ពិធីចុះហត្ថលេខាផលិតកម្មកសិកម្មតាមកិច្ចសន្យាលើការផលិតនិងផ្គត់ផ្គង់ស្រូវសែនក្រអូបលើកទី៤ រវាងក្រុមហ៊ុនរ៉ាយស៏មីលលីមីធីត និងសហគមន៍កសិកម្មឃុំកំពង់គោ

ចេញ​ផ្សាយ​ ១៤ តុលា ២០១៩ 21785

ថ្ងៃសុក្រ ១៣កើត ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១១ ខែតុលា ឆ្នាំ២០១៩ មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានរៀបចំពិធីចុះហត្ថលេខាលើកិច្ចសន្យាផលិតកម្មកសិកម្ម រវាងក្រុមហ៊ុនរ៉ាយស៏មីលលីមីធីត និងសហគមន៍កសិកម្មឃុំកំពង់គោ ក្នុងនោះដែរ លោក គង់ ភាជ ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខប្រមាញ់ និងនេសាទ បានអញ្ជើញចូលរួម និងមានប្រសាសន៍ថា ការចុះផលិតកម្មកសិកម្មតាមកិច្ចសន្យា គឺជាការធ្វើពាណិជ្ជកម្មស្មោះត្រង់មួយដែលស្របតាមគោលនយោបាយរបស់រាជរដ្ឋាភិបាល ក៏ដូចជាក្រសួងកសិកម្ម រុក្ខាប្រមាញ់ និងនេសាទ បានដាក់ចេញក្នុងគោលបំណងបង្កើនទាំងបរិមាណ និងគុណភាព លើផលិតផលរបស់កសិករ ស្របទៅតាមទីផ្សារជាតិ និងអន្តរជាតិ។លើសពីនេះទៅទៀត កិច្ចសន្យានេះមានការព្រមព្រៀង រវាងភាគីអ្នកផលិតដែលជាកសិករ ឬសហគមន៍ និងភាគីក្រុមហ៊ុនដែលកំណត់រួចជាស្រេច ទាំងកម្រិតគុណភាពរបស់ផលិតផលកសិកម្ម ព្រមទាំងតម្លៃទីផ្សារនៅថ្ងៃប្រមូលផល អាចនិយាយបានថា ជាការផ្តល់នូវទំនុកចិត្តរវាងគ្នា និងគ្នា។ លោកប្រធានបានបន្ថែមទៀតថា ចំពោះការចុះកិច្ចសន្យារវាងក្រុមហ៊ុននាំអង្ករចេញ១៦៨៨ និងសហគមន៍ កសិកម្មកំពង់គោ គឺបានជជែកវែកញែករួចជាស្រេចមុននឹងឈានមកដល់ការចុះហត្ថលេខានេះ ដែលអាចផ្តល់នូវផលចំណេញទាំងប្រជាពលរដ្ឋ និងក្រុមហ៊ុន។

លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានលើកឡើងដែរថា ក្នុងខេត្តកំពង់ធំ មានសហគមន៍កសិកម្មចំនួន៦៣ និងបានចុះកិច្ចសន្យា ផលិតកម្មកសិកម្មចំនួន ១៥ សហគមន៍ លើក្រុមហ៊ុនចំនួនពីរ គឺក្រុមហ៊ុននាំអង្ករចេញ១៦៨៨ តាំងពីឆ្នាំ២០១៧ មានរយៈពេលជិតបួនឆ្នាំមកហើយ និងក្រុមហ៊ុន អេមរ៉ុរាយណ៍ មានឃ្លាំងស្តុក និងសំងួតផលិតផលកសិកម្មផងដែរ។ ចំពោះបរិមាណដែល បានចុះកិច្ចសន្យាផលិតកម្មកសិកម្ម ជាមួយសហគមន៍កសិកម្មក្នុងខេត្តកំពង់ធំ សព្វថ្ងៃនេះមានទាំងស្រូវវស្សា និងស្រូវប្រាំង។ ក្នុងនាមមន្ទីរកសិកម្មដើម្បីគាំទ្រលើគោលនយោបាយរបស់រាជរដ្ឋាភិបាល បាននឹងកំពុងធ្វើការចុះផ្តល់នូវបច្ចេកទេស ពិនិត្យនូវជម្ងឺមួយចំនួនដែលកើតឡើង លើដំណាំកសិកម្មជូនប្រជាពលរដ្ឋផងដែរ៕