ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម បានអញ្ជើញចូលរួមពិធីបញ្ចុះសព ឯកឧត្តមបណ្ឌិតសភាចារ្យ ច័ន្ទ សារុន នៅខេត្តតាកែវ
ចេញផ្សាយ ៣ កញ្ញា ២០២៦ 439
នៅថ្ងៃទី៣ ខែកញ្ញា ឆ្នាំ២០២៦នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម និងថ្នាក់ដឹកនាំ រួមទាំងមន្ត្រីក្រសួង បានអញ្ជើញចូលរួមពិធីបញ្ចុះសព ឯកឧត្តមបណ្ឌិតសភាចារ្យ ច័ន្ទ សារុន ភូមិត្បូងដំរី ឃុំក្រាំងធ្នង់ ស្រុកបាទី ខេត្តតាកែវ ក្រោមអធិបតីភាពរបស់ឯកឧត្តម វង សូត អនុប្រធានទី២នៃរដ្ឋសភា តំណាងដ៏ខ្ពង់ខ្ពស់របស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា។
ក្នុងឱកាសនោះ ឯកឧត្តម វង សូត បានអញ្ជើញបូជាផ្កា និងផ្តល់ព្រះធរណីចំពោះសព ព្រមទាំងមានការអញ្ជើញបូជាផ្កាពីសំណាក់ថ្នាក់ដឹកនាំ ឥស្សរជន និងភ្ញៀវកិត្តិយសជាតិ-អន្តរជាតិ ដើម្បីគោរពវិញ្ញាណក្ខន្ធ និងចូលរួមរំលែកទុក្ខជាមួយក្រុមគ្រួសារសព។
ឯកឧត្តមបណ្ឌិតសភាចារ្យ ច័ន្ទ សារុន ជាតំណាងរាស្ត្រមណ្ឌលតាកែវ និងជាអតីតរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលមរណភាពនៅវេលាម៉ោង ០០:២៩ នាទី ថ្ងៃទី៣១ ខែសីហា ឆ្នាំ២០២៦ ក្នុងជន្មាយុ ៨១ឆ្នាំ ដោយជរាពាធ៕
