន៍ដាំស្វាយចន្ទី នៅខេត្តត្បូងឃ្មុំ និងខេត្តក្រចេះ

ចេញ​ផ្សាយ​ ២៩ មេសា ២០២៤ 2525

នៅថ្ងៃទី២៦–២៧ ខែមេសា ឆ្នាំ២០២៤ ឯកឧត្តម តូច ប៊ុនហួរ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អមដោយថ្នាក់ដឹកនាំមកពីអគ្គនាយកដ្ឋានកសិកម្ម បានអញ្ជើញជួបសំណេះសំណាល ជាមួយប្រជាកសិករម្ចាស់ចម្ការស្វាយចន្ទី និងសហគមន៍កសិកម្មស្វាយចន្ទីចំនួន ៤គឺ៖ សហគមន៍កសិកម្មតំបែររុងរឿង នៅស្រុកតំបែរ ខេត្តត្បូងឃ្មុំ សហគមន៍កសិកម្មអូរគរគី នៅស្រុកចិត្របុរី សហគមន៍កសិកម្មសម្បទានចំបក់ និងសហគមន៍កសិកម្មឬស្សីកែវ នៅស្រុកព្រែកប្រសព្វ ខេត្តក្រចេះ។

បេសកកម្មនេះ ធ្វើឡើងក្នុងគោលបំណងសែ្វងយល់ពីបញ្ហាប្រឈម ពិនិត្យលើខ្សែច្រវាក់ផលិតកម្ម និងវឌ្ឍនភាពការងារ នៅតាមបណ្តាសហគមន៍កសិកម្មទាំងអស់នោះ។ ក្នុងឱកាសជួបជាមួយបងប្អូនសមាជិកសហគមន៍ ឯកឧត្តម តូច ប៊ុនហួរ បានណែនាំដល់ប្រជាកសិករម្ចាស់ចម្ការស្វាយចន្ទី និងសហគមន៍កសិកម្មស្វាយចន្ទី ឱ្យលើកកម្ពស់គុណភាពផលិតផល ពង្រឹងរចនាសម្ព័ន្ធសហគមន៍ ក៏ដូចជាតម្រង់ទិសទីផ្សារកសិផល ដើម្បីរក្សានិរន្តរភាព និងការរីកចម្រើនដល់សហគមន៍កសិកម្មស្វាយចន្ទីរបស់ខ្លួន៕