ឯកឧត្តមអនុរដ្ឋលេខាធិការ ឃឹម ហ្វីណង់ អញ្ជើញជាអធិបតីក្នុងពិធីចុះកិច្ចសន្យាផលិតកម្មស្រូវស្រងែស្រាល រវាងក្រុមហ៊ុន វិរៈ ប៊ុនថាំ គ្រុប និងសហគមន៍កសិកម្មទំនើបដំណាំស្រូវព្រះនេត្រព្រះមានជ័យ

ចេញ​ផ្សាយ​ ៩ តុលា ២០២៥ 794

នៅថ្ងៃទី៦ ខែតុលា ឆ្នាំ២០២៥ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាអធិបតីក្នុងពិធីចុះកិច្ចសន្យាផលិតកម្មស្រូវស្រងែស្រាល រវាងសហគមន៍កសិកម្មទំនើបស្រូវព្រះនេត្រព្រះមានជ័យ ជាមួយក្រុមហ៊ុនវីរៈ ប៊ុនថាំគ្រុប របស់អ្នកឧកញ្ញា សូរ វីរៈ នៅសាលាឃុំរហាល ស្រុកព្រះនេត្យព្រះ ខេត្តបន្ទាយមានជ័យ។ ក្នុងពិធីនេះ ឯកឧត្តមអនុរដ្ឋលេខាធិការ បានបញ្ជាក់ថា ការចុះកិច្ចសន្យារវាងសហគមន៍កសិកម្មទំនើបដំណាំស្រូវព្រះនេត្រព្រះមានជ័យ និងក្រុមហ៊ុនវីរៈ ប៊ុនថាំ គ្រុប របស់អ្នកឧកញ្ញា សួរ វីរៈ នៅថ្ងៃនេះ គឺផ្ដល់ទំនុកចិត្តយ៉ាងខ្លាំងដល់បងប្អូនប្រជាកសិករក្នុងការបង្កបង្កើនផលដំណាំស្រូវរបស់ខ្លួន ដោយមានការធានាទីផ្សារ និងតម្លៃទុកមុន ព្រោះចាប់ពីពេលចុះកិច្ចសន្យានេះទៅ ក្រុមហ៊ុនវីរៈ ប៊ុនថាំ គ្រុប និងប្រមូលទិញស្រូវស្រងែស្រាលពីប្រជាកសិករសហគមន៍ ដែលដំណាក់កាលទី១នេះក្នុងបរិមាណ ៦២៦០ តោន លើផ្ទៃដីទំហំ១១៣៨ ហិកតា ដោយមានរយៈពេលនៃការអនុវត្តកិច្ចសន្យាចាប់ពីខែវិច្ឆិកា ឆ្នាំ២០២៥ រហូតដល់ថ្ងៃទី៣០ ខែមេសា ឆ្នាំ២០២៦។ នាឱកាសនោះ ឯកឧត្តមអនុរដ្ឋលេខាធិការ ក៏បានសម្ដែងក្ដីរីករាយ និងអបអរសាទរចំពោះបងប្អូនប្រជាសិករដែលចូលរួមការចងក្រងសហគមន៍កសិកម្មទំនើបដំណាំស្រូវព្រះនេត្រព្រះមានជ័យទាំងអស់ ដែលធ្វើឱ្យបងប្អូនប្រជាកសិករមានភាពងាយស្រួល កាត់បន្ថយថ្លៃដើមផលិត មានការធានាទីផ្សារនិងតម្លៃទុកមុន និងមានប្រសិទ្ធភាពសេដ្ឋកិច្ចខ្ពស់។ ជាចុងបញ្ជប់ ឯកឧត្តមអនុរដ្ឋលេខាធិការ បានផ្ដាំផ្ញើរឱ្យបងប្អូនប្រជាកសិករសមាជិកសហគមន៍ ត្រូវខិតខំប្រឹងប្រែង និងយកចិត្តទុកដាក់ក្នុងបង្កបង្កើនផលស្រូវឱ្យបានគ្រប់បរិមាណនិងគុណភាពតាមតម្រូវការនៃកិច្ចសន្យា ហើយក៏ត្រូវគោរព និងអនុវត្តឱ្យបានខ្ជាប់ខ្ជួននូវស្ដង់ដាគុណភាពសហគមន៍តែមួយផងដែរ៕