ឯកឧត្តមរដ្ឋលេខាធិការ អ៊ឺម ស៊ីថុល​ អញ្ជើញជាអធិបតីភាពក្នុងពិធីបិទសិក្ខាសាលាពិគ្រោះយោបល់លើសេចក្តីព្រាងសេចក្តីណែនាំអន្តរក្រសួងស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលពាក់ព័ន្ធការងារសុខភាពសត្វនិងផលិតកម្មសត្វ

ចេញ​ផ្សាយ​ ២១ វិច្ឆិកា ២០២៥ 1700

នៅថ្ងៃទី២១ ខែវិច្ឆិកា ឆ្នាំ២០២៥ ឯកឧត្តម អុឹម ស៊ីថុល រដ្ឋលេខាធិការប្រចាំការនិងជាអនុប្រធានប្រចាំការគណៈកម្មាធិការដឹកនាំការងារកំណែទម្រង់វិមជ្ឈការនិងវិសហមជ្ឈការក្រសួងកសិកម្ម រុក្ខាប្រមាញ់ និងនេសាទ  បានអញ្ជើញជាអធិបតីភាពក្នុងពិធីបិទសិក្ខាសាលាពិគ្រោះយោបល់លើសេចក្តីព្រាងសេចក្តីណែនាំអន្តរក្រសួងស្តីពីបែបបទ នីតិវិធី និងលក្ខខណ្ឌភ្ជាប់នៃការផ្តល់សេវារដ្ឋបាលពាក់ព័ន្ធការងារសុខភាពសត្វនិងផលិតកម្មសត្វនៅរដ្ឋបាលរាជធានី-ខេត្ត នៅសាលប្រជុំរដ្ឋបាលខេត្តកំពត។
ឯកឧត្តមរដ្ឋលេខាធិការប្រចាំការ បានគូសបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បាននឹងកំពុងចូលរួមយ៉ាងសកម្មក្នុងការអនុវត្តកិច្ចការកែទម្រង់គន្លឹះនៃរាជរដ្ឋាភិបាល រួមមាន៖​ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ កម្មវិធីជាតិកែទម្រង់រដ្ឋបាលសាធារណៈ កម្មវិធីកែទម្រង់ច្បាប់ ក៏ដូចជាកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដោយបានអនុវត្តនិងដាក់ចេញលិខិតបទដ្ឋានគតិយុត្តគាំទ្រជាបន្តបន្ទាប់ដើម្បីធានាថា រដ្ឋបាលរាជធានី-ខេត្ត អាចផ្ដល់សេវាពាក់ព័ន្ធវិស័យកសិកម្ម ប្រកបដោយប្រសិទ្ធភាព ការទទួលខុសត្រូវ និងមានភាពឆាប់រហ័សជូនដល់ប្រជាពលរដ្ឋនៅមូលដ្ឋាន។
ឯកឧត្តមរដ្ឋលេខាធិការប្រចាំការ បានបន្ថែមថា សេចក្ដីណែនាំអន្តរក្រសួងនេះនឹងចូលរួមចំណែកយ៉ាងសំខាន់ក្នុងការផ្ដល់សេវាពាក់ព័ន្ធការងារសុខភាពសត្វនិងផលិតកម្មសត្វនៅរដ្ឋបាលរាជធានី-ខេត្ត ប្រកបដោយប្រសិទ្ធភាព និងឆាប់រហ័សជូនដល់ប្រជាពលរដ្ឋ ស្របតាមគោលនយោបាយស្ដីពីការផ្ដល់សេវាសាធារណៈរបស់រាជរដ្ឋាភិបាល ក្នុងការផ្ដល់សេវាជូនប្រជាពលរដ្ឋឱ្យបានកាន់តែល្អប្រសើរឡើង។
ឆ្លៀតក្នុងឱកាសនេះផងដែរ ឯកឧត្តមរដ្ឋលេខាធិការ បានថ្លែងអំណរគុណជូនចំពោះ ក្រសួងមហាផ្ទៃ និង គ.ជ.អ.ប ដែលជានិច្ចជាកាលតែងតែផ្ដល់ការគាំទ្រសកម្មភាពនានាពាក់ព័ន្ធការងារកំណែទម្រង់វិមជ្ឈការនិងវិសហមជ្ឈការរបស់ក្រសួងកសិកម្ម រុក្ខាប្រមាញ់ និងនេសាទ។ 
ជាទីបញ្ចប់ ឯកឧត្តម​រដ្ឋលេខាធិការ​ បានកោតសរសើរនិងវាយតម្លៃខ្ពស់ចំពោះអគ្គនាយកដ្ឋានសុខភាពសត្វនិងផលិតកម្មសត្វ លេខាធិការដ្ឋាន គ.វ.វ.ក អគ្គនាយកដ្ឋានរដ្ឋបាល ក្រសួងមហាផ្ទៃ និងលេខាធិការដ្ឋាន គ.ជ.អ.ប. ដែលបានសហការរៀបចំខ្លឹមសារនៃសេចក្ដីព្រាងសេចក្តីណែនាំអន្តរក្រសួងនេះ សម្រាប់ដាក់ជូនអង្គសិក្ខាសាលាពិនិត្យនិងផ្ដល់យោបល់សម្រាប់រយៈពេលមួយថ្ងៃពេញនាថ្ងៃនេះ៕