ព័ត៌មានផ្សេងៗទៀត
ក្រសួងកសិកម្ម រុក្ខាប្រមាញ់ និងនេសាទ ផ្សព្វផ្សាយការងារអប់រំ បង្ការ ទប់ស្កាត់ និងប្រយុទ្ធប្រឆាំងគ្រឿងញៀនខុសច្បាប់ និងជំងឺអេដស៍ និងធ្វេីតេស្តទឹកមូត្ររកសារធាតុញៀនក្នុងចំណោមមន្ត្រីរាជការ
ចេញផ្សាយ ២៦ មីនា ២០២៦ 2654
នៅថ្ងៃទី២៦ ខែមីនា ឆ្នាំ២០២៦ ឯកឧត្តមរដ្ឋលេខាធិការ គង់ ច័ន្ទវាសនា ប្រធានក្រុមការងារផ្សព្វផ្សាយ អប់រំ បង្ការ ទប់ស្កាត់ការប្រើប្រាស់ និងជួញដូរគ្រឿងញៀន និងជាប្រធានគណៈកម្មាធិការប្រយុទ្ធនឹងជំងឺអេដស៍ប្រចាំក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងកម្មវិធីផ្សព្វផ្សាយការងារអប់រំ បង្ការ ទប់ស្កាត់ និងប្រយុទ្ធប្រឆាំងគ្រឿងញៀនខុសច្បាប់ និងជំងឺអេដស៍ ព្រមទាំងធ្វើតេស្តទឹកមូត្ររកសារធាតុញៀន។ កម្មវិធីនេះមានការចូលរួមពីថ្នាក់ដឹកនាំក្រុមការងារ ថ្នាក់ដឹកនាំអគ្គលេខាធិការដ្ឋាន និងមន្ត្រីរាជការសរុបជិត ៧០០នាក់ ហេីយការធ្វេីតេស្តទទួលបានលទ្ធផលអវិជ្ជមានទាំងអស់។
ឯកឧត្តមរដ្ឋលេខាធិការបានលើកឡើងថា កម្មវិធីនេះគឺជាផ្នែកមួយនៃការចូលរួមរបស់ក្រសួងកសិកម្ម ក្នុងការជំរុញអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លេីកទី១១ និងគោលនយោបាយជាតិបញ្ចប់ជំងឺអេដស៍ របស់រាជរដ្ឋាភិបាល ដែលមានអាជ្ញាធរជាតិទាំង២ ជាសេនាធិការដ៏ស្វាហាប់ និងប៉ិនប្រសប់។
ទន្ទឹមនេះ ការធ្វើតេស្តទឹកមូត្រនាពេលនេះ គឺជាការប្តេជ្ញាចិត្តរបស់ក្រសួងកសិកម្ម ក្នុងការពង្រឹងភាពស្អាតស្អំរបស់មន្ត្រីរាជការ ស្របតាមបទបញ្ជា០១របស់រាជរដ្ឋាភិបាល និងទិសស្លោក “ការសម្អាតចកចេញពីផ្ទៃបឹង និងការរក្សាផ្ទៃបឹងឱ្យស្អាតថ្លាជាប្រចាំ” ដែលការងារនេះទទួលបានការយកចិត្តទុកដាក់ណែនាំ និងជំរុញអនុវត្តជាប់ជាប្រចាំដោយឯកឧត្តមរដ្ឋមន្ត្រី ឌិត ទីណា។ ឯកឧត្តមរដ្ឋមន្ត្រីបានណែនាំឱ្យអនុវត្តការធ្វេីតេស្តនេះជាបន្តបន្ទាប់ដូចភ្លៀងរលឹម ដេីម្បីពង្រឹងភាពស្អាតស្អំរបស់មន្ត្រីផង និងក្រើនរម្លឹកមន្ត្រីឱ្យនៅឆ្ងាយជានិច្ចពីគ្រឿងញៀនផង។
ឯកឧត្តមប្រធានក្រុមការងារបានថ្លែងនូវការកោតសរសើរ និងវាយតម្លៃខ្ពស់ចំពោះការយកចិត្តទុកដាក់អនុវត្តការងារ និងការចូលរួមរបស់គ្រប់អង្គភាពចំណុះក្រសួង លើការងារអប់រំ ផ្សព្វផ្សាយ បង្ការទប់ស្កាត់ និងប្រយុទ្ធប្រឆាំងគ្រឿងញៀនខុសច្បាប់ និងជំងឺអេដស៍ ជាពិសេស ការថែរក្សាបាននូវភាពស្អាតស្អំ និងចៀសឆ្ងាយពីគ្រឿងញៀនរបស់មន្ត្រីរាជការទាំងអស់ដែលចូលរួមធ្វេីតេស្តទឹកមូត្រនាពេលនេះ៕
